9
Hau htâng, Yesuq gi, yhángmòq lé, “Ngò, núngmòq lé teng za taí kôlé, shí má yàp tô é bang ra-am gi, Garai Gasâng é mîngdán, hpungwup a-tsâm èq jé lé lo é lé, a myang é za shî kôrâ a nghut.” ga taî ri.Yesuq É Ihpyô Isâm Htaî Lo É Hkyô
2 Hkyuq nyí laî htâng má, Yesuq gi, Petiruq lé le, Yakuq eq Yohan lé le, shuî chûng mù, yhángmòq baú myhang é bùm ralhum má dòq ló akô; haú hkûn, yhángmòq é myòq hí tê má, Yesuq é ihpyô isâm htaî lo ri. 3 Hau htoq agó, Yhâng é mèbu gi, wìk wìk dùq hpyu zan lo ri; myìdàm htoq má, ó yùq le haû í hpyû shoq a wó xaû hpyu wú é nghut lhê. 4 Eliya eq Mosheq gi, yhángmòq é hí má htoq shit mù, Yesuq eq dáng nyo lhûm nyi akô.
5 Haû mù, Petiruq gi, Yesuq lé, “Rabai ê, shí jowò má ngá-nhúng nyi le ge ri; haû mù, Náng é matú ralhum, Mosheq é matú ralhum, Eliya é matú ralhum kut, ngá-mòq lé, zúm sûm lhum saí nhâng laq.” ga taî ri. 6 Hkâsu mù gâ le, yhángmòq gi, gyai yhang gyùq dan bùm kô é yánmai, Petiruq gi, haî taí râ le a sé mù, haû su gâ é nghut ri.
7 Hau htâng, mhut htoq lô luî, yhángmòq lé htup zíng lô mù, mhut hkaû mai htoq lo é htê gi, “Shí yùq gi, Ngò chyitdàp é Ngá zo nghut lhê; Yhâng é dang gyo keq.” gâ ri.
8 Haú hkûn jáng, chángzô pé gi, lhînghkyùq má wú kat le, Yesuq za yhángmòq eq rahá nghut nyi é mai lai luî, ó lé le, a myàng lo kó nghut ri.
9 Yhángmòq, bùm mai taû gyó lô kô é hkûn, Yesuq gi, haû Byu Yhangzo shi é mai a dum dui toq toq gi, yhángmòq myang é hkyô lé, ó lé le a taî kyo râ matú taî hkûm tô ri. 10 Chángzô pé gi, dang haú lé myìt má kat to kôluî, “Shi é mai dum dui toq râ.” gâ é lichyúm lé, rayùq eq rayùq myî lhûm bum akô nghut ri.
11 Hau htâng, yhángmòq gi, “Eliya hí lé ra râ nghut lhê ga, târâ sará pé haî mù taí kô é lhú?” ga, Yesuq lé myî akô.
12 Haú hkûn, Yesuq gi, “Eliya hí jé lé é gi, teng bê nghut luî, lhúnglháng lé dum lajâng tô é nghut ri. Nghut kôlhang, haû Byu Yhangzo gi, myo myo hpuzo luî, he-ngìk pyâm é hui râ nghut lhê ga le, Chyúmdang má kâ tô ashî, a nghut kó lhú? 13 Ngò, núngmòq lé taí kôlé, Eliya gi, jé lé bê nghut mù, yhang eq séng luî Chyúmdang má kâ tô é eq rajung za, yhángmòq gi, ô nau é dông bànshoq kut bekô nghut ri.” ga tû taî ri.
Nàt Dàp É Yùqgè Zo Rayùq Lé Lhoqgê Byî É Hkyô
14 Yhángmòq gi, chángzô pê chyáng dum taû jé lô kô é hkûn, haú bâng é lhînghkyùq má byù mòqmó zîng lé é lé le, târâ sará pé, haú bang eq dang htíng htîng lhûm nyì kô é lé le, myang akô. 15 Haú má nyi tô é lhúnglhâng bang gi, Yesuq lé myang kat é eq, maú byùq kôluî, din ê mù, ê shi-kyâm akô nghut ri.
16 Haú hkûn, Yesuq gi, yhángmòq lé, “Núngmòq gi, yhángmòq eq haî lé dang htíng htîng lhûm nyi akô lhú?” ga myî ri.
17 Byù hpúng hkaû mâ é rayùq tû taî kat é gi, “Sará ê! Nhut jìt nhang é nàt wang júng tô é ngá é yùqzo lé, Náng chyáng shuî lé lo lhê. 18 Nàt haû gi, yhâng chyáng wàng hkangmó, yhang lé myì htoq má lèqbàt nhang ri; haû mù, yhang gi, nhut mai gùttsû htoq lhê, zuì kyik kyik lhê, lânghtan lo lhê, dùt ri; hau é yánmai, nàt haú lé hkat htoq pyám byi râ matú, Náng é chángzô pé lé dûng wú kôlhang, yhángmòq a wó dùt kó nghut ri.” gâ ri.
