Alhô Agàn Lé Dung Kô É Hkyô
16
Hparishe pé eq Saduke pé gi, Yesuq chyáng lé jé kômù, Yhang lé chyam wú é dông, mauhkûng mâ é alhô agàn kut shit râ matú, dûng akô.2 Haû mù, Yhang gi, yhángmòq lé, “Núngmòq gi, myínhtâng jé jáng, ‘Mau hpong râ nghut lhê, hkâsu mù gâ le, mauhkûng ne ri.’ ga le, 3 nàpkyó lé nghut jáng, ‘Hkû-nyí laìdun lò râ nghut lhê, hkâsu mù gâ le, mauhkûng nè mù, nòq ri.’ ga le, lhaq taî akô. Núngmòq gi, maúhkung é isâm lé wú mù sê gam hkoq yû kô é nghut kôlhang, shí i-pyàt lhê é alhô agàn lé gi, a sê gam hkoq yû kó nghut ri. 4 Agè ashop é eq lhum a zuî é i-pyàt shî gi, maúhpo alhô agàn lé ho nyi akô; nghut kôlhang, Yonaq é alhô agàn mai lai luî, gótû haî le tûn shit râ a nghut.” ga taî ri. Hau htâng, Yesuq gi, yhángmòq chyáng mai htoq ló bê nghut ri.
Hparishe Pé Eq Saduke Pê É Múnchi
5 Yhángmòq, nhông hé hpoq shut gû dàp ló kô é hkûn, haû chángzô pé gi, mùk yu chûng râ lé tô-myhî pyâm akô. 6 Haú hkûn, Yesuq gi, “Hparishe pé eq Saduke pê é múnchi lé, sidìq luî, koi pyâm nyì keq.” ga, yhángmòq lé taî kat ri.
7 Yhángmòq gi, “Ngá-nhúng, mùk a yu chung é yánmai, haû su ga taî é nghut ri.” ga luî, taî lhûm bum akô nghut ri.
8 Yhángmòq haû su taî lhûm nyì kô é lé Yesuq sé jáng, yhángmòq lé, “Lùmjíng myìt shaû é bang ê, mùk a bo é hkyô lé, haî mù taî lhûm nyi akô lhú? 9 Ahkuî jé shoq, núngmòq gi, a sê gyo shi kó lhú? Mùk ngo lông èq byù ngo hkyîng lé byi tsô é htâng, núngmòq hkâ-myhó mung wó dum gùq tsîng yù kô é lé le, 10 mùk nyhit lông èq byu myi hkyîng lé byi tsô é htâng, núngmòq hkâ-myhó mung wó dum gùq tsîng yù kô é lé le, núngmòq a myìtbun kó lhú? 11 Ngò gi, mùk eq séng luî taî é a nghut é lé, núngmòq, hkâsu mù a sê gyo kô é lhú? Hparishe pé eq Saduke pê é múnchi lé koi pyám keq nghû taî é ru nghut lhê.” ga taî ri. 12 Haú hkûn shèq, Yhang taî é gi, mùk má chung é múnchi lé koi pyám râ matú taî é a nghut é za, Hparishe pé eq Saduke pê é mhoqshit hkyô lé koi pyám râ matú taî é ru nghut é lé, yhángmòq sê gyô akô nghut ri.
Yesuq Lé, Petiruq Yín Yu É Hkyô
13 Yesuq gi, Kesare-Hpilipi wà mó nâm mâ é mau má jé é hkûn, Yhâng é chángzô pé lé, “Haû Byu Yhangzo gi, ó yùq nghut lhê ga, byu pé taî akô lhú?” ga myî ri.
14 Haú hkûn, yhángmòq gi, “Ra-am gi, Wuìmyhup Sará Yohan ga, góbang gi, Eliya ga, dum ra-am gi, Yeremi‑aq, a nghut jáng, gótû myìqhtoi rayùq yùq nghut ri ga, taî akô.” ga tû taí kôjáng, 15 Yhang gi, “Haû jáng, núngmòq gi, Ngo lé ó yùq nghut lhê nghu akô lhú?” ga, yhángmòq lé xoq myî ri.
