Sansêng É Hkyô Eq A Sansêng É Hkyô
15
Hau htâng má, Hparishe pé eq târâ sará pé ra-am gi, Yerusalem wà mó mai Yesuq chyáng jé lé lô kômù, 2 “Náng é chángzô pé gi, haî mù luî, îchyí îwâ pê é htûngli lé a cháng kut akô lhú? Yhángmòq gi, lòq hí a chî é zang zô akô nghut ri.” ga, lé taî akô.3 Haû jáng, Yesuq tû taî é gi, “Núngmòq gi, haî mù, núngmòq é htûnglî é yánmai, Garai Gasâng é hkunmó lé a cháng kô é lhú? 4 Hkâsu mù gâ le, Garai Gasang gi, ‘Núngmòq é înu îwa lé, hkúngga hpautap keq.’a ga le, ‘Înu îwa lé, nhîng é sû ó yùq nghut kôle, sat pyâm é hui râ lhê.’b ga le, taî tô é nghut lhê. 5 Nghut kôlhang, núngmòq taî é gi, ‘byù rayùq yùq, yhûmsing é yhâng nu yhâng wa lé byi âng é zè lé, Garai Gasang lé byi râ chyûnghuq nghut lhê ga taî é nghut jáng, 6 haú yùq gi, yhâng wa lé hkúngga nó a ra.’ gâ akô nghut ri. Haú dông mai, núngmòq gi, núngmòq é htûnglî é yánmai, Garai Gasâng é mungdang lé he-ngìk pyâm akô nghut ri. 7 Gègùn labyoq kut bang ê! Núngmòq eq séng luî, myìqhtoi Esai-a htoî tô é dang gi, têng ri. 8 Myìqhtoi dang haû gi,
‘Byù shí bang gi, nhut htoq mai za Ngo lé hkúnggâ akô;
yhángmòq é myìt nhiklhum gi, Ngò eq wê gâng nyi akô.
9 Yhángmòq, Ngo lé noqkuq nyì kô é gi, akôm má za nghut nyi ri;
hkâsu mù gâ le, yhángmòq é mhoqshit hkyô pé gi, byù dông mai mhoqshit é hkyô pé za nghut nyi ri.’c
gâ é nghut lhê.” gâ ri.
10 Hau htâng, Yesuq gi, shiwa byu pé lé, Yhâng chyáng wùt yù luî, “Gyô yù mù, sé lo keq. 11 Nhut má wang lo é haí jung le, byù lé a sanséng dùt nhang é a nghut, nhut mai htoq lo é pé shèq, byù lé a sanséng dùt nhang é ru nghut lhê.” ga taî ri.
12 Haú hkûn, haû chángzô pé gi, Yhâng chyáng lé lô kôluî, “Hparishe pé gi, shí hkyô lé wó gyo mù, nhik-yô nyi bùm kô é lé, Nàng sê lhê lhú?” ga myi kôjáng, 13 Yhang gi, “Mauhkûng htoq tsáng myhâng mâ é Ngá wa a hô tô é agàm hkangmó gi, a-pûn eq roq nùt pyâm é hui râ nghut lhê. 14 Yhángmòq é yánmai, myìt hkâ-myo kó; yhángmòq gi, myòqjìt bang nghut kôle, myòqjìt é bang lé hkyô-u she é bang nghut akô. Myòqjìt yhangchang hkyô-u she lhûm é nghut le gi, í yùq é yhang donghkong má byìt gyó kôrâ za nghut lhê.” ga tû taî ri.
15 Haú hkûn, Petiruq gi, “Ngá-mòq lé, dangtú hau é lichyúm taî sân kyo laq.” ga taí jáng, 16 Yesuq gi, “Núngmòq, ahkuî le haû í yhang go nyi ashi kô luq? 17 Nhut má wang lo é haí jung le, wamdau hkaû má jé wang ló mù, gùngdu mai dum htoq ló é nghut lhê. 18 Nghut kôlhang, nhut mai htoq lo é gi, myìt nhiklhum mai htoq lo é nghut mù, byù lé a sanséng dùt nhang ri. 19 Hkâsu mù gâ le, myìt nhiklhum mai htoq lo é gi, agè ashop é dông myìt é hkyô pé, byù sat é hkyô, su-myi sulàng lú hkyô, ashop é dông gùngsho zùm yàp é hkyô, hkaû é hkyô, a tengmán é sàksé hkâm é hkyô, lùmù gànsang é hkyô pé nghut ri. 20 Haú pé gi, byù lé a sanséng dùt nhang é hkyô pé nghut ri; lòq a chî é za zo shuq é gi, byù lé a sanséng a dùt nhang é nghut lhê.” ga taî ri.
