Mara Hkyut É Hkyô Eq Lùmjíng Myìt
17
Yesuq, Yhâng chángzô pé lé taî é gi, “Byu pé lé mara kut shut nhang é hkyô gi, jòq htoq lô râ za nghut lhê. Nghut kôlhang, mara kut shut nhang é hkyô lé lhoqhtoq é sû gi, dingnyé wó râ. 2 Zoshâng shí bang mâ é rayùq lé, mara kut shut nhang é sû gi, yhâng é lìngzing má lùqluí long mó tuî lhang byi luî, wuimau má ê dú hkyô pyâm é huî é nghut le gi, yhâng é matú je gè râ nghut lhê. 3 Núngmòq gi, yhûmsîng gùng yhûmsîng sidìq keq.Nunggu nungmang nàng lé mara kut shut é nghut le gi, yhang lé tan luî, mhoqshit àq; yhang myìt lhing é nghut le gi, yhang lé mara hkyut pyám byi aq. 4 Ra-nyí má za, yhang nang lé nyhit dàm shut mù, ‘Ngò myìt lhîng bê.’ ga luî, nang lé nyhit dàm dum tôngbán le, tôngbán hkangmó, nàng, yhâng é mara lé hkyut pyám byi aq.” gâ ri.
5 Haú hkûn, lagyô pé gi, “Ngá-mòq é lùmjíng myìt lé lhoqko byi laq.” ga Yhûmsîng lé dûng akô.
6 Haû jáng, Yhûmsîng gi, “Núngmòq é lùmjíng myìt angshi cham í za hkâlháng bò kô é nghut le gi, shî hángwâ gàm lé, ‘Sikgâm ê, a-myìt eq roq bún luî, wuìshuq lung-aû má, ê yùq to aq ô.’ gâ le, núngmòq é dang lé sikgâm haû gyo byi râ nghut lhê.
7 Dangké, núngmòq mâ é rayùq yùq chyáng, yò hpuq é, a nghut jáng, sau zúng é duìnhâng zoshâng rayùq nyi é nghut le, duìnhâng zoshâng haû yohtung pá mai jé lo é hkûn, yhang lé, ‘Hân zùng mù zang zo aq.’ ga luî, ó yùq wá taí kôrâ lhú? 8 Haû duìnhâng zoshâng lé shèq, ‘Ngò zo râ myínzang lajang aq. Ngò bàn zo shoq hpyidum má hpyihit hit mù, xun zang wú nyî àq. Ngò bàn zo jáng shèq nàng wó zo râ nghut lhê.’ ga luî, taí râ a nghut kó lhú? 9 Taí mîtaí bànshoq lé, duìnhâng zoshâng ban zui saí byî é nghut kôlhang, yhang lé jeju bûn é dang ó yùq wá taî wú akô lhú? 10 Haû eq rajung za, núngmòq gi, taí mîtaí ban kut jáng shèq, ‘Ngá-nhúng gi, jeju bun a gíng é duìnhâng zoshâng wuì nghut nyi lhê; kut râ é mû lé za lhoqpân é bang nghut lhê.’ nghû taí keq.” ga taî ri.
Yàpjèq Dàp Bang Raxê Yùq Lé, Yesuq Lhoqgê Byî É Hkyô
11 Ahkuî, Yesuq gi, Yerusalem wà mó shut e ló nyi le, Samariq mau eq Galile mau gyoro mai laî e ló ri. 12 Yhang, wà rawà shut wang ló é hkûn, yàpjèq nòlì dàp é byù raxê yùq eq huî ri. Haú bang gi, we mai yàp to mù, Yesuq lé, 13 “Yesuq, Yhûmsîng ê, ngá-mòq lé shogyô yù làq ô.” ga luî, wùt garû bum akô.
14 Yesuq gi, yhángmòq lé myàng jáng, “Núngmòq é gùngdu lé, hkyangjông pê chyáng ló tûn shit keq.” ga yhángmòq lé taî ri. Yhángmòq gi, hkyô má ru sô nyi ashî le lháng, sân-yúng ló byùq bekô.
15 Yhángmòq chyáng mâ é rayùq gi, yhûmsing gùngdu ge byùq é lé myàng jáng, Yesuq chyáng dum taû ê mù, htê mó èq Garai Gasang lé hkya-ôn é eq, 16 Yesuq é hkyîwang má paî gòp to luî, Yhang lé jeju hkya-ôn nyi ri. Haú yùq gi, Samariq byù nghut ri.
