Lagyo Raxe Í Yùq Lé Nhang Htoq Kat É Hkyô
9
Yesuq gi, haû lagyo raxe í yùq lé wùt yù mù, nàt gang bànshoq lé wó hkat htoq pyám râ matú eq, nòlì nòjàng wó lhoqgê râ matú, yhángmòq lé wum-o a-tsam eq ahko ahkáng byî ri. 2 Hau htâng má, Garai Gasâng é mîngdán hkyô hko kyo râ eq, nòhpyo lhoqgê byi râ matú nhang htoq kat ri. 3 Yesuq gi, yhángmòq lé, “Hkyôwui é matú, dumbáng, e-tap, zoshuq, ngùn eq, bu htaí lháng hkâwûn hkâchûng kó. 4 Núngmòq hká yhûm má wàng kôlhang, haú wâ mai dum htoq ló é buìnyì jé shoq, haú yhûm má za nyi nyî keq. 5 Núngmòq lé a lhom hàp yu é bang lé gi, yhángmòq é wà mai htoq ló é hkûn, núngmòq lé a lhom hàp yu é sàksé dùt sháng gàq, núngmòq é hkyîwa má dàp é hpuílhaû lé yhángmòq é myòq hí má ko hkyô pyâm to keq.” ga taî kat ri. 6 Haû mù, yhángmòq gi, htoq e ló luî, wà hkang wà mó má haû gabú danglù hko kyo uchyang, hká jé hká má nòhpyo lhoqgê byî wún akô.Herot Maú Uq-ô É Hkyô
7 Haû su dùt é hkyô bànshoq lé, mau zau Herot wó gyô yù luî myìt wuî nyi ri. Hkâsu mù gâ le, ra-am gi, Yohan shi é mai dum dui toq lô bê ga, 8 ra-am gi, Eliya dum nyi htoq lo ri ga, haû mai, ra-am gi, hí hpyang lhê é myìqhtoi rayùq yùq dum dui toq lô bê ga luî, taî bùm kô é yánmai nghut ri. 9 Herot gi, “Yohan é ulhum lé, ngò hpyit pyám nhâng bê, nghut kôlhang, shî í wá taî byông bùm kô é gi, ó wá nghut lhê lhú?” ga luî, Yesuq lé myàng shoq ga ho nyi ri.
Byù Ngo Hkyîng Lé Yesuq Zoshuq Byi Tsô É Hkyô
10 Lagyô pé dum taû lo é hkûn, yhángmòq kut laî lo é hkyô pé, Yesuq lé taî kyô akô. Haú hkûn, Yesuq gi, yhángmòq lé shuî chûng mù, Bet‑saida gâ é wà mó shut tsik za e ló byùq ri. 11 Shiwa byu pé gi, haú hkyô lé châng sé kômù, Yhâng htâng châng e ló akô. Yesuq le yhángmòq lé lhom hàp yù mù, Garai Gasâng é mîngdán hkyô lé taî kyo luî, nòhpyo gè naù bang lé, lhoqgê byî ri.
12 Buìgyùm zó má, lagyo raxe í yùq gi, Yhâng chyáng huî ê mù, “Haû shiwa byu pé lé, awui ayàm mâ é yhûm pé eq wà pé má ló mù, zoshuq hô zo luî ló yhup kó sháng gàq, ló nhâng àq. Hkâsu mù gâ le, ahkuî ngá-nhúng gi, yòso má nghut nyi ri.” ga luî, Yhang lé taî akô.
13 Haú hkûn, Yesuq gi, “Núngmòq, yhángmòq lé rajung jung byi tso keq.” ga tû taî ri.
Yhángmòq gi, “Shî myhô bang lé tso râ zoshuq a é wui le gi, ngá-mòq chyáng mùk-yó mùk ngo long eq ngozo í du mai lai luî, haî le a wó nghut ri.” ga taî akô. (Hkâsu mù gâ le, yùqgè wuì baú lháng ngo hkyîng kô nghut ri.)
