Yesuq, Dum Dui Toq É Hkyô
24
Bánno Buìnyì htang nàpsûn noq le, myiwe wuì gi, yhángmòq hen tô é namngón jung pé lé yu chûng mù, lùp shut e ló akô. 2 Yhángmòq gi, lùp mâ é lùqhkum lêng bóng to láng é lé, ê myâng kômù, 3 wang e wú kô le, haû Yhûmsîng Yesuq é gùngsôm lé, a myàng lo kó nghut ri. 4 Yhángmòq myìt maú gyàmkyô nyi bùm kô é hkûn, radá dâm maulhap su dùq bó é mèbu wùt é byù í yuq, yhángmòq é nàm má yàp tô akô. 5 Haû mù, myiwe haú bang gi, gyùq dan bum kôluî, myigùng shut myòqdong ngóm gòp tô bum é u lé, haú nhik gi, “Núngmòq gi, duì sû lé, shi to bâng chyáng haî mù ho nyi akô lhú? 6 Yesuq gi, shí má a nyì lo; Yhang dui toq lô bê! Yhang gi, núngmòq eq rahá Galile mau má nyi tô ashî hkûn lé, 7 ‘Haû Byu Yhangzo gi, yubàk dàp bâng é lòq má àp pyâm é hui luî, tapzîng má jén sat to huî é htâng, sum nyí nghu é buìnyì má lhoqdui toq yu é hui râ nghut lhê.’ ga núngmòq lé taî tô é dang lé myìtbun keq.” ga luî, yhángmòq lé taî ri. 8 Haú hkûn, yhángmòq gi, Yesuq é dang lé bûn kat bekô nghut ri.
9 Yhángmòq gi, lùp mai dum taû lò mù, lagyo raxe rayùq eq gótû lhúnglhâng bang lé, haú hkyô bànshoq lo taî kyô akô. 10 Lagyô pé lé lo taî kyo bang gi, Magadalaq wà mâ é Mariq, Yo‑anaq, Yakuq é yhâng nu Mariq eq, yhángmòq eq rahá nyi é myiwe góbang le nghut akô. 11 Lagyô pé kúm gi, yhángmòq é dang lé dang gê su a ngam pyám kôluî, a jíng byi kó nghut ri. 12 Nghut kôlhang, Petiruq gi, toq luî lùp má din jé ê mù ngóm wú kat le, màng htup é pán lèq tô é lé za myàng mù luî, haû su dùt é hkyô lé maú é eq, yhûm shut dum taû ló byùq bê nghut ri.
Chángzo Í Yùq Lé Yesuq Htoq Shit É Hkyô
13 Haû ra-nyí má za, Yesuq é chángzô pé mâ é í yùq gi, Yerusalem wà mó mai nyhit déng kô wê é Ema‑u gâ é wà shut e ló akô. 14 Yhángnhik gi, dùt laî ló é hkyô pé bànshoq lé, rayùq eq rayùq taî lhûm nyi akô. 15 Yhángnhik gi, haú hkyô pé lé rayùq eq rayùq taî hpyê lhûm e ló kô le, Yesuq gi, yhángnhik chyáng jé lé lô mù, yhángnhik eq rahá sô nyi ri. 16 Nghut kôlhang, yhángnhik gi, myòq hpuq hpuq pyám byî é hui kômù, Yhang lé a wú sê byùq kó nghut ri.
17 Haú hkûn, Yesuq gi, yhángnhik lé, “Núngnhik hkyô so uchyang taî lhûm lé lo é gi, haí jung wá nghut akô lhú?” ga myî kat jáng, yhángnhik gi, myòqdong shûm kut luî, hkyîng yàp tô akô. 18 Yhángnhik mâ é Hkilupa gâ é sû gi, “Nàng gi, Yerusalem wà mó má lé bíng nyî luî nhîng, shí gyoro lé haû wà má dùt lo é hkyô pé lé, a sê é bíng gi, Nàng baú za wá nghut lhê lhú?” ga myî kat ri.