16 Haú hkûn, Simun Petiruq gi, “Nàng gi, rû dui nyi é Garai Gasâng é Yhangzo, Hkrisidùq nghut ri.” ga tû taî ri.
17 Haû mù, Yesuq tû taî é gi, “Yonaq é yhang zo Simun ê, nàng gi, hkungsô wó nyi ri; hkâsu mù gâ le, nang lé haú hkyô tûn shit é gi, byù mai a nghut, mauhkûng htoq má nyi é Ngá é Îwa mai tûn shit é ru nghut lhê. 18 Ngò, nang lé taí lé, nàng gi, Petiruqa nghut luî, lùqgòk shî má, Ngò, Ngá é noqkuq hpúng lé xuq to râ nghut mù, haû moming hkúmdong pé gi, hpúng haú lé wó ûng râ a nghut. 19 Mauhkûng mîngdán é zòqshi pé lé, Ngò, nang lé àp byi râ nghut lhê; myigùng htoq má, nàng tuî to má tuî to lé, mauhkûng htoq má le, tuî to râ nghut lhê; myigùng htoq má, nàng lhoqlhut má lhoqlhut lé, mauhkûng htoq má le, lhoqlhut byi râ nghut lhê.” gâ ri. 20 Hau htâng, Yhang Hkrisidùq nghut é hkyô lé, ó lé le a taî kyo râ matú, Yhâng é chángzô pé lé taî hkûm kat ri.
Yesuq Yhang Shî Râ Lé Hí Te Taî É Hkyô
21 Yesuq gi, Yhang Yerusalem wà mó má ló mù, sûwún wuî, hkyangjong agyi pé eq târâ sará pê é lòq má, zing-rî é myo myo hui zo luî, sat pyâm é hui ra râ nghut kôle, sum nyí nghû râ buìnyì má, lhoqtoq yu é hui râ nghut é hkyô lé, haú hkûn mai, Yhâng é chángzô pé lé taî kyô hi ló bê nghut ri.
22 Haû mù, Petiruq gi, Yhang lé rahkyam shut shuî htoq yû mù, “Yhûmsîng ê, haú hkyô Náng chyáng hkâ-nhám le a dùt sháng gàq.” ga Yhang lé tân ri.
23 Yesuq gi, lhing wú kat mù, Petiruq lé, “Tsádán nàng, Ngá chyáng mai hpâng aq! Nàng gi, Garai Gasang eq sêng é hkyô lé a myìt é za, byù eq sêng é hkyô lé za myìt é sû nghut mù, Ngá é matú myìt lèqbàt jowò nghut ri.” ga taî ri.
24 Hau htâng, Yhang gi, Yhâng é chángzô pé lé, “Ngá htâng cháng naû sû ó yùq nghut kôle, yhûmsing gùng yhûmsîng he-ngìk pyám mù, yhûmsing é tapzîng lé wàq chûng luî, cháng ra râ nghut lhê. 25 Hkâsu mù gâ le, yhûmsing é chyungxe lé hkyi yù naù sû ó yùq nghut kôle, chyungxe sum râ nghut lhê; nghut kôlhang, Ngá é yánmai, yhûmsing é chyungxe sûm pyâm é sû kúm gi, chyungxe wó yû râ nghut lhê. 26 Byù gi, mingkan gón lé wó sing to kôlhang, yhûmsing é chyungxe sô sûm byùq é nghut le gi, yhâng é matú, hai a-kyû bò râ lhú? Byù gi, yhûmsing é chyungxe sô lé, hai èq wó htaî yù râ lhú? 27 Haû Byu Yhangzo gi, Yhâng Wâ é hpungwup shingkang bo é èq, Yhâng Wâ é maumang lagyô pé eq rahá jé lé lô râ nghut lhê; haú hkûn, Yhang gi, yùq hkangmó lé, yhûmsîng kut lai bê eq rajung za a-kyû byi râ nghut lhê. 28 Ngò, núngmòq lé teng za taí kôlé, ahkuî shí má yàp to bang ra-am gi, haû Byu Yhangzo, Yhâng é mîngdán eq jé lé lo é lé, a myang é za shî kôrâ a nghut.” ga taî ri.