Byù Myi Hkyîng Lé Byi Tsô É Hkyô
8
Haú yòq má, gótû byù mòqmó gi, lé zîng bum akô; haú bang zoshuq langhpyùt to kô é yánmai, Yesuq gi, Yhâng é chángzô pé lé wùt yù mù, 2 “Ngò, shí bang lé wú shogyô ri; yhángmòq gi, Ngò eq rahá nghut nyi é sum nyí bò bê, haî le a myàng zo kó nghut ri. 3 Yhángmòq chyáng mâ é ra-am gi, mau we mai lé é bang nghut é yánmai, yhángmòq lé, zò-mut gû yhûm shut nhang kat é nghut le gi, hkyôlat má mùtyùt yùt é ló hui kôrâ nghut lhê.” ga taî ri.4 Haú hkûn, Yhâng é chángzô pé gi, Yhang lé, “Îsû é yòso má nhîng, shî myhô bang lé lùq shoq byi tso râ zoshuq gi, hká má ê yû râ lhú?” ga taî akô.
5 Yesuq gi, “Núngmòq, mùk hkâ-myhó long wó akô lhú?” ga taû myi jáng, yhángmòq gi, “Nyhit long.” ga, dum tû taî akô nghut ri.
6 Haû mù, Yhang gi, byù hpûng lé myigùng htoq má zùng nhang to luî, mùk haû nyhit long lé yù mù, jeju ban hkya-on jáng, myhik hpé luî, haú bang lé gàm byi râ matú, Yhâng é chángzô pé lé byî kat ri; haû mù, yhángmòq gi, haú bang lé gàm byî akô nghut ri. 7 Yhángmòq gi, ngo‑nú zo ra-tsuí le wó akô nghut ri; haû mù, Yhang gi, ngozo haú pê é matú jeju hkya-on luî, chángzô pé lé dum gàm byí nhang ri. 8 Yùq hkangmó zô gyî bùm kô é htâng má, haû chángzô pé gi, a-myìt ahtâng lé nyhit mung byíng shoq wó gùq tsîng yu ashî kó nghut ri. 9 Zô é bang gi, byù myi hkyîng kô nghut ri; Yesuq gi, haú bang lé, nhang kat luî, 10 Yhâng é chángzô pé eq rahá, lhaî má wang ji mù, Dalamanuhta mau má ê jé akô nghut ri.
11 Hparishe pé gi, lé mù, Yesuq eq dang htíng htîng lhûm akô; hau htoq agó, yhángmòq gi, mauhkûng mâ é alhô agàn lé dûng é dông, Yhang lé chyam wú akô nghut ri. 12 Yesuq gi, myìt nò-kying kying luî, yhángmòq lé taî é gi, “Haî mù luî, shí i-pyàt lhê é byu pé gi, maúhpo alhô agàn dûng akô lhú? Ngò teng za taí kôlé, shí i-pyàt mâ é bang lé, hai alhô agàn le tûn shit râ a nghut.” gâ ri. 13 Hau htâng, Yhang gi, yhángmòq lé tô pyâm to mù, lhaî má dum taû wang ló luî, tû-tap shut gû dàp e ló bê nghut ri.
Hparishe Pé Eq Herot É Múnchi
14 Haû chángzô pé gi, mùk yu chûng râ lé tô-myhî pyám kôluî, lhaî hkaû má mùk ralong za ru wó akô nghut ri. 15 Yesuq gi, yhángmòq lé, “Núngmòq gi, Hparishe pé eq Herot é múnchia lé, sidìq luî, koi pyâm nyì keq.” ga taî ri.
16 Haú hkûn, yhángmòq gi, “Ngá-nhûng chyáng mùk a bo é yánmai, haû su ga taî é nghut ri.” ga luî, rayùq eq rayùq taî lhûm bum akô nghut ri.
17 Haû su ga taî lhûm nyì kô é lé Yesuq sé jáng, yhángmòq lé, “Núngmòq gi, mùk a bo é hkyô lé, haî mù taî lhûm nyi akô lhú? Ahkuî jé shoq, núngmòq gi, a byu-myàng, a sê gyo shi kó lhú? Núngmòq é myìt nhiklhum gi, rû htan nyi ashî kó lhú? 18 Myòq dàp to kôluî nhîng, a myàng kó lhú? Nohkyap dàp to kôluî nhîng, a wó gyo kó lhú? 19 Ngò, mùk ngo long lé myhik hpé mù, byù ngo hkyîng lé byi tsô é hkûn, zô myhit shuq htâng lé, núngmòq hkâ-myhó mung wó gùq tsîng yu é lé, bûn ashî kó lhú?” ga myi jáng, yhángmòq gi, “Raxe í mung.” ga tû taî akô.
20 Dum, Yesuq gi, “Ngò, mùk nyhit long lé myhik hpé mù, byù myi hkyîng lé byi tsô é hkûn, zô myhit tô é ajàp azo lé, núngmòq hkâ-myhó mung wó gùq tsîng yù kô é lhú?” ga myi jáng, yhángmòq gi, “Nyhit mung.” ga dum tû taî akô.
