Hparishe Rayùq É Yhûm Má Yesuq Jé Nyi É Hkyô
14
Bánno Buìnyì ra-nyí má, Yesuq gi, zang zo râ ga Hparishe sûwún rayùq é yhûm má, ê wang nyi tô le, haú mâ é bang gi, Yhang lé gyui gyui chôm wú nyi bum akô. 2 Haú u lé, wuì wam nòlì dùt sû rayùq gi, Yesuq é hí má jé nyi tô ri. 3 Haû mù, Yesuq gi, “Bánno Buìnyì má nòhpyo lé lhoqgê byî é gi, târâ wang lhê lhú, a wang é lhú?” ga luî, târâ sará pé eq Hparishe pé lé myî kat ri. 4 Nghut kôlhang, yhángmòq gi, zim za dùt byùq akô. Haú hkûn, Yesuq gi, nòhpyo hui sû lé, zuî to mù, lhoqgê byi luî, nhang kat ri.5 Hau htâng, Yesuq gi, yhángmòq lé, “Núngmòq chyáng mâ é rayùq yùq gi, yhûmsing é yhang zo rayùq yùq, haû a nghut jáng, no myang radu du, Bánno Buìnyì má, wuìhtúng má byìt gyó le, haú hkûn jáng, a xe htoq yu é za, wó nyî kôrâ nghut lhê lhú?” ga myî kat ri. 6 Yhángmòq kúm gi, dang haú hkun lé, haî le a wó tû taí kó nghut ri.
7 Haú hkûn, Yesuq gi, ji tô é bang je réng é zùng jowò pé hkyin yu nyì kô é lé myàng jáng, yhángmòq lé dangtú dông taî é gi, 8 “Byù rayùq yùq nang lé, myiháng poî má ji é nghut jáng, je réng é jowò má hkâ-ê zùng. Hkâsu mù gâ le, náng htoq je riyhang xânghpoq nge wó sû lé le, ji to shirâ âbe. 9 Ji tô é nghut jáng gi, núngnhik lé ji tô é yhûmsîng hpó lé lô mù, ‘Shí yùq lé jowò hui byi aq.’ ga luî, náng lé lé taí jáng, nàng hoq hpu luî, hkyî htâng shut huî zùng ra râ nghut lhê. 10 Haû mù luî, supé nang lé ji le, hkyî htâng má ê zûng àq; haú hkûn, nang lé jì sû lé mù luî, ‘Buìnùm hpó ê, shî je réng é jowò má huî dòq zùng àq.’ ga luî, nang lé taí jáng, nàng eq rahá zung tô é bíng lhúnglhâng bâng é hí má, nàng gi, myòqdong wó râ nghut lhê. 11 Hkâsu mù gâ le, yhûmsing gùng lé wàq toq é sû ó yùq nghut kôle, lhoqnyhum pyâm é hui râ nghut lhê; yhûmsing gùng lé lhoqnyhum é sû kúm gi, wàq toq é hui râ nghut lhê.” ga taî ri.
12 Hau htâng, Yesuq yhang lé ji é yhûmsîng hpó lé taî é gi, “Nàpzang, a nghut jáng, myínxûn lé nàng byi tso nau le gi, náng é buìnùm wuì, âgu âmâng pé, mùngmoq wuì, sùt wó é yhûmkyo chang pé lé hkâjî tso. Haú bang lé jì tsô é nghut jáng gi, yhángmòq nang lé dum jì tsô é èq, jeju dum tau kôrâ nghut lhê. 13 Nghut kôlhang, nàng poî kut mù, byi tso byi huq nau é nghut le gi, myùng bang, hkyî gyui lòq hten bang eq myòqjìt é bang lé, jì tso aq. 14 Haû su kut jáng, nàng hkungsô wó nyî râ nghut lhê. Yhángmòq nang lé jeju a wó tau kôlhang, díngmán bang dum dui toq lo é buìnyì má, hau é a-kyû lé, nàng wó hkam yù râ nghut lhê.” gâ ri.
Zoshuq Poî Mó Lé Dangtú Yu É Hkyô
15 Yesuq eq rahá zô zung tô é byù rayùq gi, dang haû wó gyo jáng, “Garai Gasâng é mîngdán mâ é zoshuq poî má wó zo râ sû gi, hkungsô wó nyî sû nghut râ.” ga luî, Yesuq lé taî ri.
16 Yesuq haú yùq lé tû taî é gi, “Byù rayùq gi, myínzang byi tso râ ga, zoshuq poî mó ralhum hen to mù, byù myo myo lé ji tô ri. 17 Zang byi tso râ yàm jé jáng, yhâng é duìnhâng zoshâng lé, ji tô é bâng chyáng ‘Lé keq hkoi, zoshuq jin to bê.’ ga ê châng wùt nhang ri.