19 Yhang gi, “Haî jung lhú?” ga dum myî é hkûn lé, yhángnhik gi, “Nazaret wà byù Yesuq é hkyô nghut lhê; haú yùq gi, Garai Gasâng é hí má le, byù lhúnglhâng bâng é hí má le, nhut shô hpàqchyî a-tsam eq hkyî lòq a-tsam má wum-o bo é sû myìqhtoi nghut ri. 20 Nghut kôlhang, hkyangjong agyi pé eq ngá-mòq é zau sûwún wui èq haú yùq lé sat pyám râ matú àp byî pyám kômù, yhángmòq gi, Yhang lé tapzîng má jén sat pyám bekô nghut ri. 21 Ngá-mòq kúm gi, haú yùq lé, Isira-elaq byù myû lé hkyi yù râ sû nghut lhê nghû luî, myìt myòqbyu nyi bum lhê. Nghut kôlhang, haû su dùt laî ló é gi, hkû-nyí sum nyí lháng bò bê. 22 Hau htoq agó, hkû-nàp noq le, lùp má ê wú é, ngá-mòq hpúng mâ é myiwe wuì ra-am gi, ngá-mòq lé, lo lhoqmaú akô. 23 Yhángmòq gi, Yesuq é gùngsôm lé a myàng jáng dum taû lò mù, ‘Haû Yhûmsîng dui nyi ri.’ ga luî, taî kyô é maumang lagyo htoq shit é shing-rán lé, myang é hkyô lé lo taî kyô akô. 24 Haû mù, ngá-mòq é luzúm wuî ra-am gi, lùp má ê wú kô le, myiwe wuì taî é eq rajung za, dùt to láng é lé ê myang akô. Nghut kôlhang, haú yùq lé gi, yhángmòq a myàng kó gâ.” ga luî, Yhang lé taî kyô akô.
25 Haú hkûn, Yhang gi, “Myìqhtoî pé taî é dang bànshoq lé lùmjíng râ matú, hpàqchyî a bo é eq ngha é sû nhik ê, 26 Hkrisidùq gi, haû sû é wuîhke jamjau hkâm zô yu é htâng má shèq, Yhâng é hpungwup shingkang má wó wang nyi to râ, a nghut kó lhú?” ga luî, yhángnhik lé myî ri. 27 Yhang gi, yhángnhik lé, Mosheq kâ tô é eq myìqhtoî pé bànshoq bang kâ tô é Chyúmdang pé mai, Yhang má âng é dang bànshoq é lichyúm lé, taî hpông kyô ri.
28 Ahkuî, yhángmòq, haú nhik e ló é wà má chyâng lò kôjáng, Yesuq gi, laî ló râ su kut ri. 29 Haú hkûn, yhángnhik gi, “Ngá-nhik eq rahá wang bíng sháng; hkâsu mù gâ le, buìgyùm bê mù, mau le chut lô bê nghut ri.” ga luî, Yhang lé wum kat chôm lung nyi akô. Haû mù luî, Yesuq gi, yhángnhik eq rahá wang bíng bê nghut ri.
30 Yesuq gi, zang zo râ ga, yhángnhik eq rahá zung tô é hkûn, mùk lé yù luî, jeju hkya-on mù, myhik hpé luî, yhángnhik lé gàm byî ri. 31 Haú hkûn, yhángnhik é myòq bóng lô luî, Yesuq nghut é lé bûn sé kat bekô. Yesuq kúm gi, yhángnhik chyáng mai byùq ló byùq bê nghut ri. 32 Haû mù, yhángnhik gi, “Yhang gi, hkyô má ngá-nhik eq nyo lhûm é eq Chyúmdâng é lichyúm taî hpông shit é hkûn, ngá-nhik gi, i‑myìt ûnghkaû má, achyî a-ku dùt bê a nghut lhú?” ga luî, yhángnhik yhangchang taî lhûm akô.
33 Yhángnhik gi, toq mù, radá dâm Yerusalem wà mó shut dum taû ló kô le, lagyo raxe rayùq eq, yhángmòq eq rahá nyi é bang zùp míng to kô é lé ló myang akô. 34 Haú bang gi, “Haû Yhûmsîng gi, teng za yhang dum dui toq ló bê; Simun lé lháng htoq shit bê nghut ri.” ga taî lhûm nyi bum akô. 35 Haú hkûn, yhángnhik gi, hkyô má dùt laî ló é hkyô pé eq, mùk hpê é hkûn má Yesuq lé bûn sé kat é hkyô lé, taî kyô akô nghut ri.