21 Haú hkûn, Yesuq gi, “Haû nghut le nhîng, ahkuî le, a sê gyo shi kó lhú?” ga, yhángmòq lé myî ri.
Myòqjìt Sû Rayùq Lé Lhoqgê Byî É Hkyô
22 Yhángmòq gi, Bet‑saida wà mó má jé lò kô é hkûn, byù ra-am gi, myòqjìt é byù rayùq lé, Yesuq chyáng shuî lé lô mù, haú yùq lé záng byi râ matú, dûng tôngbán akô. 23 Yesuq gi, myòqjìt sû haú yùq é lòq lé zui mù, wà shinggan shut shuî htoq ló luî, yhâng é myòq má sôkan byé tik byi mù, lòq ke byi luî, “Nàng, rajung jung lé myang ri lhú?” ga myî kat ri.
24 Haû jáng, yhang gi, tu wú kat luî, “Byu pé gi, sikgâm su dùt luî, hkyô sô wún é lé, ngò myang ri.” ga taî ri.
25 Hau htâng, Yesuq gi, haú yùq é myòq má Yhâng é lòq dum ke byî ri; haú hkûn, haú yùq é myòq gi, bóng lô mù, ge byùq luî, haî lé le san za myàng bê nghut ri. 26 Yesuq gi, haú yùq lé, “Wà hkaû má hkâwang ló lo.” ga taí luî, yhâng é yhûm shut ló nhang kat bê nghut ri.
Hkrisidùq Ga, Petiruq Yín Yu É Hkyô
27 Yesuq eq Yhâng é chángzô pé gi, Kesare-Hpilipi wà mó awui ayàm mâ é wà pé shut e ló é hkûn, hkyô má, Yesuq gi, chángzô pé lé, “Byu pé gi, ngo lé ó yùq nghut lhê ga, taî akô lhú?” ga myî ri.
28 Haú hkûn, yhángmòq gi, “Ra-am gi, Wuìmyhup Sará Yohan ga, góbang gi, Eliya ga, dum ra-am gi, myìqhtoi rayùq yùq nghut ri ga taî akô.” ga, Yhang lé tû taî akô.
29 Yesuq gi, “Núngmòq gi, ngo lé ó yùq nghut lhê nghu akô lhú?” ga, yhángmòq lé xoq myi jáng, Petiruq gi, “Nàng gi, Hkrisidùq b nghut ri.” ga tû taî ri.
30 Yesuq gi, haú hkyô ó lé le a taî kyo râ matú, yhángmòq lé taî hkûm ri.
Byu Yhangzo Gi, Sat Pyâm É Hui Luî, Dum Dui Toq Râ Hkyô
31 Hau htâng, Yhang gi, yhángmòq lé mhoqshit é má, “Haû Byu Yhangzo gi, zing-rî é myo myo hui zo luî, sûwún wuî, hkyangjong agyi pé, târâ sará pê èq he-ngìk pyâm é hui mù, sat pyâm é hui ra râ nghut lhê; nghut kôlhang, sum nyí nghû râ buìnyì má, dum dui toq râ nghut lhê.” gâ ri. 32 Yesuq gi, haú hkyô lé san za dùt shoq taî nyi é yánmai, Petiruq gi, Yhang lé rahkyam shut shuî htoq yû mù, Yhang lé tân ri.
33 Nghut kôlhang, Yesuq gi, Yhâng é chángzô pé lé lhing wú kat mù, Petiruq lé, “Tsádán nàng, Ngá chyáng mai hpâng àq! Nàng gi, Garai Gasang eq sêng é hkyô lé a myìt é za, byù eq sêng é hkyô lé za myìt é sû nghut ri.” ga tân kat ri.
34 Hau htâng, Yhang gi, byù mòqmó eq Yhâng é chángzô pé lé wùt yù mù, taî é gi, “Ngá htâng cháng naû sû ó yùq nghut kôle, yhûmsing gùng yhûmsîng he-ngìk pyám mù, yhûmsing é tapzîng lé wàq chûng luî, cháng ra râ nghut lhê. 35 Hkâsu mù gâ le, yhûmsing é chyungxe lé hkyi yù naù sû ó yùq nghut kôle, chyungxe sum râ nghut lhê; nghut kôlhang, Ngá é yánmai le, haû gabú danglù é yánmai le, yhûmsing é chyungxe sûm pyâm é sû kúm gi, chyungxe hkyi yu é hui râ nghut lhê. 36 Byù gi, mingkan gón lé wó sing to kôlhang, yhûmsing é chyungxe sô sûm byùq é nghut le gi, yhâng é matú, hai a-kyû bò râ lhú? 37 Byù gi, yhûmsing é chyungxe sô lé, hai èq wó htaî yù râ lhú? 38 Yubàk mara myô é eq su-myi sulàng shut é i-pyàt shî má, Ngò eq Ngá é dang lé hoq pyâm é sû ó yùq lé le, haû Byu Yhangzo gi, Yhâng Wâ é hpungwup shingkang bo é èq, haû chyoiyúng maumang lagyô pé eq rahá jé lé é hkûn, hoq pyám râ nghut lhê.”c gâ ri.