Wuìmyhup Sará Yohan Shi Byùq É Hkyô
14
Haú hkûn, mau zau Herot gi, Yesuq eq sêng é lùdang lé wó gyo jáng, 2 yhâng a‑ô mâ é bang lé, “Shí yùq gi, Wuìmyhup Sará Yohan nghut rî-nhung; Yhang gi, shi é mai dum dui toq lo é nghut mù, hpungwup a-tsam haú pé lé wó kut é nghut ri.” ga taî ri.3 Herot haû su gâ é gi, yhang gu Hpilip é yhang myi Herodi‑aq é yánmai, Yohan lé chyup tuî yù mù, htóng hkyô pyâm é yánmai nghut ri. 4 Hkâsu mù gâ le, Yohan gi, yhang lé, “Nàng, myiwe haú lé hâng yu é gi, târâ a wang é nghut lhê.” ga taí byî nyi é yánmai nghut ri. 5 Herot gi, Yohan lé sat pyám naû kôlhang, mingbyû wuì lé gyùq é yánmai, a wám sat nghut ri; haî mù gâ le, yhángmòq gi, Yohan lé myìqhtoi tsuq nyî kô é yánmai nghut ri.
6 Nghut kôlhang, Herot é hkû ladu hkyúm buìnyì má, Herodi‑aq é yhang zo byìzo gi, yhángmòq é hí má gó shit é lé, Herot gi, gyai yhang wú myìt nguì mù, 7 byìzo haú lé, yhang haî dûng le haî byi râ ga dâkam é danghtum htûm tô ri. 8 Byìzo haû gi, yhâng nu hpàqchyî byî é lé gyô yù mù, “Shî, bó má, Wuìmyhup Sará Yohan é ulhum lé, kat byi laq.” ga, Herot lé dûng ri. 9 Mau zau hpó gi, myìt a ngón dùt byùq kôlhang, yhang dakâm danghtum htûm tô é yánmai le, bíng pê é myòqdong lé tê nau é yánmai le, yhang dûng é lé, byi râ matú, 10 htóng hkaû má lúng tô é Yohan é ulhum lé hpyit râ hkunmó hkyô kat bê nghut ri. 11 Yohan é ulhum lé bó má kat luî, myiwe zo haú lé byi jáng, myiwe zo haû gi, haú lé yhâng nû chyáng yu ló byî ri. 12 Haû mù, Yohan é chángzô pé gi, yhâng é màng lé lé yû luî, myhup pyám bekô nghut ri. Hau htâng, yhángmòq gi, Yesuq lé ló taî kyô akô nghut ri.
Byù Ngo Hkyîng Lé Byi Tsô É Hkyô
13 Yesuq gi, haú hkyô lé wó gyo jáng, haû mai lhaî ji mù, tsím tsâm é jowò shut Yhang baú e ló ri. Haú lé, byu pé wó gyô bùm kôjáng, wà mó pé mai htoq lé lô kômù, hkyî hkyô Yhâng htâng châng e ló akô nghut ri. 14 Yesuq gi, lhaî mai gyó dàp ló é hkûn, byù mòqmó nyi to láng é lé myàng jáng, yhángmòq lé wú shogyo luî, nò bang lé lhoqgê byî ri.
15 Myínhtâng jé lô jáng, haû chángzô pé gi, Yhâng chyáng lé kômù, “Shí má gi, tsím tsâm é jowò nghut é htoq agó, buì le gyum ló bê nghut mù, shiwa byu pé gi, wà pé shut ló luî, yhángmòq é matú zôjung ló wó wuî kó sháng gàq, yhángmòq lé nhang kat àq hkoi.” ga taî akô.
