Yesuq Eq Yhâng É Gu-mang Wuì
7
Hau htâng má, Yesuq gi, Yhang lé sat râ matú, Yudaq byu pé ho nyi bùm kô é yánmai, Yuda mau má a kâm sô wún mù, Galile mau má sô lhing wún ri.
Yohan 7:1-24
2 Nghut kôlhang, haû Yudaq byu pê é Zúm Poî chyâng lo nyi é hkûn, 3 Yesuq é yhang gu yùqzô pé gi, Yhang lé, “Náng é chángzô pé gi, Nàng kut é làklaí alhô agàn pé lé myàng kó sháng gàq, Nàng, shî mai htoq ló luî, Yuda mau shut e ló àq. 4 Myìng hú nau é sû gi, hkaû zaú luî haî le a kut wú é nghut lhê. Nàng gi, haú pé lé kut nyî bê nghut é yánmai, mingkan lé, Náng gûng tûn shit àq.” ga taî akô. 5 Hkâsu mù gâ le, yhang gu sîng yùqzô pé lháng, Yhang lé a lùmjíng kó nghut ri.
6 Haû mù luî, Yesuq gi, yhángmòq lé, “Ngá é ahkyíng gi, a jé shi nghut ri; núngmòq é ahkyíng kúm gi, hká hkûn le jòq nyi ri. 7 Haû mingkan gi, núngmòq lé a naù a wom a wó kut kó nghut ri; nghut kôlhang, Ngo lé gi, a naù a wom kó; haî mù gâ le, yhang kut é hkyô gi, agè ashop é nghut é lé, Ngò, sàksé tûn shit é yánmai nghut ri. 8 Núngmòq gi, poî haú shut dòq ló keq. Ngò kúm gi, Ngá é ahkyíng a jé shi nghut é yánmai, poî haú shut a dòq ló shirâ nghut lhê.” ga taî ri. 9 Haû su ga taí luî, Yhang gi, Galile mau má nyi gyó to bê nghut ri.
10 Nghut kôlhang, Yhang gû pé, haû poî shut dòq ló byùq é htâng má, Yhang gi, de de a nghut é dông, tsik za châng dòq ló bê nghut ri. 11 Yudaq byu pé gi, haû poî má, Yhang lé châng hô kômù, “Haú yùq gi, hká má nghut lhê lhú?” ga, myî wún akô nghut ri.
12 Haû byù hpûng hkaû má, Yhang eq séng luî taî lhûm bùm kô é má, ra-am gi, “Yhang gi, byù gè nghut ri.” ga taí kôjáng, ra-am gi, “A nghut, Yhang gi, byu pé lé hkyô shuî nghoq sû nghut ri.” ga tû taî akô. 13 Nghut kôlhang, haû Yudaq sûwún wuî lé gyùq kô é yánmai, ó yùq le, Yhang eq sêng é hkyô lé de de a wám taí kó nghut ri.
Haû Poî Má, Yesuq Mhoqshit É Hkyô
14 Haû poî rawuí nghut ló é hkûn, Yesuq gi, noqkuq yhûm má dòq ê luî, mhoqshit hi ló bê nghut ri. 15 Haú hkûn, Yudaq byu pé gi, gyô maú byùq kômù, “Shí yùq gi, mhoq yu é hkyô le a jòq wú é wá, haû í hkâsu mù sê lhê làq?” ga myî bum akô.
16 Haû mù, Yesuq tû taî é gi, “Ngò mhoqshit é dang gi, Ngá é dang a nghut; Ngo lé nhang kat Su é dang ru nghut lhê. 17 Rayùq yùq, Garai Gasang ô nau é hkyô lé châng kut nau é nghut jáng, Ngò mhoqshit é dang gi, Garai Gasâng chyáng mâ é nghut a nghut é eq, Ngá é myìt dông taî é dang nghut a nghut é lé, yhang sê gàm hkoq yû râ nghut lhê. 18 Yhûmsing é myìt dông taî é sû gi, yhûmsing é matú xânghpoq nge wó hkyô hô sû nghut ri; nghut kôlhang, yhûmsîng lé nhang kat su é matú, xânghpoq nge wó hkyô ho é sû gi, tengmán é byù nghut ri; yhang má, a tengmán é hkyô haî le a bò nghut ri. 19 Mosheq gi, núngmòq lé jep é târâ byî to bê, a nghut kó lhú? Nghut kôlhang, núngmòq ó yùq le, jep é târâ haû lé a cháng kó nghut ri. Haî mù luî, Ngo lé sat nau nyi akô lhú?” gâ ri.