Chángzô Pé Lé Yesuq Htoq Shit É Hkyô
36 Yhángmòq haú hkyô lé chôm taî nyi tô bum ashî le, Yesuq gi, Yhânggùng yhang, yhángmòq é agùng má yàp to luî, “Núngmòq nguì ngón yùqyo nyì sháng gàq.” ga luî, yhángmòq lé taî ri.
37 Yhángmòq kúm gi, gyùq dan byùq bùm kômù, sôbyô lé myàng bê ga myìt yu pyâm bum akô. 38 Haû mù luî, Yhang gi, “Núngmòq gi, haî mù dan nyi bum akô lhú? Haî mù núngmòq é i‑myìt ûnghkaû má uq-ô nyi bum akô lhú? 39 Ngá é lòq eq Ngá é hkyî lé wú wú keq. Ngò yhang nghut nyi lhê. Ngo lé sop wú keq. Sôbyô nghu é gi, ngo lé núngmòq myang é su, sho eq showui showang bo é a nghut.” ga luî, yhángmòq lé taî kyô ri.
40 Yhang gi, haû su ga taí mù, Yhâng é hkyî lòq lé tûn shit ri. 41 Yhángmòq gi, gabú é eq maú nyi bùm kômù, a wó jíng shi dùt tô é hkûn lé, Yesuq gi, “Núngmòq shí má zôjung rajung jung wó akô lhú?” ga luî, yhángmòq lé myî kat ri. 42 Haú hkûn, yhángmòq gi, nyhîn nyhoq tô é ngozo rahtung lé, byî akô. 43 Yhang gi, haû lé yù mù, yhángmòq é hí má zô shit ri.
44 Hau htâng, Yhang, yhángmòq lé taî é gi, “Mosheq é târâ eq, myìqhtoi laiká pé má le, Hkya-on Kúngtôn Laiká pé má le, Ngò eq séng luî kâ to má kâ to bànshoq gi, dìk râ chyat nghut lhê nghû luî, núngmòq eq rahá nyi tô ashî hkûn lé, Ngò, núngmòq lé taî kyô tô é pé gi, shî nghut bê.” ga taî ri.
45 Hau htâng, Yhang gi, Chyúmdang pé lé sê gyo shoq ga, yhángmòq é i‑myìt hkum hpóng byî ri. 46 Haû mù, Yhang gi, “Hkrisidùq gi, wuîhke jamjau hui zo mù, sum nyí nghû râ buìnyì má, shi é mai dum dui toq lô râ hkyô lé le, 47 Yerusalem wà mó mai hî luî, byù myû chângjup lé, Yhâng é myìng lé lang luî yubàk mara hkyut pyám byi râ hkyô eq myìt lhîng râ hkyô lé le, hko kyo râ hkyô lé, kâ to bê nghut ri. 48 Núngmòq gi, shí pê é sàksé pé nghut nyi akô. 49 Ngá wa danghtum htûm tô éa lé, Ngò, núngmòq é ahtoq má nhang kat râ nghut lhê; núngmòq kúm gi, htoq tsáng myhâng mâ é wum-o a-tsam wó yu é buìnyì jé shoq, Yerusalem wà mó má láng nyî keq.” ga luî, yhángmòq lé taî ri.
Yesuq Mauhkûng Shut Shuî Toq Yû Huî É Hkyô
50 Hau htâng, Yhang gi, yhángmòq lé Behtani wà yàm shut shuî htoq ê mù, Yhâng é lòq tu toq luî, shimân byî ri. 51 Haû su kut shimân byî nyi ashî le, Yhang gi, yhángmòq chyáng mai gâng ló byùq luî, mauhkûng shut shuî toq yu é hui bê nghut ri. 52 Yhángmòq kúm gi, Yhang lé noqkuq kômù luî, gyai gabú é myìt èq Yerusalem wà mó shut dum taû ló akô. 53 Yhángmòq gi, noqkuq yhûm má nyi to mù, Garai Gasang lé hkya-on kúngton nyi bum akô nghut ri.