14 Nghut kôlhang, Yesuq gi, “Shí bang lé rahpúng má ngo xê xê kô kut luî, zùng nhang to keq.” ga luî, Yhâng é chángzô pé lé taî ri. 15 Yhángmòq lé Yesuq taî é eq rajung za, bànshoq bang lé zùng nhang to bekô. 16 Haú hkûn, Yesuq gi, haû mùk ngo long eq ngozo í du lé yù mù, mauhkûng shut tu wú to luî, jeju ban hkya-on jáng, haú lé ajàp jàp hpé luî, shiwa byu pé lé, châng to byi râ matú, Yhâng é chángzô pé lé byî kat ri. 17 Haú hkûn, yhángmòq bànshoq bang zô gyî bùm kô é htâng má, haû chángzô pé gi, zô myhit tô é pé lé, raxe í mung byíng shoq wó gùq tsîng yu ashî kô nghut ri.
Yesuq Gi, Hkrisidùq Nghut Lhê Ga Petiruq Taî É Hkyô
18 Radàm lé, Yesuq gi, Yhang baú kyûdûng nyi é hkûn, chángzô pé le, Yhang eq rahá nghut akô. Hau htâng, Yhang gi, yhángmòq lé, “Shiwa byu pé gi, ngo lé ó yùq nghut lhê ga, taî akô lhú?” ga myî ri.
19 “Ra-am gi, Wuìmyhup Sará Yohan ga; góbang gi, Eliya ga; dum ra-am gi, hí hpyang lhê é myìqhtoi rayùq yùq dum dui toq lo é nghut ri ga, taî akô.” ga luî, yhángmòq tû taî akô.
20 Dum, Yhang gi, yhángmòq lé, “Nghut kôlhang, núngmòq gi, ngo lé ó yùq nghut lhê nghu akô lhú?” ga myî ri.
Haú hkûn, Petiruq gi, “Nàng gi, Garai Gasang nhâng byî é Hkrisidùq nghut ri.” ga tû taî ri.
21 Shí hkyô ó lé le a taî kyo sháng gàq ga, Yesuq, yhángmòq lé taî hkûm pyâm ri. 22 Haû mù, Yhang gi, “Haû Byu Yhangzo gi, zing-rî é myo myo hui zo luî, sûwún wuî, hkyangjong agyi pé, târâ sará pê èq he-ngìk pyâm é hui mù, sat pyâm é hui ra râ nghut lhê, hau htâng sum nyí nghû râ buìnyì má, lhoqtoq yu é hui râ nghut lhê.” ga taî ri.
23 Hau htâng, bànshoq bang lé Yhang dum xoq taî é gi, “Ngá htâng cháng naû sû ó yùq nghut kôle, yhûmsing gùng yhûmsîng he-ngìk pyám mù, nyí wuî yhûmsing é tapzîng lé wàq chûnga luî, cháng ra râ nghut lhê. 24 Hkâsu mù gâ le, yhûmsing é chyungxe lé hkyi yù naù sû ó yùq nghut kôle, chyungxe sum râ nghut lhê; nghut kôlhang, Ngá é yánmai, yhûmsing é chyungxe sûm pyâm é sû kúm gi, chyungxe hkyi yu é hui râ nghut lhê. 25 Byù gi, mingkan gón lé wó sing to kôlhang, yhûmsing é chyungxe sô sûm byùq é nghut le gi, yhâng é matú, haî a-kyû bò râ lhú? 26 Ngò eq Ngá é dang lé, lhom hàp yù râ lé hoq é sû ó yùq lé le, haû Byu Yhangzo gi, yhûmsing é hpungwup shingkang eq, Yhâng Wâ é hpungwup shingkang, haû chyoiyúng maumang lagyô pê é hpungwup shingkâng èq jé lé é hkûn, hoq pyám râ nghut lhê. 27 Ngò, núngmòq lé teng za taí kôlé, shí má yàp tô é bang ra-am gi, Garai Gasâng é mîngdán lé a myang é za shî kôrâ a nghut.” gâ ri.