20 Haú hkûn, haû byù hpûng gi, “Nàng gi, nàt gang wang to sû nghut rî-nhung! Nang lé, ó yùq wá sat nau nyi ri lhú?” ga tû taî akô.
21 Yesuq gi, yhángmòq lé, “Ngò, làklaí alhô agàn ralhum kut jáng, núngmòq bànshoq bang gi, maú byùq bum akô. 22 Nghut kôlhang, núngmòq gi, ahpyo-kuq hpyit byî é hkyô lé, Mosheq byî é nghut lhê ga luî, Bánno Buìnyì má, zoshâng lé ahpyo-kuq hpyit byî akô (gè gè ga jáng, ahpyo-kuq hpyit é hkyô gi, Mosheq chyáng mai lo é a nghut é za, îchyí îwâ pê chyáng mai lo é ru nghut lhê.). 23 Haû, Mosheq é jep é târâ lé a lhoqhtên pyám sháng gàq nghû, Bánno Buìnyì má, zoshâng lé ahpyo-kuq hpyit byî é nghut le gi, haî mù luî, Bánno Buìnyì má, byù rayùq é gùng gón lé, Ngò lhoqgê byî é yánmai, Ngo lé nhikjum yô akô lhú? 24 Byù du lé wú luî hkâ jéyáng kó; tengmán é dông shèq jéyáng keq.” ga taî ri.
Yesuq Gi, Hkrisidùq Nghut Lhê Lhú?
25 Haû mù luî, Yerusalem wà mó mâ é byu pé ra-am gi, “Haû yhángmòq sat pyám nau nyi é sû gi, shí yùq a nghut lhí?
Yohan 7:25-53
26 Yhang gi, shî má de de dáng nyo nyi le, yhángmòq gi, Yhang lé, haî le a ga kó myhî-nhung! Yhang gi, Hkrisidùq nghut lhê ga, haû ahkáng ayá wó bang gi, gè gè yhang, sê akô âbe? 27 Haû Hkrisidùq jé lé é hkûn gi, Yhang hká mai lé lo é lé, ó yùq lháng sé râ a nghut. Nghut kôlhang, shí yùq gi, hkâmâ é sû nghut é lé, ngá-nhúng sê lhê.” ga taî bum akô.
28 Haû mù, Yesuq gi, noqkuq yhûm wàng má mhoqshit uchyang, htê mó èq taî kat é gi, “Núngmòq gi, Ngo lé sê é htoq agó, Ngò, hká mai lé é sû nghut é lé le, sê akô nghut ri. Ngò gi, Ngá myìt dông shî má lé nyi tô é sû a nghut kôlhang, Ngo lé nhang kat é Sû gi, tengmán lhê; núngmòq gi, Yhang lé a sé kôlhang, 29 Ngò gi, Yhang lé sê lhê; hkâsu mù gâ le, Ngò gi, Yhâng chyáng mai lé é sû eq Yhang mai nhang kat é sû nghut lhê.” gâ ri.
30 Haû mù, yhángmòq gi, Yhang lé chyup râ haq htung akô; nghut kôlhang, Yhâng é ahkyíng a jé shî é yánmai, Yhang lé chyup râ matú, ó yùq le lòq a jé kó nghut ri. 31 Nghut kôlhang, byù hpûng hkaû mâ é bang myo myo gi, Yhang lé lùmjíng bûm kôluî, “Haû Hkrisidùq jé lé é hkûn, Yhang gi, shí yùq htoq má, maúhpo alhô agàn pé je wó kut shit râ lhú?” ga taî bum akô nghut ri.
32 Haû Hparishe pé gi, haû byù hpûng hkaû má, Yesuq eq sêng é hkyô lé, haû su ga dangsoq soq lhûm nyì kô é hkyô lé wó gyô yu akô. Haû mù, haû hkyangjong agyi pé eq Hparishe pé gi, Yhang lé ê chyup râ matú, noqkuq yhûm zúng é bang lé nhang kat akô.
33 Haú hkûn, Yesuq gi, “Ngò gi, núngmòq eq rahá rayòq zo za nyì râ nghut lhê; hau htâng, Ngo lé nhang kat Su chyáng taû ló râ nghut lhê. 34 Haú hkûn, núngmòq gi, Ngo lé hô kôlhang, myang hô kôrâ a nghut; Ngò nyi é jang má, núngmòq wó jé kôrâ a nghut.” ga taî ri.