19 Haú hkûn, Yesuq gi, “Lùmjíng myìt a bo é a-myû pé ê, Ngò gi, hkâ-myháng jé shoq núngmòq eq rahá nyì mù, wó jân nyì râ lhú? Yùqgè zo haú lé, Ngá chyáng shuî lé lô keq.” ga taî kat ri.
20 Haû mù, yhángmòq gi, yùqgè zo haû lé shuî lé lo akô; nàt haû gi, Yesuq lé myang kat é eq yhang, yùqgè zo haû lé lânghtân nhang ri; yùqgè zo haû gi, myigùng má lêng lèq luî goleng leng mù, nhut mai tsû-myup htoq nyi ri.
21 Haú hkûn, Yesuq gi, yhâng wa lé, “Yhang, îsu dùt é hkâ-myháng myáng bê lhú?” ga myi jáng, yhâng wa gi, “Zoshâng hkûn mai nghut bê. 22 Nàt haû gi, yhang lé lhoqsat pyám naû mù, myi má le, wuì má le, a-num num lêng wàng nhang wú bê nghut lhê; nghut kôlhang, Nàng, rajung jung wó kut byî é nghut le gi, ngáhpe lé shogyo yù laq, garúm yû laq.” ga tû taî ri.
23 Yesuq gi, “‘Nàng, wó kut byî é nghut le gi,’ nghû, haî mù taî lhê lhú? Lùmjíng myìt bò su é matú gi, haî le wó dùt lhê.” ga, yhang lé taî ri.
24 Haû zôshang é yhâng wa gi, radá dâm, “Ngò lùmjíng lhê; nghut kôlhang, ngá é lùmjíng myìt gi, shaû ashî nghut é yánmai garúm yû laq.” ga taî garû ri.
25 Yesuq gi, byù hpúng din zîng lé lô kô é lé, myàng jáng, haû agè ashop é nàt lé, “Nojit, nhutjìt nhang é nàt ê! Ngò, nang lé hkunmó hkyô lhê, yhâng chyáng mai htoq ló aq; hkâ-nhám le, yhâng chyáng hkâdum wàng lo.” ga tân kat ri.
26 Haú hkûn, nàt haû gi, garu mù, zoshâng haû lé wum kat lânghtân nhâng luî, htoq ló byùq bê. Zoshâng haû gi, shî màng gùng su dùt byùq é yánmai, byù myo myo gi, “Yhang shî bê nghut ri.” ga taî akô. 27 Nghut kôlhang, Yesuq gi, zôshang é lòq má zui luî, tu toq kat ri; haû mù, zoshâng gi, yàp to bê nghut ri.
28 Yesuq, yhúmhkaû má wang ló é htâng, Yhâng é chángzô pé gi, “Ngá-mòq gi, haî mù, nàt haû lé a wó hkat htoq é lhú?” ga, tsik za Yhang lé myî akô.
29 Yesuq gi, “Haú jung nàt lé gi, kyûdûng é dông za a nghut jáng, wó hkat htoq râ a nghut.” ga, yhángmòq lé tû taî ri.
30 Yhángmòq gi, haú jowò mai htoq ló mù, Galile mau mai laî ló akô; nghut kôlhang, Yesuq gi, ó lé le a sé nhâng naù nghut ri. 31 Haî mù gâ le, Yhang gi, “Haû Byu Yhangzo gi, byu pê é lòq má àp pyâm é hui râ nghut lhê; haú bang gi, Yhang lé sat pyám kôrâ nghut lhê; nghut kôlhang, Yhang gi, shi é htâng sum nyí nghû râ nyí má, dum dui toq râ nghut lhê.” ga, Yhâng é chángzô pé lé mhoqshit byî nyi é yánmai nghut ri. 32 Yhâng é chángzô pé gi, dang haú lé a sê gyo kôlhang, Yhâng chyáng a wám myi kó nghut ri.
Kô Dik Sû Gi, Ó Yùq Nghut Lhê Lhú?
33 Yhángmòq gi, Kaperina‑um wà má jé e akô nghut ri. Yesuq gi, yhúmhkaû má nyi tô é hkûn, chángzô pé lé, “Hkyô má, núngmòq, hai hkyô lé dang chyin chyîn lhum kô é lhú?” ga myî ri. 34 Nghut kôlhang, yhángmòq gi, zim za nyi tô akô; hkâsu mù gâ le, kô dik sû gi, ó yùq nghut lhê nghu é hkyô lé, hkyôlat má, yhángmòq dang chyin chyîn lhum kô é yánmai nghut ri.
