A Sanséng Dùt Nhang É Hkyô Pé
7
Haû Hparishe pé eq târâ sará pé ra-am gi, Yerusalem wà mó mai jé lé lô kômù, Yesuq é nàm má lé zùp zîng bum akô. 2 Haú hkûn, Yhâng é chángzô pé ra-am gi, htûngli dông a chî pyâm é, a sansêng é lòq èq zo shuq nyî kô é lé, yhángmòq myang akô nghut ri. 3 (Hparishe pé eq Yudaq byù bànshoq bang gi, yhángmòq é îchyí îwâ pê é htûngli lé châng é bang nghut lhê mù luî, lòq hí a chî é gi, haî le a zô wú kó nghut ri. 4 Yhángmòq gi, gaì pé mai taû lò jáng le, gùng hí a chî pyâm é, zôjung a zo kó nghut é htoq agó, góm pé, hkoq pé, gyi chôkon pé lé chî é htûngli gótû pé lé le, châng akô nghut ri.)5 Haû mù, Hparishe pé eq târâ sará pé gi, Yesuq lé, “Náng é chángzô pé gi, haî mù luî, îchyí îwâ pê é htûngli lé a châng é za, a sansêng é lòq èq zo shuq nyi akô lhú?” ga myî akô.
6 Haú hkûn, Yesuq gi, yhángmòq lé, “Gègùn labyoq kut bang ê, núngmòq eq séng luî myìqhtoi Esai-a htoî tô é dang má,
‘Byù shí bang gi, nhut htoq mai za Ngo lé hkúnggâ akô; yhángmòq é myìt nhiklhum gi, Ngò eq wê gâng nyi akô.
7 Yhángmòq gi, akôm má za, Ngo lé noqkuq nyi akô; hkâsu mù gâ le, yhángmòq é mhoqshit hkyô pé gi, byù dông mai mhoqshit é hkyô pé za nghut nyi ri.’a
ga kâ tô é gi, têng ri. 8 Núngmòq gi, Garai Gasang tô tô é hkunmó lé tô pyám luî, byu é htûngli lé za, myhik zing tô akô nghut ri.” ga luî tû taî ri.
9 Hau htâng, Yhang xoq taî é gi, “Núngmòq gi, yhûmsing é htûngli lé za cháng râ matú, Garai Gasâng é hkunmó lé he-ngìk pyâm é má, hpàqchyî gyaí bo akô nghut ri. 10 Hkâsu mù gâ le, Mosheq gi, ‘Núngmòq é înu îwa lé, hkúngga hpautap keq.’b ga le, ‘Înu îwa lé, nhîng é sû ó yùq nghut kôle, sat pyâm é hui râ lhê.’c ga le, kâ tô é nghut lhê. 11 Nghut kôlhang, núngmòq taî é gi, byù rayùq yùq, yhûmsing é yhâng nu yhâng wa lé byi âng é zè lé, Koriban za (Garai Gasang lé byi râ chyûnghuq) nghut lhê gá nhang akô. 12 Haû mù, haú yùq lé, yhâng nu yhâng wâ é matú, haî a kut byi nhâng lô é dông dùt bê nghut ri. 13 Haú dông mai, núngmòq gi, núngmòq chung gyó lo é htûngli é yánmai, Garai Gasâng é mungdang lé he-ngìk pyâm akô; haû sû é hkyô myo myo lé le, núngmòq kut akô nghut ri.” gâ ri.
14 Yesuq gi, shiwa byu pé lé Yhâng chyáng dum wùt yù mù, taî é gi, “Núngmòq bànshoq bang, ngò taî é lé gyô yù mù, sé lo keq; 15 Shinggan mai wang lo é haí jung le, byù lé a sanséng dùt nhang é a nghut, nghut kôlhang, byu é ûnghkaû mai htoq ló é zè kúm gi, byù lé a sanséng dùt nhang lhê.” gâ ri. 16 (Gyo râ nohkyap dàp é sû gi, gyô yù sháng gàq.)d
17 Yhang gi, byù mòqmó mai htoq ló mù, yhúmhkaû má jé wang ló é hkûn, Yhâng é chángzô pé gi, dangtú haû eq séng luî, Yhang lé lhom myî akô nghut ri. 18 Haû mù, Yhang gi, yhángmòq lé, “Núngmòq gi, haû í yhang go akô lùq? Shinggan mai wang lo é haí jung le, byù lé a sanséng nhâng wó dùt râ a nghut é hkyô lé, a sé kó lhú? 19 Hkâsu mù gâ lé, haû gi, byu é myìt nhiklhum hkaû má wang ló é a nghut é za, wamdau hkaû má shèq wang ló é nghut mù, shinggan shut dum lhoqhtoq pyâm é nghut lhê.” ga taî ri. (Yhang îsu ga taî é gi, zoshuq lhúnglháng sansêng lhê gá nau é dông nghut ri.)
