Byùq Byùq É Sau
15
Ra-nyí lé, Yesuq é dang gyo kôrâ ga, hkán hkyuî bang eq yubàk dàp bang gi, Yhâng chyáng lé zîng bum akô. 2 Haú hkûn, Hparishe pé eq târâ sará pé gi, “Shí yùq gi, yubàk dàp bang lé lhom hàp yù mù, yhángmòq eq rahá za, zo shuq nyi ri.” ga taî pùt nyi bum akô.3 Haû mù, Yesuq yhángmòq lé dangtú dông taî é gi, 4 “Núngmòq má, sau rashô du wó luî radu byùq byùq é nghut le, gaú xe gaû du lé yòso mhan yô má nyhi pyâm to mù, byùq byùq é sau haû lé, myàng shoq a châng ho yu é, ó yùq wá nyì kôrâ lhú? 5 Byùq byùq é sau haú lé myang hô jáng, gyaí gau é i‑myìt èq gòqsân htoq má bún kê chûng mù, 6 yhûm má jé jáng, yhâng é buìnùm ji-myi wuì eq, yhûmkyo chang pé lé ji yù mù, ‘Ngá é byùq byùq é sau lé, ngò dum myang ho yù bê, ngò eq rahá chôm gabú sháng.’ ga taí râ nghut lhê. 7 Haû eq rajung za, Ngò, núngmòq lé taí kôlé, myìt lhîng a râ é díngmán bang gaú xe gau yuq lé gabú é htoq, myìt lhing é yubàk dàp sû rayùq é yánmai, mauhkûng htoq má, je riyhang gabú jowò dùt râ nghut lhê.
Byùq Byùq É Ngùn Chap
8 Dum nghut jáng, dangtú ralhum gi, myiwe rayùq, ngùn raxê chap wó é má, rachap byùq byùq é nghut le, yhang gi, myibung tap mù rayhum é shum luî, myang yù shoq rago za, ho wú râ a nghut lhú? 9 Haû lé ho myàng jáng le, yhâng é buìnùm ji-myi wuì eq yhûmkyo chang pé lé ji yù mù, ‘Byùq byùq é ngá ngûn chap lé dum myang ho yù bê, ngò eq rahá chôm gabú sháng.’ ga taí râ nghut lhê. 10 Haû eq rajung za, Ngò, núngmòq lé taí kôlé, myìt lhing é yubàk dàp sû rayùq é yánmai, Garai Gasâng é maumang lagyô pé hí má, gabú jowò dùt râ nghut lhê.” gâ ri.
Byùq Byùq É Yùqzo
11 Yesuq xoq taî é gi, “Byù rayùq gi, yùqzo í yùq wó ri. 12 Haú nhik mâ é tiq sû yùq gi, yhâng wa lé, ‘Âwa ê, ngò wó gíng é sùtzè, ngo lé gàm byi laq.’ ga dung jáng, yhâng wa le yhángnhik tâng lé sùtzè gàm byî kat ri.
13 Hau htâng hkâ-myháng a myáng má, yhang zo tiq sû yùq gi, sùtzè bànshoq hkyom yu chûng mù, mau we shut ê luî, haú jowò má, mingkan ngón hkyô châng é má yhang wó é ngùnzè bànshoq lé langsâ pyám bê. 14 Haû su kut ngùnzè wó mîwó lé ban langsâ pyâm é htâng má, haú mau má mùtmó gyó é yánmai, yhang gi, asho awui dùt lo nyì bê nghut ri. 15 Haû mù, haú mau mâ é byù rayùq chyáng, langchyáng ê kut le, haú yùq gi, yhang lé wàq rém jang shut nhang kat mù, wàq lé lhom zúng nhang ri. 16 Haú hkûn, yhang gi, wàq jùm zô é shîgyang cham pé lé lháng, zo naû shoq dùt kôlhang, ó yùq le a byi zo kó nghut ri.