16 Haú hkûn, Yesuq gi, “Yhángmòq ló a ra. Núngmòq, yhángmòq lé rajung jung byi tso keq.” ga tû taî kat ri.
17 Haû su ga jáng, yhángmòq gi, “Mùk ngo long eq ngozo í du za ru wó lhê.” ga dum tû taî akô.
18 Haû jáng, Yesuq gi, “Yu lò keq.” ga tû taí mù, 19 shiwa byu pé lé, wàhu yò má zùng nhang ri. Hau htâng, Yhang gi, haû mùk ngo long eq ngozo í du lé yù mù, mauhkûng shut tu wú to luî, jeju ban hkya-on jáng, mùk lé hpê gàm mù, chángzô pé lé byî ri. Haû chángzô pé gi, shiwa byu pé lé gàm byî akô nghut ri. 20 Yhángmòq bànshoq bang zô gyî bùm kô é htâng má, haû chángzô pé gi, zô myhit tô é pé lé, raxe í mung byíng shoq wó gùq tsîng yu ashî kô nghut ri. 21 Haú má zô é bang gi, myiwe wuì eq zoshâng wuì lé a nghap lhôm é za, yùqgè baú ngo hkyîng kô bo ri.
Yesuq, Wuì Htoq Má Sô É Hkyô
22 Yesuq gi, haû shiwa byu pé lé byo ló nhang nyi é hkûn jáng, chángzô pé lé lhaî má wang ji nhâng mù, tû-tap shut dàp ló láng nhang ri. 23 Shiwa byu pé lé nhang pyâm é htâng má, Yhang gi, kyûdung râ ga, Yhang baú bùm shut dòq e ló ri. Myínhtâng chutshúm zó jé shoq, Yhang baú haú má nyi nyi ri. 24 Haú u lé, lhaî gi, gin-gau mai tsómra wê é jowò má jé é hkûn, laì tau mùt é yánmai, wuìlheng èq gyai yhang lo bàt nhûn é hui zô ri.
25 Htang nàpsûn maubó zó sum hkyíng eq hkyuq hkyíng gyoro má, Yesuq gi, nhông htoq má so mù, yhángmòq chyáng lé lo ri. 26 Haû mù, chángzô pé gi, Yesuq nhông htoq má sô nyi é lé myàng kôjáng, gyùq dàn kômù, “Sôbyô ô!” ga gyùq nán é èq taî garû akô nghut ri.
27 Haû jáng yhang, Yesuq gi, yhángmòq lé, “Hkâgyùq kó! Ngò ru nghut lhê; myìt wum lhoqkíng keq.” ga nyo kat ri.
28 Haú hkûn, Petiruq gi, “Yhûmsîng ê, Nàng yhang ru nghut le gi, ngo lé, wuì htoq mai sô lé lô nhâng laq.” ga taî kat ri.
29 Haû jáng, Yesuq gi, “Lé lô àq.” ga tû taî kat ri.
Haû mù, Petiruq gi, lhaî mai gyó mù, wuì htoq mai Yesuq chyáng sô e ló ri. 30 Nghut kôlhang, yhang gi, laìdun htan é lé myang kat jáng, wú gyùq luî, wuì má myùp ló nyî mù, “Yhûmsîng ê, ngo lé hkyi yù laq.” ga wùt garû kat ri.
31 Yesuq gi, radá dâm yhâng é lòq lhâm kat luî, Petiruq lé lâng zing to mù, “Lùmjíng myìt shau sû ê, nàng haî mù uq-ô lhê lhú?” ga taî ri.
32 Yhángnhik, lhaî má wàng kôjáng, laìdun le zîm byùq bê nghut ri. 33 Hau htâng, haû lhaî má lúng tô é bang gi, Yhang lé paî gòp mù, “Nàng gi, gè gè yhang, Garai Gasâng é Yhangzo nghut bê.” ga taî akô nghut ri.
34 Yhángmòq gi, gû dàp ló kômù, Genesarat mau má jé wang ló bekô nghut ri. 35 Haú mau mâ é bang gi, Yesuq lé wú sé kôjáng, awui ayàm mâ é bang bànshoq lé kyô kat akô. Haû mù, byu pé gi, nòhpyo hui bang lhúnglháng lé, shuî lé lô kômù, 36 nòhpyo hui bang lé, Yhâng é bushi htâng má za lháng záng nhâng râ matú dûng tôngbán akô; Yhang lé záng é lhúnglhâng bang gi, lhoqgê byî é huî bekô nghut ri.