20 Hau htoq agó, Yhang xoq taî é gi, “Byù mai htoq lo é haí jung le, byù lé a sanséng nhâng wó dùt é nghut lhê. 21 Hkâsu mù gâ lé, ahkaû mai htoq lo é gi, byu pê é myìt mai htoq lo é nghut mù, agè ashop é dông myìt é hkyô pé, ashop é dông gùngsho zùm yàp é hkyô, hkaû é hkyô, byù sat é hkyô, su-myi sulàng lú hkyô, 22 myòqnòq é hkyô, agè ashop é hkyô, mhaú zô é hkyô, achaq achyut zùm yàp lhûm é hkyô, mânon é hkyô, lùmù gànsang é hkyô, nghutbûn é hkyô eq ngha é hkyô pé htoq lo é nghut lhê; 23 Agè ashop é hkyô shí pé bànshoq gi, byu é ûnghkaû mai htoq lo é nghut mù, byù lé a sanséng dùt nhang ri.” gâ ri.
Tûngbaù Myiwe Myhí Rayùq É Lùmjíng Myìt
24 Yesuq gi, haú jowò mai htoq ló mù, Turuq eq Sidon maukyo shut e ló luî, yhûm ralhum má wang e ri; Yhang nyi é hkyô lé, ó yùq lé le a sé nhâng naù kôlhang, a wó zaú to nghut ri. 25 Haû mù, agè ashop é nàt wang júng tô é myiwe zo rayùq é yhâng nu gi, Yhang nyi tô é hkyô lé wó gyô é hkûn jáng, Yhâng chyáng jé lé mù, Yhâng é hkyîwang má lé paî gòp to luî, 26 yhang zô chyáng mai nàt gang lé hkat htoq pyám byi râ matú, Yhang lé dûng tôngbán ri. Myiwe haû gi, Suru-Hpinisi mau mâ é Grik byùhú nghut ri.
27 Yesuq gi, “Zo wuîe hí zô gyi kó sháng gàq; haî mù gâ le, zô wui chyáng mâ é zoshuq lé yù mù, hkuî péf lé byi tsô é jung a nghut.” ga yhang lé taî kyô ri.
28 Haú hkûn, yhang gi, “Yhûmsîng ê! Haû kúm nghut ri; nghut kôlhang, zanggyap ô mâ é hkui lháng, zô wui é zô myhit shuq htâng lé, ge zô lhê a nghut lhú?” ga dum tû taî ri.
29 Haû mù, Yesuq gi, yhang lé, “Nàng tû taî é dang hau é yánmai, ló lo àq hkoi; haû nàt gang gi, nungzô chyáng mai htoq ló byùq bê nghut ri.” ga taî kat ri.
30 Myiwe myhí haû gi, yhûm má dum taû jé lo é hkûn, yhang zo yhuphpyang htoq má lèq to láng é lé le, nàt gang htoq byùq bê nghut é lé le, lo myang ri.
Nojit É Eq Dang A Hkyang É Sû Lé Lhoqgê Byî É Hkyô
31 Yesuq gi, Turuq mau mai dum htoq ló mù, Sidon mai sô laî ló luî, Dekapoli mau hkaû dông laî byìt mù, Galile nhông shut gyó jé ló ri. 32 Haú hkûn, byù ra-am gi, nojit é eq dang a hkyang é byù rayùq lé, Yhâng chyáng shuî lé lô kômù, haú yùq é ahtoq má lòq ke byi râ matú, Yhang lé dûng tôngbán akô nghut ri.
33 Yesuq gi, haú yùq lé baú za byù hpúng mai shuî htoq yû mù, yhâng é nohkyûng má lòqnyhui htaû háng byi luî, sôkan byé tik yû mù, haú yùq é shô má htau byî ri. 34 Hau htâng, Yhang gi, mauhkûng shut tu wú mù, soq mó shê luî, “Ehpahta!” (Lichyúm gi, “Bóng àq hkoi!”) ga luî, haú yùq lé taî kat ri. 35 Haú hkûn, haú yùq é nohkyap le bóng byùq luî, shô le nyhôm byùq mù, balang hkyâng hkyâng dang wó nyô bê nghut ri.
36 Yesuq gi, haú hkyô ó lé le a taî kyo râ matú, yhángmòq lé hkúm kôlhang, yhángmòq gi, je hkûm le, je taî pyo akô nghut ri. 37 Byu pé gi, gyai yhang maú hong byùq bùm kôluî, “Yhang gi, haî lé le, ge é dông chyat kut ri; nojit sû lé, wó gyo shoq, dang a hkyâng sû lé, wó nyô shoq, kut byi bê nghut ri.” ga luî, taî bum akô nghut ri.