17 Haû mù, yhang myìtbûn lo é gi, ‘Ngá wâ chyáng nyi é langchyâng pé gi, agùn agó myàng zô nyì kôrâ nghut lhê. Nghut kôlhang, ngò gi, shí jowò má, zò-mut wuìshit é eq shi ló râ dùt bê. 18 Ahkuî, ngò toq mù, ngá wâ chyáng taû ló luî, “Âwa ê, ngò gi, Garai Gasang lé le, nang lé le, shut bê. 19 Ahkuî mai ngò gi, nungzo nghû râ a gíng lo, hau é yánmai, náng é langchyáng rayùq dông za ngo lé nyì nhâng laq.” nghû luî, ló taí râ.’ gâ ri. 20 Hau htâng, yhang toq luî, yhâng wâ chyáng ló le, yhang we we má ru nghut ashî hkûn mai, yhâng wa gi, yhang lé lhom myàng jáng, wú shogyo luî, din ê mù, yhang zô é lìngzing má ê po pyik dàp to luî, bo-puq puq byî ri.
21 Haú hkûn, yhang zo gi, ‘Âwa ê, ngò gi, Garai Gasang lé le, nang lé le, shut bê. Ahkuî mai, ngò gi, nungzo nghû râ a gíng lo.’ ga luî, yhâng wa lé dûng tôngbán ri.
22 Yhâng wa kúm gi, yhâng é langchyâng pé lé, ‘Réng dik é mèbu hân hân yu lé mù, yhang lé hut byi keq; yhâng é lòq má, lòqtsung tsung byi keq; hkyî má le hkyî-tsung tsung byi keq. 23 Tsô myum tô é nojûng zo le yu sat keq. Haû mù, ngá-nhúng gi, zoshuq poî kut mù chôm ngón sháng. 24 Haî mù gâ le, ngá zo shí yùq gi, shi byùq é mai, ahkuî dum duì bê; byùq byùq é mai le, ahkuî dum myàng bê.’ ga taî ri. Haû mù, yhángmòq gi, ngón ngón zo shuq ló bekô.
25 Haú u lé, yhang zo ko sû yùq kúm gi, yò má nyi tô ri. Yhang gi, yò mai yhûm shut jé lo nyi é hkûn, zìng ut bàt luî gó nyi é htê lé lo wó gyô ri. 26 Haû mù, langchyáng rayùq lé wùt yù luî, haú hkyô lé yhang myî wú le, 27 langchyáng haû gi, ‘Nunggu dum taû jé lô bê. Haû mù, náng wa gi, nunggu wáng wáng zán zán dum taû jé lo é lé lhom myàng luî, tsô myum tô é nojûng zo lé sat bê nghut ri.’ ga taî kyô ri.
28 Dang haû lé wó gyo jáng, yhang gi, gyô nhik-yo luî, yhúmhkaû shut a wàng lo kut ri. Haû mù, yhâng wa htoq ê luî, yhang lé ê chyuq ri. 29 Yhang zo kúm gi, ‘Wú aq, ngò, shî myháng shîlo náng é jùn dông kut luî, hkâ-nhám le náng dang lé a lu laî wú. Nghut kôlhang, ngò ngá é luzúm wuî eq ngón kún râ matú, bainám zo radu lháng radàm le nàng a byî wú shi. 30 Shiwa myhî pé eq zùm yàp wún luî, náng é sùtzè lé lhoqpân pyâm é sû nungzo haû dum taû jé lô jáng kúm gi, tsô myum tô é nojûng zo lé, yhâng é matú nàng sat byi bu‑nhung!’ ga luî, yhâng wa lé tû taî ri.
31 Yhâng wa gi, ‘Ngá zo ê, nàng gi, hkâ-nhám le ngò eq rahá yhang nyi nyi lhê mù, ngá é sùtzè jòq mîjòq bànshoq gi, náng é chyat nghut lhê. 32 Nghut kôlhang, shî nunggu gi, shi byùq é mai ahkuî dum duì bê; byùq byùq é mai le, dum myàng bê. Haû mù, gabú hpo nghut bê.’ ga luî, yhang lé taî ri.” gâ ri.