Mosheq Eq Eliya Yesuq Lé Huî Nyo É Hkyô
28 Dang haû taî é htâng, shit nyí kô nghut jáng, Yhang gi, kyûdung râ ga Petiruq, Yohan, Yakuq pé lé shuî chûng mù, bùm shut dòq ló ri. 29 Kyû dûng nyì le, Yesuq é myòqdong gi, ihpyô isâm htaî lò mù, Yhâng é mèbu gi, lhap su dùq bang lo ri. 30 Haú hkûn, wú keq, Mosheq eq Eliya gi, hpungwup shingkang eq htoq lé lô luî, Yesuq eq dáng nyo lhûm nyi akô. 31 Yhángmòq gi, Garai Gasang myìt tô é hkyô Yerusalem wà mó má Yesuq shî hkâm é dông mai dìk lò râ nghut é hkyô lé taî lhûm nyi akô. 32 Petiruq eq yhâng luzúm nhik gi, yhupmui nyi akô; nghut kôlhang, yhángmòq bûn lo é hkûn lé, Yesuq é hpungwup shingkang lé le, Yhang eq rahá yàp to su nhik lé le, myang kat akô. 33 Haú nhik Yesuq chyáng mai gâng ló nyi é hkûn, Petiruq gi, Yesuq lé, “Yhûmsîng ê, shí jowò má ngá-nhúng nyi le ge ri, haû mù, Nàng é matú ralhum, Mosheq é matú ralhum, Eliya é matú ralhum kut, ngá-mòq lé, zúm sûm lhum saí nhâng làq.” ga taî kat kôlhang, yhang haî taî nyi é lé, yhang a sé.
34 Petiruq dang taî nyi ashî hkûn lé, mhut jé mù, yhángmòq lé htup zíng lo nyi ri. Mhut haû htup lo nyi é yánmai, yhángmòq gi, gyùq byùq akô. 35 Haû mhut hkaû mai htoq lo é htê gi, “Shí yùq gi, Ngá zo nghut lhê; Ngò hkyin yu é Sû le nghut lhê; Yhâng é dang gyo keq.” gâ ri. 36 Dang htê haû zim jáng, Yesuq yhang baú nyi tô é lé, yhángmòq myang akô. Yhángmòq myang é hkyô lé, buìnyì haú bun haú yòq má, ó lé le a taî kyô é zim za nyi byùq akô.
Nàt Gang Dàp É Yùqgè Zo Rayùq Lé Lhoqgê Byî É Hkyô
37 Hau htang nyí, yhángmòq bùm haû mai gyó ló kô le, byù mòqmó gi, Yesuq lé lhom te yu akô. 38 Haú hkûn, byù hpúng haú mâ é byù rayùq wùt garû htoq ló é gi, 39 “Sará ê, wú aq, ngá é zo te yùqzo gi, nàt wang júng mù dàn so dàn lòq garû lo lhê, gùttsû gi, agùt gùt dùt shoq lânghtân nhang lo lhê kut mù, nàt gi, yhang lé gyai myáng shoq zing-rî yù yù kut nyi ri. 40 Nàt haú lé hkat pyám byi kó laq nghû luî, Náng é chángzô pé lé ngò dûng wú kôlhang, yhángmòq a wó hkat pyám byi kó. Haû mù, ngá zo lé lhoqgê byi râ matú, ngò gi, nang lé gyai myìt lum é eq dûng kat lhê.” gâ ri.
41 Haû mù luî, Yesuq gi, “Lùmjíng myìt a bo é eq agè ashop é a-myû pé ê, Ngò gi, hkâ-myháng jé shoq núngmòq eq rahá nyì mù, wó jân nyì râ lhú? Nungzo lé, shí shut shuî lé lô àq.” ga tû taî ri.
42 Zoshâng haû, lé lo nyi le lháng, nàt gang gi, yhang lé lhoqlhêng to mù lânghtân nhang ashî. Yesuq kúm gi, haû agè ashop é nàt lé tân kat luî, zoshâng haú lé lhoqgê byi mù, yhâng wa lé dum àp byî ri. 43 Nyì mî-nyì gi, Garai Gasâng é kô dik é hpungwup a-tsam lé maú hong nyi bum akô.
Lhúnglhâng bang gi, Yesuq kut é múzó haú lé maú nyi bùm kô le, Yesuq gi,
44 “Haû Byu Yhangzo gi, byu pê é lòq má àp pyâm é hui zo râ nghut lhê. Dang shí hkun lé núngmòq é no má rago gyô wun to keq.” ga luî, chángzô pé lé taî ri. 45 Yhángmòq kúm gi, dang haú lé a sê gyo kó, hkâsu mù gâ le, haû gi, yhángmòq é matú a sê gyo sháng gàq ga luî, nghop tô ashî yánmai nghut ri. Dang hau é lichyúm lé, Yesuq chyáng yhángmòq a wám myi kó nghut ri.
