Hkungsô Wó É Târâ
5
Yesuq gi, byù mòqmó lé myàng jáng, bùm má dòq ló luî, ló zung tô ri. Haú hkûn, Yhâng é chángzô pé gi, Yhâng chyáng lé lô kôjáng, 2 Yhang nhuthkum hpóng luî, yhángmòq lé mhoqshit é gi,3 “Sô má, asho awui dùt é bang gi, hkungsô wó nyi ri; hkâsu mù gâ le, mauhkûng mîngdán gi, yhángmòq é mîngdán nghut nyi ri.
4 Myìt iyon huî é bang gi, hkungsô wó nyi ri; hkâsu mù gâ le, yhángmòq gi, nhik lhoqtîng é hui kôrâ nghut lhê.
5 I‑myìt nú nhâm é bang gi, hkungsô wó nyi ri; hkâsu mù gâ le, yhángmòq gi, mingkan lé wó sîng kôrâ nghut lhê.
6 Díngmán hkyô lé mùt shit nyi é bang gi, hkungsô wó nyi ri; hkâsu mù gâ le, yhángmòq gi, nhik dìk shoq myàng zo kôrâ nghut lhê.
7 Shogyo nhikmyin myìt bo é bang gi, hkungsô wó nyi ri; hkâsu mù gâ le, yhángmòq gi, shogyo nhikmyîn yu é hui kôrâ nghut lhê.
8 Myìt sansêng é bang gi, hkungsô wó nyi ri; hkâsu mù gâ le, yhángmòq gi, Garai Gasang lé myàng kôrâ nghut lhê.
9 Nguì ngón hkyô sô xoq byî é bang gi, hkungsô wó nyi ri; hkâsu mù gâ le, yhángmòq gi, Garai Gasâng é yhang zô pé gâ é hui kôrâ nghut lhê.
10 Díngmán hkyo é yánmai zing-ri huî é bang gi, hkungsô wó nyi ri; hkâsu mù gâ le, mauhkûng mîngdán gi, yhángmòq é nghut nyi ri.
11 Ngá é yánmai, byu pê èq, núngmòq lé rhoi é, zing-rî é, a teng a mán é dông agè ashop é dang a-myû myû taí tso kô é hkûn, núngmòq hkungsô wó nyi ri. 12 Nguì ngón gabú nyî keq, hkâsu mù gâ le, núngmòq é matú kô é chyûnghuq gi, mauhkûng mîngdán má jòq tô ri. Núngmòq é hí lhê é myìqhtoî pé lé le, yhángmòq gi, haú dông zing-rî laî lo wú bekô nghut ri.
Xo Eq Maubó
13 Núngmòq gi, myìdàm htoq mâ é xo nghut nyi lhê. Nghut kôlhang, xo gi, màn kân byùq jáng, haú lé hai èq dum wó lhoqngam yù râ lhú? Shinggan shut dú pyám mù, byu pê èq nâng pyeq pyâm é mai lai luî, hai a-kyû le bò râ a nghut lo.
14 Núngmòq gi, mingkân é maubó nghut akô; bùm htoq mâ é wà mó lé gi, wó nghop to râ a nghut. 15 Myibung lé tap mù, mûng èq nghop tô é ó a kut wú kó; haû su kut râ malaî, yhúmhkaû má lúng tô é bang yùq hkangmó myòq wó myâng râ matú, tsûngjang má kúm tsung to râ nghut lhê. 16 Haû eq rajung za, byu pé gi, núngmòq é ge é múzó pé lé byu-myàng luî, mauhkûng htoq mâ é núngmòq é Îwa lé hkya-on kó sháng gàq, núngmòq é maubó lé yhángmòq é hí má dùq nhang to keq.
