Nikodimu Lé, Yesuq Mhoqshit É Hkyô
3
Nikodimu gâ é Hparishe rayùq nyi ri; yhang gi, Yudaq byu pê é byìn tú wàpdòq má bo é sû nghut ri.
Yohan 3:1-21
2 Yhang gi, myín lé, Yesuq chyáng lé mù, “Rabai ê, Nàng gi, Garai Gasâng chyáng mai lé é sará rayùq nghut é lé, ngá-mòq sê lhê. Hkâsu mù gâ le, Nàng kut shit é maúhpo alhô agàn pé gi, Garai Gasang a lom é nghut jáng, ó yùq le wó kut râ a nghut.” ga taî ri.
3 Haú hkûn, Yesuq gi, yhang lé, “Ngò, nàng lé teng za taî kyo lé, ó yùq nghut kôle, dum hku é hui sû za a nghut le gi, Garai Gasâng é mîngdán lé wó myâng râ a nghut.” ga tû taî ri.
4 Haû jáng, Nikodimu gi, “I-pyàt ko bê é byù gi, dum hku é hkâsu kut wó hui râ lhú? Înû é ûnghkaû má dum wàng mù, dum hku é hui râ gi, gè gè yhang wó dùt râ a nghut!” ga taî ri.
5 Haú hkûn, Yesuq gi, “Ngò, nàng lé teng za taî kyo lé, ó yùq nghut kôle, wuì eq Sô mai hku kat é hui sû za a nghut le gi, Garai Gasâng é mîngdán má wó wâng râ a nghut. 6 Gùngsho mai hku kat é gi, gùngsho nghut ri; Sô mai hku kat é kúm gi, sô nghut ri. 7 ‘Núngmòq gi, dum hku é hui râ lhê’ nghû Ngò taî é dang lé, nàng hkâ-maú nyî. 8 Haû, laì gi, yhang nau é shut ló lhê. Laì lò htê lé nàng wó gyo kôlhang, laì hká mai lo é eq, hká shut ló é lé, nàng sé râ a nghut; haû Sô mai hku kat huî é sû, ó yùq nghut kôle, haû eq rajung za nghut lhê.” ga tû taî ri.
9 Haú hkûn, Nikodimu gi, “Haû gi, hkâsu wó dùt râ lhú?” ga myî ri.
10 Yesuq tû taî é gi, “Nàng gi, Isira-elaq byu pê é sará rayùq nghut to luî nhîng, haú hkyô pé lé a sê gyo lhú? 11 Ngò, nang lé teng za taî kyo lé, ngá-mòq gi, ngá-mòq sê é hkyô lé taí mù, ngá-mòq myang wú bê lé sàksé hkâm lhê; nghut kôlhang, núngmòq gi, ngá-mòq é sàksé lé a hàp yù kó nghut ri. 12 Ngò gi, núngmòq lé, mingkan eq sêng é hkyô lé taî kyô le lháng, a lùmjíng kô é nghut le gi, mauhkûng mîngdán eq sêng é hkyô lé taî kyô é nghut le gi, hkâsu kut wó lùmjíng kôrâ lhú? 13 Mauhkûng mîngdán mai gyó lo é sû, haû Byu Yhangzo mai lai luî, mauhkûng mîngdán má ó yùq lháng wó dòq ló wú é a nghut. 14 Mosheq gi, yòso má lhângmuì lé tu shap tô é su, haû Byu Yhangzo le tu shap tô é hui ra râ nghut lhê. 15 Haû mù, haû Byu Yhangzo lé lùmjíng é yùq hkangmó gi, ahtum abyùq é chyungxe wó yû râ nghut lhê.
16 Hkâsu mù gâ le, Garai Gasang gi, mingkan lé gyai yhang chyitdàp é yánmai, Yhang Zo lé lùmjíng é sû ó yùq nghut kôle, htên byòq é a huî é za, ahtum abyùq é chyungxe wó yû sháng gàq ga, rayùq zâ é Yhâng é Zote lé byî pyám bê nghut ri. 17 Hkâsu mù gâ le, Garai Gasang gi, mingkan lé mara byi râ matú, Yhang Zo lé mingkan htoq má nhang kat é a nghut é za, Yhâng é yánmai mingkan hkyi yu é hui râ matú shèq nhang kat é ru nghut lhê. 18 Yhang lé lùmjíng é sû gi, mara byî é hui râ a nghut; nghut kôlhang, Yhang lé a lùmjíng é sû kúm gi, Garai Gasâng é Yhangzo zote lé a lùmjíng é sû nghut é yánmai, mara byî é huî to gù bê nghut ri. 19 Maubó gi, mingkan htoq má lé jé to bê; nghut kôlhang, byu pé kut é hkyô gi, agè ashop hkyô nghut é yánmai, yhángmòq gi, maubó lé chyit râ malaî, mauchut lé chyit akô nghut ri; haû gi, mara byî é hui râ hkyô yhang nghut ri. 20 Agè ashop hkyô kut é sû ó yùq nghut kôle, maubó lé a nguì nghut ri; haú yùq gi, yhang kut é hkyô lhoqbyông htoq kat râ lé gyùq é yánmai, haû maubó shut lé lô râ a nghut. 21 Nghut kôlhang, haû tengmán hkyô dông chyungxe dui é sû ó yùq le, yhûmsîng kut é hkyô gi, Garai Gasang lom é hkyô lé, san za byu-myàng sháng gàq ga, haû maubó shut lé lo ri.” gâ ri.