18 Nghut kôlhang, haú bang bànshoq gi, zoshuq poî má a ê râ dông chyat he pyâm akô. Rayùq sû gi, ‘Ngò yohtung rahkyang wui tô lhê; haú lé ê wú râ dùt ri. Haû mù, ngo lé ahkáng byi shilaq.’ ga yhang lé taî ri.
19 Dum rayùq le, ‘Ngò, nohtó ngo zúm wui tô lhê; haú pé lé duì nhang chyam wú râ dùt ri; ngo lé ahkáng byi shilaq.’ ga taí wô ho ri.
20 Dum rayùq le, ‘Ngò myiwe hâng tô é a myáng shi mù, a wó lé.’ ga taí wô ho ri.
21 Haû jáng, duìnhâng zoshâng taû lò mù, yhâng é yhûmsîng lé haú hkyô bànshoq lo taî kyô ri. Haú hkûn, yhûmsîng hpó gi, nhikmó gyô yo mù, ‘Wà mâ é hkyô mó hkyô zo hkat hkangmó má hân hân ê mù luî, myùng bang, hkyî gyui lòq hten bang eq myòqjìt bang lé, ê ji lò àq.’ ga luî, yhâng é duìnhâng zoshâng lé nhang kat ri.
22 Hau htâng má, duìnhâng zoshâng gi, ‘Yhûmsîng ê, nàng nhang é eq rajung za ban kut bê; nghut kôlhang, zùng râ jowò gi, mân tô ashî.’ ga taî ri.
23 Haû su ga jáng, yhûmsîng hpó gi, ‘Ngá yhûm byíng râ matú, wà yàm hkyô pé eq hkyâm yàm hkyô pé má htoq ê mù, myang é bang lé a wó le wó shoq ê tsing shuî lò àq. 24 Nang lé ngò taí lé, hí lé ji to huî é bang rayùq lháng, ngá é zoshuq poî lé wó chyim wú râ a nghut.’ ga luî, yhâng é duìnhâng zoshâng lé taî ri.” gâ ri.
Yesuq É Chángzo Wó Dùt Râ Matú
25 Byù hpûng mó Yesuq eq rahá e ló kô é hkûn, Yesuq gi, haú bang lé lhing wú luî, 26 “Ngá chyáng lé sû ó yùq nghut kôle, yhûmsing é înu, îwa, yhang myi, yhang zo eq, yhang gu, yhang mang, yhâng nhammó pé lé le, hau htoq agó, yhûmsing é chyungxe lé le, ngo lé chyitdàp é htoq má je chyitdàp sû gi, ngá é chángzo a wó dùt. 27 Yhûmsing é tapzîng lé a wàq é za, Ngá htâng châng é sû ó yùq nghut kôle, Ngá é chángzo a wó dùt.
28 Dangké, núngmòq chyáng mâ é byù rayùq yùq, tsohtung yhûm ralhum saí nau le, yhang gi, yhûm haû ban saí râ matú, ngùn hkâ-myhó bàn râ eq yhang wó tô é ngùn lùq a lùq é lé, zùng mù luî, hí a sôn wú é byù nyì kôrâ lhú? 29 Hkâsu hkâwo mù, a-pûn awang gi, saî hi to mù luî, a wó lhoqpân é nghut jáng, 30 myang é bang bànshoq èq, ‘Shí yùq gi, a-pûn awang gi, saî hi to mù luî, bànshoq a wó saî pán lo nghut ri.’ ga luî, yhang lé jóng pyám bekô râ nghut lhê.
31 Dangké, hkóhkâm rayùq gi, gyè zan râ hen le, gyèzo í mun eq lé sû hkóhkâm lé, gyèzo ramûn èq za lhom wó zân ûng râ, a wó zân ûng râ lé, zùng mù luî, hí a myìt wú é nyì râ lhú? 32 A ûng râ dùt le gi, gyè pé we we má nyi tô ashî hkûn lé, lagyo sûwún pé lé nhang kat luî, nguì ngón yùqyò râ matú htingram pyám ra râ nghut lhê. 33 Haû eq rajung za, núngmòq chyáng mâ é ó yùq nghut kôlhang, yhûmsîng wó é zè bànshoq lé, a pyâm to sû gi, ngá é chángzo wó dùt râ a nghut.
34 Xo gi, ge lhê; nghut kôlhang, xomân kân byùq jáng gi, haú lé hai èq dum wó lhoqngam yù râ lhú? 35 Haû gi, myigung matú le, myìhpún kut râ matú le, a-kyû a bò lo. Haû mù luî, shinggan shut kúm gi, dú pyám sê akô.
Gyo râ nohkyap dàp sû gi, gyô yù sháng gàq.” ga taî ri.