Kô Dik Sû Gi, Ó Yùq Nghut Lhê Lhú?
18
Haú hkûn, haû chángzô pé gi, Yesuq chyáng lé jé kômù, “Mauhkûng mîngdán má, kô dik sû gi, ó yùq nghut lhê lhú?” ga myî akô.2 Yesuq gi, zoshâng zo rayùq lé wùt yù mù, yhángmòq é gung gûng má shap to luî, 3 taî é gi, “Ngò, núngmòq lé teng za taí kôlé, núngmòq gi, myìt htaî lhik luî, zoshâng zo wuî su dùt kô é za a nghut jáng, mauhkûng mîngdán má hkâ-nhám le wó wâng kôrâ a nghut. 4 Haû mù, zoshâng zo shí yùq su, yhûmsing é i‑myìt wó lhoqnyhum é sû ó yùq nghut kôle, mauhkûng mîngdán má, kô dik sû nghut ri.
5 Shî sû é zoshâng lé, Ngá é myìng mai hàp yu é sû ó yùq nghut kôle, Ngo lé hàp yu é sû nghut bê. 6 Nghut kôlhang, Ngo lé lùmjíng é zoshâng wuì mâ é rayùq yùq lé, mara kut shut nhang é sû gi, yhâng é lìngzing má lùqluí long mó tuî lhang byi luî, nìk é wuimau má, dú hkyô pyâm é huî é nghut le gi, yhâng é matú je gè râ nghut lhê.
7 Haû mingkan gi, byu pé lé mara kut shut nhâng jang jòq é yánmai, dingnyé wó ri. Haû mara kut shut nhâng hkyô gi, htoq lûgù bê; nghut kôlhang, haú lé lhoqhtoq sû gi, dingnyé wó ri. 8 Náng é lòq èq, a nghut jáng, náng é hkyi èq, nang lé mara kut shut nhang é nghut le gi, haú lé hpyit dú pyám aq. Ahtum abyùq é myi má, hkyî hkúm lòq hkúm gû dú hkyô pyâm é hui râ htoq má, hkyî lòq a hkûm é za, chyungxe wó yu é nghut le gi, náng é matú je ge ri. 9 Náng é myòqjí èq, nang lé mara kut shut nhang é nghut le gi, haú lé làp choq yû mù, dú pyám aq; myòqjí í jí dàp gû ngaraî myi má dú hkyô pyâm é hui râ htoq má, myòq rají eq za, chyungxe wó yu é nghut le gi, náng é matú je ge ri.
Byùq Byùq É Sau
10 Shî sû é zoshâng zo wuî mâ é rayùq lé lháng a wú tiq râ matú, sidìq nyì keq. Hkâsu mù gâ le, Ngò, núngmòq lé taí kôlé, mauhkûng mâ é yhángmòq é maumang lagyô pé gi, mauhkûng htoq mâ é Ngá wâ é myòqdong lé, hkâ-nhám le myang nyi akô. 11 (Hkâsu mù gâ le, haû Byu Yhangzo gi, byùq byùq bê bang lé hkyi yù râ matú, jé lé é nghut lhê.)a
12 Byù rayùq gi, sau rashô du wó é nghû sháng, sau haú gû mâ é radu byùq byùq é nghut jáng, haû gaú xe gaû du lé, bùm pé má nyhi pyâm to luî, byùq byùq é sau lé a châng ho é nyì râ lhú? Haú lé, núngmòq hkâsu wó myìt ngam akô lhú? 13 Ngò, núngmòq lé teng za taí kôlé, yhang gi, haû byùq byùq é sau haú lé myang ho é hkûn, a lám byùq é sau gaú xe gaû dû é matú gabú é htoq má, haú dû matú je riyhang gabú ri. 14 Haû eq rajung za, mauhkûng htoq mâ é núngmòq é Îwa gi, shî tiq bang mâ é rayùq htên byòq byùq râ lé lháng, ô nau é a nghut.
Mara Kut Shut É Gu-mang Hpó Lé Hkâsu Kut Râ Hkyô
15 Náng é gu-mang hpó, nang lé mara kut shut é nghut jáng, yhâng chyáng ê mù, núngnhik baú za nghut é hkûn, yhâng é mara lé tûn shit àq. Yhang, náng é dang lé gyô é nghut jáng, nàng gi, gu-mang rayùq dum wó bê nghut ri. 16 Nghut kôlhang, yhang, náng é dang lé a gyô é nghut jáng, ‘Mara hun é hkyô hkangmó lé, sàksé í yùq sum yuq lòm jáng, wó lhoqteng sháng gàq.’b gâ tô é eq rajung za, nàng, gótû byù ra‑í yùq lé shuî chûng àq. 17 Yhang gi, haú bâng é dang lé le a lhom yu é nghut jáng, haú hkyô lé, noqkuq hpúng má shit kyo aq; hpûng é dang lé le a gyô é nghut jáng, yhang lé, a lùmjíng é byù rayùq dông le, hkán hkyuî sû rayùq dông le sôn pyám aq.