Hkanan Myiwe Myhí Rayùq É Lùmjíng Myìt
21 Hau htâng, Yesuq gi, haú mai Turuq eq Sidon mau shut htoq e ló bê nghut ri. 22 Haú hkûn, haú mau má nyi é Hkanan myiwe myhí rayùq gi, Yhâng chyáng lé jé mù, “Dawiq é Yhang zo, Yhûmsîng ê, ngo lé shogyô yù làq ô! Ngá byìzo gi, nàt gang wang júng mù, gyai yhang no gyîn nyi ri.” ga taî garû ri.
23 Nghut kôlhang, Yesuq gi, dang rahkun le a tû taí nghut ri. Haû mù, Yhâng é chángzô pé gi, Yhâng chyáng lé jé kômù, “Myiwe myhí haú lé ló nhang pyám aq; haî mù gâ le, yhang gi, ngá-nhûng é htâng má châng garû nyi ri.” ga taî akô.
24 Yesuq gi, “Byùq byùq é sau pé su nghut nyi é Isira-elaq byu pê chyáng shèq, Ngo lé nhang kat é ru nghut lhê.” ga taî ri.
25 Haú hkûn, myiwe myhí haû gi, Yhâng é hí má lé mù hkyîhput htuq luî, “Yhûmsîng ê, ngo lé garúm yû làq ô!” ga taî ri.
26 Yesuq gi, “Zô wui chyáng mâ é zoshuq lé yù mù, hkuî pé lé byi tsô é jung a nghut.” ga tû taí jáng, 27 myiwe myhí haû gi, “Yhûmsîng ê, haû kúm nghut ri; nghut kôlhang, hkuî pé lháng, yhûmsîng hpô é zohpoq mai gyó é zangcham zanghtâng lé, zô akô mhaî.” ga dum taî ri.
28 Haû mù, Yesuq gi, “Myiwe zo ê, náng é lùmjíng myìt gi, kô nyi ri! Nàng dûng é hkyô lé gyo byi bê nghut lhê.” ga tû taî ri. Haú hkûn jáng, myiwe myhí hau é byìzo le ge byùq bê nghut ri.
Byù Myi Hkyîng Lé Byi Tsô É Hkyô
29 Yesuq gi, haú mai htoq ló luî, Galile nhông yàm má ê jé mù, bùm shut dòq ló luî, ló zung nyi ri. 30 Haú hkûn, byù mòqmó gi, hkyî hten bang, myòqjìt bang, byùwùn dùt bang, nhut jìt bang eq nò bang gótû myo myo lé shuî lé lô kômù, Yhâng é hkyîwang má lé nyhi to kô é nghut luî, Yhang gi, haú bang lé lhoqgê byî ri. 31 Haû shiwa byu pé gi, nhut jìt bang dang wó nyò kô é lé le, byùwùn dùt bang ge byùq é lé le, hkyî hten bang hkyô wó sô é lé le, myòqjìt bang myòq wó myang é lé le, myàng kôjáng, wú maú kômù, Isira-elaq é Garai Gasang lé hkya-ôn bum akô nghut ri.
32 Yesuq gi, Yhâng é chángzô pé lé wùt yù mù, “Ngò, shí bang lé wú shogyô ri; yhángmòq gi, Ngò eq rahá nghut nyi é sum nyí bò bê, haî le a myàng zo kó nghut ri. Yhángmòq, hkyôlat má mùtyùt ló yùt kó âbe, yhángmòq zò-mut to gû lé, Ngò a nhang kat naù.” ga taî ri.
33 Haú hkûn, Yhâng é chángzô pé gi, “Îsû é yòso má nhîng, byù shî myhô bang lé lùq shoq byi tso râ zoshuq gi, hkârâ é wó râ lhú?” ga myî akô.
34 Yhang gi, “Núngmòq, mùk hkâ-myhó long wó akô lhú?” ga taû myi jáng, yhángmòq gi, “Mùk nyhit long eq ngo‑nú zo ra-tsuí wó lhê.” ga tû taî akô.
35 Haû mù, Yhang gi, byù hpûng lé, myigùng htoq má zùng nhang ri. 36 Hau htâng, Yhang gi, haû mùk nyhit long eq ngozo lé yù mù, jeju ban hkya-on jáng, myhik hpé luî, haû chángzô pé lé byi jáng, yhángmòq gi, byù hpûng lé gàm byî akô nghut ri. 37 Yhángmòq lhúnglhâng bang zô gyî bùm kô é htâng má, haû chángzô pé gi, a-myìt ahtâng lé nyhit mung byíng shoq wó gùq tsîng yu ashî kô nghut ri. 38 Haú hkûn zô é bang má, myiwe wuì eq zoshâng wuì lé a nghap lhôm é za, yùqgè wuì baú myi hkyîng yùq bo ri. 39 Yesuq gi, byù hpûng lé, ló nhang pyâm é htâng má, lhaî má wang ji mù, Magadan mau shut dàp e ló bê nghut ri.