Târâ Lhoqdìk É Hkyô
17 Ngò gi, myìqhtoî pê é dang eq jep é târâ lé lhoqhpyoq pyám râ matú, jé lé é nghut nhô hkâ-ngâm kó; haú pé lé lhoqdìk râ matú shèq jé lé é ru nghut lhê. 18 Ngò, núngmòq lé teng za taí kôlé, mauhkûng eq myigùng byùq byùq le lháng, haú pé a ban lhoqdìk dìk gi, jep é târâ mâ é tiq dik é dangjí eq myihkyèt zo ralhum lháng byùq byùq râ a nghut. 19 Jep é târâ shí pé mâ é tiq dik é dang rahkun lé lu lai luî, góbang lé le, haú su kut râ matú mhoq byî é sû ó yùq nghut kôle, mauhkûng mîngdán má tiq dik sû gâ é hui râ nghut lhê; nghut kôlhang, jep é târâ shí pé lé châng kut luî, mhoq byi sû kúm gi, mauhkûng mîngdán má, hkìk sû gâ é hui râ nghut lhê. 20 Ngò, núngmòq lé taí kôlé, núngmòq díngmán é hkyô má, haû Hparishe pé eq târâ sará pé díngmán é htoq je a gyaú le gi, mauhkûng mîngdán má, núngmòq wó wâng kôrâ a nghut.
Byù A Sat Râ Hkyô
21 ‘Byù hkâsat,a sat é sû gi, jéyáng é hui râ nghut lhê’ ga, hí hpyang lhê é bang lé taî tô é dang, núngmòq wó gyô wú bê nghut lhê. 22 Nghut kôlhang, Ngò, núngmòq lé taí kôlé, gu-mang rayùq yùq lé nhikjum yô é sû gi, jéyáng é hui râ nghut lhê. Hau htoq agó, gu-mang hpó lé, ‘Byù gang’b ga taî é sû gi, Yudaq byìn tú wàpdòq má jéyáng é hui râ nghut lhê. ‘Byù bam ê’ ga wùt é sû gi, ngaraî myi eq gíngdán nyi ri.
23 Haû mù, hkungga gyàp má, nàng hkungga nhông râ haq htung é hkûn, náng é gu-mang rayùq yùq, nang lé mara hun é hkyô rajung jung jòq é lé, myìtbûn kat é nghut jáng, 24 náng é hkungga lé, haû hkungga gyàp hí má tô pyâm to mù, náng é gu-mang hpó haú yùq eq hí nguì ngón hkyô ló yû luî shèq, hkungga lé nhông byi aq.
25 Nang lé yui tsuq sû gi, nang lé târâ rûng má dé e ló é hkûn, hkyô má ru nghut nyi ashî u lé, yhang eq nguì ngón hkyô hí hân yù àq. Haû a nghut jáng, haú yùq gi, nang lé, târâ agyì chyáng ê àp pyám mù, haû târâ agyì gi, nang lé htóng hkyô pyám râ matú, htóng sûwún hpô é lòq má àp pyám râ nghut lhê. 26 Ngò, nang lé teng za taí lé, yuichyîn haû a ban xap xap gi, htóng haú mai nàng wó htoq ló râ a nghut.
Su-myi Sulàng A Ge Lú É Hkyô
27 ‘Su-myi sulàng hkâlú’c gâ é dang lé, núngmòq wó gyô wú bê nghut lhê. 28 Nghut kôle, Ngò, núngmòq lé taí kôlé, myiwe rayùq lé shut nau é myìt èq wú é sû gi, yhâng é myìt hkaû má, myiwe haú yùq eq su-myi sulàng lú hkyô kut é sû nghut bê. 29 Haû mù, náng é lòqyo myòq èq, nang lé mara kut shut nhang é nghut le gi, haú lé làp choq yû mù, dú pyám aq. Hkâsu mù gâ le, náng é ragùngdu gón ngaraî ming gyó râ htoq má, náng é gùngsho rajung jung za htên byùq é nghut le gi, náng é matú je ge ri. 30 Haû eq rajung za, náng é lòqyo lòq èq, nang lé mara kut shut nhang é nghut le gi, haú lé hpyit yû mù, dú pyám aq. Hkâsu mù gâ le, náng é ragùngdu gón ngaraî ming gyó râ htoq má, náng é gùngsho rajung jung za htên byùq é nghut le gi, náng é matú je ge ri.
Myi Làng Gâng É Hkyô
31 ‘Yhûmsing é yhang myi lé kâng é sû gi, lhoqkang laiká byi râ dùt lhê.’d gâ é dang jòq lhê. 32 Nghut kôlhang, Ngò, núngmòq lé taí kôlé, myiwe dông mai làng shut é a nghut é za, yhûmsing é yhang myi lé kâng é sû gi, myiwe haú lé sulàng lú sû dùt nhâng bê nghut ri; hau htoq agó, yhûmsing yhang lâng eq gang bê myiwe lé hâng yu é sû le, su-myi lú é sû dùt bê nghut ri.