18 Ngò, núngmòq lé teng za taí kôlé, myigùng htoq má, núngmòq tuî to má tuî to lé, mauhkûng htoq má le, tuî to râ nghut lhê; myigùng htoq má, núngmòq lhoqlhut má lhoqlhut lé, mauhkûng htoq má le, lhoqlhut byi râ nghut lhê.
19 Ngò, núngmòq lé dum taí kôlé, myigùng htoq má, núngmòq mâ é í yùq myìt hui luî, haî lé dung kôlhang, mauhkûng htoq mâ é Ngá wa gi, haú nhik lé gyo byi râ nghut lhê. 20 Hkâsu mù gâ le, Ngá myîng lé lang luî, í yùq sum yuq zùp zîng é jang hká má nghut kôlhang, haú bâng é gyoro má Ngò nyi lhê.” gâ ri.
Shogyo Nhikmyin A Sê É Jùn Hpô É Dangtú
21 Haú hkûn, Petiruq gi, Yesuq chyáng huî ê mù, “Yhûmsîng ê, ngá é gu-mang, ngo lé mara kut shut é nghut le, yhang lé hkâ-myhó dâm mara hkyut byi ra râ lhú? Nyhit dâm jé shoq hkyut byi ra râ lhí?” ga myî ri.
22 Haû jáng, Yesuq tû taî é gi, “Ngò, nang lé taí lé, nyhit dâm za a nghut, nyhit xe nyhit tú dâm hkyut byi râ lhê.
23 Mauhkûng mîngdán gi, yhûmsing é duìnhâng zoshâng wui é jihpán lé jep nau é hkóhkâm rayùq eq du ri. 24 Yhang gi, jihpán lé jep hi ló é u lé, yhâng chyáng ngùn wan myo myo chyîn dap to sû lé shuî lé lo akô. 25 Haû yhûmsîng hpó gi, haú yùq chyîn a wó xap é yánmai, chyîn wó yû râ matú, yhang lé le, yhang myi lé le, yhang zo bànshoq eq yhang wó é zèhkoq bànshoq lé le, ûng pyám râ hkunmó hkyô kat ri.
26 Haû mù, duìnhâng zoshâng haú yùq gi, yhâng é hí má hkyîhput htuq luî, ‘Ngo lé myìt hîng byi shilaq; bànshoq lé, ngò xap râ.’ ga dûng tôngbán ri. 27 Haû duìnhâng zôshang é yhûmsîng hpó gi, haú yùq lé wú shogyo luî, chyîn bànshoq lhut pyám byi mù, nhang kat ri.
28 Nghut kôlhang, duìnhâng zoshâng haû gi, htoq ló mù, yhang lé, denaric rashô chyîn dap tô é duìnhâng zoshâng luzúm rayùq lé myàng jáng, haú yùq é lìngzing má gyàq myhik zing to mù, ‘Ngo lé dàp tô é chyîn hân xap aq!’ ga taî ri.
29 Haú hkûn, yhâng é luzúm duìnhâng zoshâng haû gi, yhâng é hí má hkyîhput htuq luî, ‘Ngo lé myìt hîng byi shilaq; ngò xap râ.’ ga dûng tôngbán ri.
30 Nghut kôlhang, yhang gi, a gyo byî é za, yhâng é chyîn dum wó xap é hkûn jé shoq, haú yùq lé htóng hkyô pyám nhang ri. 31 Gótû duìnhâng zoshâng wuì gi, haú hkyô lé myàng kôjáng, i‑myìt wú nô kôluî, yhángmòq é yhûmsîng hpó lé, haú hkyô bànshoq ló taî kyô akô.
32 Haû mù, haû yhûmsîng hpó gi, duìnhâng zoshâng haú lé wùt hâng yù mù, ‘Agè ashop é duìnhâng zoshâng ê, nàng, ngo lé dûng tôngbán é yánmai, nàng, ngo lé dàp é chyîn bànshoq lé, ngò lhut pyám byi bê nghut lhê mhaî. 33 Haû sû é nhîng, ngò, nang lé shogyô yu é su, náng é luzúm duìnhâng zoshâng lé, nàng ge shogyô yu lhê a nghut lhú?’ ga taí luî, 34 yhang gi, nhikjum yo mù, yhâng é chyîn ban xap é hkûn jé shoq, jamjau hui zo râ matú, yhang lé, htóng sûwún pê chyáng àp byî pyám bê nghut ri.
35 Núngmòq é gu-mang wuì lé, núngmòq é myìt mai mara a wó hkyut byi kô é nghut jáng, mauhkûng htoq tsáng myhâng mâ é Ngá wa le, núngmòq lé haú dông kut râ nghut lhê.” gâ ri.