Yesuq, Isâm Htaî Lo É Hkyô
17
Hkyuq nyí laî htâng má, Yesuq gi, Petiruq lé le, Yakuq eq yhang gu Yohan nhiktâng lé le, shuî chûng mù, yhángmòq baú myhang é bùm ralhum má dòq ló akô. 2 Haú má, yhángmòq é myòq hí tê má, Yesuq é ihpyô isâm htaî byùq mù, Yhâng é myòqdong gi, buì su dùq bó tô é eq, Yhâng é mèbu gi, maubó su hpyu zan tô ri. 3 Haú hkûn jáng, Mosheq eq Eliya gi, yhángmòq é hí má htoq shit mù, Yesuq eq dáng nyo lhûm nyi akô.4 Haû mù, Petiruq gi, Yesuq lé, “Yhûmsîng ê, shí jowò má ngá-nhúng nyi le ge ri. Nàng ô nau é nghut le gi, Náng é matú ralhum, Mosheq é matú ralhum, Eliya é matú ralhum kut, ngò zúm sûm lhum saí bá.” ga taî ri.
5 Petiruq dang ru taî nyi ashî le, dùq bó é mhut gi, yhángmòq lé htup zíng lô mù, mhut hkaû mai htoq lo é htê gi, “Shí yùq gi, Ngò chyitdàp é Ngá zo nghut lhê; Yhang má Ngò myìt dik nyi lhê. Yhâng é dang gyo keq.” gâ ri.
6 Haû su gâ é htê lé, chángzô pé wó gyo kôjáng, yhángmòq gi, gyùq nán mù, myigùng má gòp bùm bekô nghut ri. 7 Nghut kôlhang, Yesuq gi, yhángmòq chyáng jé lé lô mù, yhángmòq lé lòq èq záng kat luî, “Toq keq, hkâgyùq kó.” ga taî ri. 8 Yhángmòq tu wú kat kô le, Yesuq mai lai luî, ó lé le a myàng lo kó nghut ri.
9 Bùm mai taû gyó lô kô é hkûn, Yesuq gi, “Ahkuî núngmòq myang é hkyô lé, haû Byu Yhangzo shi é mai lhoqdui toq yu é a hui hui gi, ó lé le hkâtaî kyo kó.” ga, yhángmòq lé taî hkûm tô ri.
10 Haû jáng, chángzô pé gi, “Eliya hí lé ra râ nghut lhê ga, târâ sará pé haî mù taí kô é lhú?” ga, Yesuq lé myî akô.
11 Haú hkûn, Yesuq gi, “Eliya hí lé luî, lhúnglháng lé hen lajâng to râ gâ é gi, têng lhê. 12 Nghut kôlhang, Ngò, núngmòq lé taí kôlé, Eliya gi, jé lé bê nghut lhê; nghut kôle, yhángmòq gi, yhang lé a lhom wú sé kômù, yhángmòq ô nau é dông bànshoq kut bekô nghut ri. Haû eq rajung za, haû Byu Yhangzo le, yhángmòq é lòq má hpuzo râ nghut lhê.” ga tû taî ri. 13 Haú hkûn shèq, Yhang taî nyi é gi, Wuìmyhup Sará Yohan eq sêng é hkyô nghut é lé, haû chángzô pé sê gyô akô nghut ri.
Nàt Wang Júng Sû Lé Lhoqgê Byî É Hkyô
14 Yhángmòq, byù mòqmó pê chyáng dum taû jé lô kô é hkûn, byù rayùq gi, Yesuq chyáng lé jé mù, hkyîhput htuq luî, 15 “Yhûmsîng ê, ngá é yùqzo lé shogyô yù laq; yhang gi, mhûngtuq tuq luî, gyai yhang jamjaû nyi ri. Myihkyóm má le, wuì má le, a-num num lêng wàng wàng dùt nyi ri. 16 Yhang lé, Náng é chángzô pê chyáng shuî ê kôlhang, yhángmòq a wó lhoqgê byi kó nghut ri.” ga taî ri.
17 Haû mù, Yesuq gi, “Lùmjíng myìt a bo é eq agè ashop é a-myû pé ê, Ngò gi, hkâ-myháng jé shoq núngmòq eq rahá nyì mù, wó jân nyì râ lhú? Yùqgè zo haú lé, Ngá chyáng shuî lé lô keq.” ga tû taî kat ri. 18 Yesuq gi, nàt gang lé tân kat jáng, nàt gang haû gi, yùqgè zo haú yùq chyáng mai htoq ló byùq bê nghut mù, haú hkûn jáng, yùqgè zo haû gi, ge byùq bê nghut ri.
19 Hau htâng, chángzô pé gi, ó a nyi é u má, Yesuq chyáng lé lô kômù, “Ngá-mòq gi, haî mù, nàt haú lé a wó hkat htoq é lhú?” ga, lé myi kôjáng, 20 Yhang gi, “Núngmòq é lùmjíng myìt shaû é yánmai nghut ri. Ngò, núngmòq lé teng za taí kôlé, núngmòq é lùmjíng myìt angshi cham í za hkâlháng bò kô é nghut le gi, bùm shî lé, ‘Hé shut htòt ló aq.’ ga taî le, htòt râ nghut lhê. Núngmòq a wó kut é haî lháng jòq râ a nghut. 21 Shí jung gi, kyûdung é eq zoshuq tûm é dông za a nghut jáng, a htoq ló é nghut lhê.a” ga dum tû taî ri.
22 Yhángmòq, Galile mau má rahá zùp nyì kô é hkûn, Yesuq gi, yhángmòq lé, “Haû Byu Yhangzo gi, byu pê é lòq má àp pyâm é hui zo râ nghut lhê. 23 Haú bang gi, Yhang lé sat pyám kôrâ nghut lhê; nghut kôlhang, Yhang gi, shi é htâng sum nyí nghû râ nyí má lhoqdui toq é hui râ nghut lhê.” ga taî ri. Haû mù, haû chángzô pé gi, gyai yhang gyô yón nyî bekô nghut ri.
Noqkuq Yhûm Jahkôn Kat É Hkyô
24 Yesuq eq Yhâng é chángzô pé gi, Kaperina‑um wà má jé kô é hkûn, noqkuq yhûm jahkôn hkyuî bang gi, Petiruq chyáng lé jé kômù, “Núngmòq é sará gi, noqkuq yhûm jahkôn a kat lhú?” ga myî akô.
25 Petiruq gi, “Kat lhê.” ga tû taî ri.
Hau htâng, Petiruq yhúmhkaû má wang ló le, Yesuq hí lhom taî é gi, “Simun ê, mingkan hkóhkam pé gi, hkán eq jahkôn pé lé, ô pê chyáng mai gùq yu akô lhú? Yhûmsing byu pê chyáng mai lhú? Haû a nghut jáng, góbâng chyáng mai lhú? Nàng, hkâsu wó myìt lhê lhú?” gâ ri.
26 Haû mù, Petiruq gi, “Góbâng chyáng mai nghut ri.” ga tû taí jáng, Yesuq gi, “Haû su nghut le gi, yhûmsing byu pé gi, lùt akô nghut ri. 27 Nghut kôlhang, yhángmòq é i‑myìt a ngón a dùt kó sháng gàq, nhông má ê mù, ngo-nhe ê hkyó aq. Sânghi wó nhê yu é ngozô é nhut lé lâng hâ kat jáng, ngùn htingchap rachap lé myàng râ nghut lhê. Haú lé yù mù, Ngá é matú eq náng é matú, yhángmòq lé ló byi aq.” ga taî ri.