35 Yesuq gi, zùng mù, haû chángzo raxe í yùq lé, wùt yù luî, “Kô dik naû sû ó yùq nghut kôle, tiq dik sû eq bànshoq bâng é duìnhâng zoshâng dùt ra râ nghut lhê.” ga taî ri.
36 Hau htâng, Yhang gi, zoshâng rayùq lé shuî yù mù, yhángmòq é gung gûng má shap to luî, dum bún yù mù, yhángmòq lé taî é gi, 37 “Shî sû é zoshâng lé, Ngá é myìng mai hàp yu é sû ó yùq nghut kôle, Ngo lé hàp yu é sû nghut bê; Ngo lé hàp yu é sû ó yùq nghut kôle, Ngo lé za hàp yu é a nghut, Ngo lé nhang kat é Sû lé hàp yu é le nghut lhê.” gâ ri.
Ngá-nhúng Lé Gyè A Kut É Sû Gi, Ngá-nhûng É Hkyam Shut Nghut Lhê Gâ É Hkyô
38 Haú hkûn, Yohan gi, “Sará ê! Náng é myìng lang luî, nàt gâng pé lé hkat pyám byî wún é byù rayùq lé, ngá-mòq myang ri. Yhang gi, ngá-nhûng chyáng a lòm sû nghut é yánmai, yhang lé ngá-mòq hkûm pyâm é nghut lhê.” ga taî ri.
39 Yesuq kúm gi, “Yhang lé hkâhkúm kó; Ngá myîng lé lang luî, làklaí alhô agàn kut é sû gi, razùp za má, Ngò eq séng luî, a ge é hkyô pé lé taí râ a nghut; 40 Hkâsu mù gâ le, ngá-nhúng lé gyè a kut é sû gi, ngá-nhûng é hkyam shut nghut lhê. 41 Ngò, núngmòq lé teng za taí kôlé, núngmòq gi, Hkrisidùq eq sêng é bang nghut lhê gâ é yánmai, ngá é myìng lé lang luî, núngmòq lé, ûchyam ragòm byi huq é sû ó yùq nghut kôle, zuihpau lé hkyak myang hkam yù râ za nghut lhê.
Mara Shut Nhang É Hkyô
42 Ngo lé lùmjíng é zoshâng wuì mâ é rayùq lé, mara kut shut nhang é sû gi, yhâng é lìngzing má lùqluí long mó tuî hut byi luî, wuimau má ê dú hkyó pyâm é huî é nghut le gi, yhâng é matú je gè râ nghut lhê. 43 Náng é lòq èq, nang lé mara kut shut nhang é nghut le gi, haú lé hpyit dú pyám aq; lòq í lòq dàp luî, hkâ-nhám le, myiduq a dàt shum é ngaraî ming wàng râ htoq má, lòq ralòq eq za ahtum abyùq é chyungxe wó râ shut wàng le gi, náng é matú je ge ri. 44 (Haû ngaraî ming gi, ‘yhángmòq lé hkê nyi é lùq le a shî, myiduq le a shûm’ dùt é jowò nghut lhê.)a 45 Náng é hkyi èq, nang lé mara kut shut nhang é nghut le gi, haû lé hpyit dú pyám aq; hkyî í hkyî dàp luî, hkâ-nhám le, myiduq a dàt shum é ngaraî ming má dú hkyô pyâm é hui râ htoq má, hkyî rahkyî za dàp luî, ahtum abyùq é chyungxe wó râ shut wang le gi, náng é matú je ge ri. 46 (Haû ngaraî ming gi, ‘yhángmòq lé hkê nyi é lùq le a shî, myiduq le a shûm’ dùt é jowò nghut lhê.) 47 Náng é myòqjí èq, nang lé mara kut shut nhang é nghut le gi, haû lé làp choq pyám aq; myòqjí í jí dàp gû, ngaraî ming má dú hkyô pyâm é hui râ htoq má, myòqjí rají eq za, Garai Gasâng é mîngdán má wang le gi, náng é matú je ge ri.
48 (Haû ngaraî ming gi, ‘yhángmòq lé hkê nyi é lùq le a shî, myiduq le a shûm’ dùt é jowò nghut lhê.)b
49 Hkâsu mù gâ le, hkungga sho lé xo kat luî lhoq sansêng é su, myi gi, yùq hkangmó lé lhoq sanséng râ nghut lhê.c
50 Xo gi, ge lhê. Nghut kôlhang, xomân kân byùq jáng gi, hkâsu kut dum wó lhoqngam yù râ lhú? Núngmòq gi, xo su ngam nyì mù, rayùq eq rayùq nguì ngón nyî keq.” ga taî ri.