Ó Yùq Gi, Kô Dik Sû Nghut Râ Lhú?
46 Hau htâng, lagyô pé gi, hká yùq shèq, kô dik sû nghut lhê lhú ga, rayùq eq rayùq taî myíng myô lhûm nyi akô. 47 Yesuq kúm gi, yhángmòq é ûnghkaû má myìt nyi é hkyô lé sé byi luî, zoshâng rayùq lé shuî yù mù, Yhâng nàm má shap to luî, 48 “Shî zoshâng lé Ngá é myìng mai hàp yù sû ó yùq nghut kôle, Ngo lé hàp yu é sû nghut bê; Ngo lé hàp yù sû ó yùq nghut kôle, haû Ngo lé nhang kat é Sû lé hàp yu é le nghut lhê. Haû mù luî, núngmòq bànshoq má, je tiq sû gi, je ko sû nghut lhê.” ga luî, yhángmòq lé taî ri.
49 Haú hkûn, Yohan gi, “Yhûmsîng ê, Náng é myìng lang luî, nàt gâng pé lé hkat pyám byî wún é byù rayùq lé, ngá-mòq myang ri. Yhang gi, ngá-mòq chyáng a lòm sû nghut é yánmai, yhang lé ngá-mòq hkûm pyâm é nghut lhê.” ga taî ri.
50 Yesuq kúm gi, “Yhang lé hkâhkúm kó, núngmòq é gyè hkyam shut a nyì sû gi, núngmòq é hkyam shut nyì sû nghut lhê.” ga luî, yhang lé taî ri.
Samariq Wà Bang Yesuq Lé A Lhom Hàp Yu É Hkyô
51 Ahkuî, Yesuq gi, Yhang lé mauhkûng shut shuî toq yû râ buìnyì chyâng lò bê nghut mù, Yerusalem wà mó shut ê râ lé myìt hpyit to luî, Yhâng é hí má lagyo nhang kat ri. 52 Lagyo haú bang gi, Yhâng matú râ é hkyô lajang láng râ ga, Samariq wà rawà má wang ló akô. 53 Nghut kôlhang, Yesuq gi, Yerusalem wà mó shut laî e ló é sû nghut é yánmai, haú wâ bang gi, Yhang lé a lhom hàp yù kó. 54 Haú hkûn, lagyo Yakuq eq Yohan nhik gi, haú lé myàng jáng, “Yhûmsîng ê, yhángmòq lé lhoqhtên pyám râ matú, ngá-nhik mauhkûng mai myi wùt hkyô le, a gè lhú?” ga luî, Yesuq lé myî akô. 55 Yhang kúm gi, lhing wú luî yhángnhik lé, tân pyâm ri, 56 haû mù luî, yhángmòq gi, gówâ shut e ló byùq akô.
Yesuq É Htâng, Hkâsu Kut Cháng Râ Hkyô
57 Yhángmòq haú hkyô má e ló kô le, byù rayùq gi, “Nàng hká e le hká ngò cháng râ.” ga luî, Yesuq lé taî ri.
58 Yesuq gi, haú yùq lé, “Wàmhkuî pé gi, hkyûng wó akô, nghoq pé le, nghoqsut wó akô. Nghut kôlhang, haû Byu Yhangzo gi, ulhum to jang lháng a wó é nghut ri.” ga taî pyám ri.
59 Dum rayùq lé, “Ngá htâng cháng aq.” ga taí jáng, haú yùq gi, “Yhûmsîng ê, ngá wa lé, ló yhûm pyám râ ahkáng hí byi shilaq.” ga taî ri.
60 Yesuq gi, yhang lé, “Shî bê bangb gi, shî bê bang yhangchang yhûm lhum kó sháng gàq; nghut kôlhang, nàng gi, Garai Gasâng é mîngdán hkyô lé, ê hko kyo aq.” ga taî ri.
61 Byù rayùq dum, Yhang lé, “Yhûmsîng ê, ngò le náng htâng cháng râ, nghut kôlhang, ngá yhûmbyù lé hí hkyang ló shit to râ ahkáng byi shilaq.” ga taî ri.
62 Yesuq gi, “Yò hpuq li zui mù htâng shut lhing wú sû ó yùq nghut kôlhang, Garai Gasâng é mîngdán eq a gíngdán.” ga luî, yhang lé taî ri.