Yesuq Eq Séng Luî, Wuìmyhup Sará Yohan Sàksé Hkâm É Hkyô
22 Hau htâng má, Yesuq gi, Yhâng é chángzô pé eq rahá, Yuda mau shut wang ló mù, haú má rayòq zo nyì luî, wuìmyhup hkám byî ri.
Yohan 3:22-36
23 Haú u lé, Yohan gi, Salim nàm mâ é E‑nun gâ é jowò má, wuì gyai myo jòq é yánmai, wuìmyhup hkám byî nyi ri; byu pé gi, abyìt alan lé lò kômù, wuìmyhup lé hkâm yu nyi bum akô nghut ri. 24 (Haû gi, Yohan lé htóng a lhoqhkyó shî é hkun lhê é hkyô nghut ri.) 25 Haú hkûn, Yohan é chángzô pé ra-am eq Yudaq byù rayùq gi, lhoqsan lhoqyúng hking eq séng luî, dang htíng htîng lhûm bum akô nghut ri. 26 Hau htâng, yhángmòq gi, Yohan chyáng lé luî, “Rabai ê, Yodan làng hé hpoq shut nàng eq rahá nyì luî, nang èq sàksé hkám byî é Sû gi, ahkuî, wuìmyhup hkám byî nyi é nghut mù, yùq hkangmó gi, Yhâng chyáng e bum akô nghut ri mhaî.” ga, yhang lé taî akô.
27 Haû eq séng luî, Yohan tû taî é gi, “Byù rayùq gi, mauhkûng mai byî é za a nghut jáng, haî le wó hàp yù râ a nghut. 28 ‘Ngò gi, Hkrisidùq a nghut, Yhâng é hí má nhang kat huî é sû za nghut lhê.’ nghû, ngò taî é lé, núngmòq yhang sàksé nghut bum akô. 29 Myisik wó é sû gi, lusik nghut ri. Lusik lé, láng yàp tô é luzúm hpó gi, lusik é htê lé wó gyô é yánmai, gyai yhang gabú nyi ri. Haû sû é gabú hkyô gi, ngá é gabú hkyô nghut mù, ngò má byíng jùp nyì bê nghut ri. 30 Yhang gi, kô jàt lò ra râ nghut lhê; ngò gi, yom ló ra râ nghut lhê.
31 Ahtoq mai lé é Sû gi, lhúnglhâng é ahtoq má nghut ri; myigùng htoq mâ é sû kúm gi, myigùng htoq eq sêng é nghut luî, myigùng htoq eq sêng é dông za taî ri; mauhkûng mai lé é Sû gi, lhúnglháng é ahtoq má nghut ri. 32 Yhang gi, wó myâng wó gyô é hkyô lé, sàksé hkám kôlhang, Yhang hkâm é sàksé lé, ó yùq le a hàp yù kó nghut ri. 33 Yhâng é sàksé lé hàp yu é sû kúm gi, haû Garai Gasang gi, tengmán sû nghut ri ga, sàksé shit é sû nghut bê. 34 Garai Gasâng èq nhang kat é hui Sû gi, Garai Gasâng é mungdang lé taî ri; hkâsu mù gâ le, Garai Gasang gi, haû Sô lé, laké a kat é za byî é yánmai nghut ri. 35 Haû Îwa gi, Zo lé chyitdàp luî, jung hkangmó lé Yhâng é lòq má àp byi bê nghut ri. 36 Haû Zo lé lùmjíng é sû ó yùq nghut kôle, ahtum abyùq é chyungxe wó lhê; nghut kôlhang, haû Zo lé he-ngìk pyâm é sû ó yùq nghut kôle, chyungxe haû lé myàng râ a nghut; hkâsu mù gâ le, Garai Gasâng é nhikmó-yo hkyô gi, yhâng chyáng ru joq nyi ri.” gâ ri.