17 Haû mù, Yesuq gi, “Sân-yúng byùq é gi, raxê yùq a nghut lhú? Gau yùq gi, hká ló byùq bekô? 18 Shî tûngbaù rayùq mai lai luî, dum taû lé mù Garai Gasang lé hkya-ôn é byù, rayùq le a nyì lo kó lhú?” ga taî ri. 19 Hau htâng, Yesuq gi, haú yùq lé, “Toq mù ló aq, náng é lùmjíng myìt gi, nang lé lhoq sân-yúng byi bê nghut ri.” ga taî ri.
Garai Gasâng É Mîngdán Jé Lô Râ Hkyô
20 Radàm lé, Hparishe pé gi, Garai Gasâng é mîngdán hkâ-nhám jé râ hkyô, Yesuq lé myî akô. Haû jáng, Yesuq gi, “Garai Gasâng é mîngdán jé lé râ gi, myòq èq wú luî myàng râ a nghut. 21 Garai Gasâng é mîngdán gi, núngmòq yùq jùp é ahkaû má nghut nyi é yánmai, ‘Wú keq, shí má jòq ri, mhó má jòq ri.’ ga luî le, byu pé gi, wó taí kôrâ a nghut.” ga luî, yhángmòq lé tû taî ri.
22 Chángzô pé lé le Yesuq taî é gi, “Haû Byu Yhangzô é buìnyì ra-nyí lé, núngmòq myàng nau dik é ahkyíng jé râ. Nghut kôlhang, núngmòq gi, Byu Yhangzo lé wó myâng kôrâ a nghut. 23 Haú buìnyì má, byu pé gi, núngmòq lé, ‘Yhang shí má nyi ri.’ haû a nghut jáng, ‘Yhang hê má nyi ri.’ ga taí kôrâ nghut lhê. Nghut kôlhang, hkâ-ê; hkâcháng kó. 24 Hkâsu mù gâ le, maumyî rahkyam má hpyat é maulhap gi, maumyî góhkyam jé shoq dùq bó é su, haû Byu Yhangzo dum jé lé é buìnyì má le dùt râ nghut lhê. 25 Nghut kôlhang, haû su a dùt htoq shi-má, Yhang gi, zing-rî é myo myo lé le, i-pyàt shi mâ é byu pê èq he-ngìk pyâm é lé le, hui shirâ nghut lhê.
26 No-aq é tsîn pyàt má dùt é su, haû Byu Yhangzo jé lé é buìnyì má le dùt râ nghut lhê. 27 Byu pé gi, No-aq, wuìsanghpo mó hkaû má wang é hkûn jé shoq, zo zo shuq shuq, myi byi myi yû, myiháng kut luî, nyi nyi bum akô. Haú hkûn, dowuî díng lô mù, yhángmòq bànshoq lé lo lhoqhtên pyám bê nghut ri.
28 Haû eq rajung za, Lot é pyàt má le, byu pé gi, zo mù, shuq mù, ung zo wuì zo, ho zo ho shuq, yhûm kut luî nyi nyi akô. 29 Nghut kôlhang, Sodom wà mai Lot htoq ló é buìnyì má, mauhkûng mai, myi eq hang gi, mau su wò gyó lô luî, lhúnglháng lé lhoqhtên pyám bê nghut ri.
30 Haû Byu Yhangzo, lé htoq shit é buìnyì má le, haû eq rajung za dùt râ nghut lhê. 31 Haú buìnyì má, yhûmhkûnga htoq má nyi tô é sû gi, yhúmhkaû mâ é zè lé, a ló gyó wang yù lo sháng gàq. Yò má nyi tô é sû gi, haû eq rajung za, yhûm shut a taû ló lo sháng gàq. 32 Lot é yhang myib lé bûn nyì keq. 33 Yhûmsing é chyungxe duì hkyô hô sû ó yùq nghut kôle, chyungxe sum râ nghut lhê; chyungxe sûm pyâm é sû kúm gi, chyungxe wó duî râ nghut lhê. 34 Ngò, núngmòq lé taî kyo kôlé, haú myîn lé, yhupjang ralhum má byù í yùq nyi to kô le, rayùq gi, shuî yu é hui mù, rayùq gi, myìt gyó to râ nghut lhê. 35 Myiwe í yùq luí má rahá za chôm luí nyi tô le; rayùq gi, shuî yu é hui mù, rayùq gi, myìt gyó pyâm to râ nghut lhê. 36 Yohtung má byù í yùq nyi tô le, rayùq gi, shuî yu é hui luî, rayùq gi, myìt gyó pyâm to berâ nghut lhê.” gâ ri.
37 Haú hkûn, chángzô pé gi, “Yhûmsîng Yesuq ê, haû gi, hká gyo má dùt râ lhú?” ga luî, Yesuq lé myi kôjáng, Yhang gi, “Màng lèq é jang má, zùn bup pé, lé zîng bùm râ nghut lhê.” ga luî, yhángmòq lé tû taî ri.