Dâkam Tô É Eq Sêng É Hkyô
33 Hau htoq agó, ‘Dâkam tô é lé a cháng hkâmû; Yhûmsîng lé dâkam tô é eq rajung za cháng aq.’ ga luî, hí hpyang lhê é bang lé, taî tô é dang lé núngmòq wó gyô wú bê nghut lhê. 34 Nghut kôlhang, Ngò, núngmòq lé taí kôlé, hai èq le hkâ dakâm kó: mauhkûng lé lang luî le, hkâ dakâm kó; hkâsu mù gâ le, haû gi, Garai Gasâng é zùng tánghkuq nghut lhê; 35 myigùng lé lang luî le, hkâ dakâm kó; hkâsu mù gâ le, haû gi, Garaî é hkyî nang jang nghut lhê; Yerusalem wá mó lé lang luî le, hkâ dakâm kó; hkâsu mù gâ le, haû gi, Hkóhkâm mó é wà mó nghut lhê. 36 Hau htoq agó, yhûmsing é ulhûm èq le, hkâ dakâm kó; hkâsu mù gâ le, xâm rahkat lé lháng hpyû shoq nòq shoq, nàng wó kut é a nghut. 37 Náng é dang lé, ‘nghut lhê’ lé gi, ‘nghut lhê’ nghû, ‘a nghut é’ lé gi, ‘a nghut’ nghû, taí aq; haû mai laî é gi, haû agè ashop su chyáng mâ é nghut ri.
Lató Hpuq É Hkyô
38 ‘Myòqjí matú myòqjí xap, zui matú zuì xap’e gâ é dang lé, núngmòq wó gyô wú bê nghut lhê. 39 Nghut kôlhang, Ngò, núngmòq lé taí kôlé, agè ashop kut é sû lé lató hkâhpuq. Náng é lòqyo bowâm má pyuq byi sû lé, lòqpaî hkyam le hkâm byi shi aq. 40 Byù rayùq yùq, nang lé mara tsuq mù, náng é buzo lé yu pyám byî é nghut jáng, bumó lé le, hkyut byi shi aq. 41 Byù rayùq yùq, nang lé zìk mù, radéng ê nhâng jáng, yhang eq rahá í déng châng ê byi aq. 42 Nang lé dung sû lé, byi aq; náng chyáng mai chyi naû sû lé le, nùnghtáng hkâlhik pyám.
Gyè Lé Chyitdàp Râ É Hkyô
43 ‘Náng é chyáng nâm mâ é bang lé gi, chyitdàp mù, náng é gyè lé gi, a naù a wom kut àq’f gâ é dang lé, núngmòq wó gyô wú bê nghut lhê. 44 Nghut kôlhang, Ngò, núngmòq lé taí kôlé, núngmòq gi, mauhkûng htoq mâ é núngmòq é Îwâ é yhang zô pé wó dùt kó sháng gàq, núngmòq é gye pé lé chyitdàp mù, núngmòq lé zing-ri bâng é matú kyûdung byi keq; 45 hkâsu mù gâ le, Yhang gi, agè ashop bâng é ahtoq má le, gè bâng é ahtoq má le, buì tsô byi nhâng mù, díngmán bâng é ahtoq má le, a díngmán bâng é ahtoq má le, mau wô byi nhâng Sû nghut ri. 46 Núngmòq lé chyitdàp é bang lé za chyitdàp kô le gi, núngmòq é matú hai chyûnghuq wó kôrâ lhú? Hkán hkyuî bang lháng, haû su kut lhê a nghut kó lhú? 47 Hau htoq agó, núngmòq é gu-mang wuì lé za shi-kyám kô le gi, núngmòq kut é múzó gi, góbâng htoq má haî wá làklaí râ lhú? Tûngbaù pé lháng haû su kut lhê a nghut kó lhú? 48 Haû mù, mauhkûng htoq mâ é núngmòq é Îwa gúmjùp é su, núngmòq le gúmjùp nyì keq.