35 Hau é yánmai, Yudaq byu pé, rayùq eq rayùq taî lhum kô é gi, “Shí yùq gi, Yhang lé ngá-nhúng a myang hô loshoq, hká shut e byùq râ haq htung lhê lhú? Yhang gi, Grik byu pé má nyi byo myín tô é ngá-nhûng é byu pé nyi é jowò má ê mù, Grik byu pé lé, ê mhoqshit râ haq htung lhê lhú? 36 ‘Núngmòq gi, Ngo lé hô kôlhang, myang hô kôrâ a nghut.’ gâ é eq, ‘Ngò nyi é jang má, núngmòq wó jé kôrâ a nghut.’ gâ é, Yhang taî é dang gi, haí jung wá gá nau é nghut lhê lhú?” gâ akô.
37 Haû ló htâng é eq je ahkyàk é Poî buìnyì má, Yesuq toq yàp luî, htê mó èq taî é gi, “Wuìshit sû gi, Ngá chyáng lé mù, shuq sháng gàq. 38 Ngo lé lùmjíng é sû ó yùq nghut kôle, ‘Yhâng chyáng mai chyungxe uchyâm é wuìlàng yui htoq lô râ nghut lhê.’ ga haû Chyúmdang má taî tô é eq rajung za nghut ri.” gâ ri. 39 Yhang haû su gâ é gi, Yhang lé lùmjíng é bang myang hàp yù râ nghut é, haû Sô lé taî é nghut ri. Haú hkûn jé shoq, haû Sô lé a byî kat shi nghut ri. Hkâsu mù gâ le, Yesuq gi, hpungwup shingkang dan hû é a hui nhâng shî é yánmai nghut ri.
40 Yhâng é dang pé lé wó gyo kôjáng, ra-am gi, “Shí yùq gi, gè gè yhang, Myìqhtoi haû nghut ri.” ga taî akô.
41 Ra-am gi, “Shí yùq gi, Hkrisidùq nghut ri.” ga taî akô. Góbang nghut jáng, “Hkrisidùq wá Galile mau mai htoq lé râ nghut lhê lhú? 42 Haû Chyúmdang má, Hkrisidùq gi, Dawiq é awùt ashín mâ é nghut luî, Dawiq nyi laî lo é Betlehem wà mai htoq lô râ nghut lhê gâ é, a nghut lhú?” ga myî bum akô nghut ri. 43 Haû mù luî, Yesuq é yánmai, shiwa byu pé gi, gàm hkoq ló byùq bekô nghut ri. 44 Ra-am gi, Yhang lé chyup yù nau bùm kôlhang, Yhang lé lòq a záng kó nghut ri.
Yudaq Byu Pé Lé Shuî Û É Bang A Lùmjíng Kô É Hkyô
45 Hau htâng má, haû noqkuq yhûm zúng bang gi, haû hkyangjong agyi pé eq Hparishe pê chyáng taû ló kô é hkûn, haú bang gi, yhángmòq lé, “Núngmòq, haî mù luî, Yhang lé a shuî lò kô é lhú?” ga lhom myî akô.
46 Haú hkûn, haû noqkuq yhûm zúng bang gi, “Shí yùq su ga taî é byù gi, ó le a nyi wú é nghut lhê.” ga taî kyô akô.
47 Haû mù, haû Hparishe pé gi, “Núngmòq lé le, Yhâng èq mhoq hpyoq yù bekô lhú? 48 Haû zaú wui chyáng le, Hparishe pê chyáng le, Yhang lé lùmjíng é byù bo akô lhú? 49 A bò! Nghut kôlhang, haû jep é târâ lé a sê é byù mòqmó shî gi, nhîng pyâm é hui bekô nghut ri.” ga nhik-yô é dông tû taî kat akô nghut ri.
50 Nghut kôlhang, yhángmòq hpúng má bo é, hí hkûn Yesuq chyáng e wú bê sû nghut é, Nikodimu gi, 51 “Ngá-nhûng é târâ gi, byù rayùq lé, yhâng é dang hí a gyô wú é eq, yhang haî kut é lé a sê é za, mara byi lhê lhú?” ga, yhángmòq lé myî ri.
52 Haú hkûn, yhángmòq gi, “Nàng le, Galile mau byù nghut lhê lhú? Galile mau mai myìqhtoi rayùq lháng a htoq é hkyô lé, nàng gôn wú àq, haû jáng sé râ nghut lhê.” ga tû taî akô.
53 Hau htâng, yùq hkangmó gi, ó le ô yhûm shut taû ló byùq bùm bekô nghut ri.a