Yesuq Lé Mara Hun É Hkyô
23
Haú hkûn, zùp zîng tô é bang bànshoq gi, htoq mù, Yesuq lé mau zau Pilat chyáng shuî wang ê luî, 2 “Shí yùq gi, mingbyû wuì lé hkyô shuî nghoq é eq, hkóséng Kehtaq chyáng hkán kat râ hkyô lé le hkûm to luî, Yhânggùng yhang gi, haû Hkrisidùq nghu é hkóhkâm nghut lhê ga luî, taî nyi é lé ngá-mòq myang ri.” ga luî, Yhang lé mara hun akô.3 Haú hkûn, Pilat gi, Yesuq lé, “Nàng gi, Yudaq byu pê é hkóhkâm nghut lhê lhú?” ga myi jáng, Yesuq gi, “Nàng taî é eq rajung za nghut lhê.” ga tû taî ri.
4 Pilat gi, “Shí yùq lé hûn râ mara ngò a myàng.” ga luî, hkyangjong agyi pé eq shiwa byu pé lé taî ri.
5 Nghut kôlhang, haú bang gi, “Shí yùq gi, Yuda mau gón má yhang mhoqshit é dông mai, mingbyû wui é i‑myìt lé shuî gabyông ri. Haû gi, Galile mau mai ahkuî shî má jé shoq nghut bê nghut ri.” ga zùq zùq taî bum akô.
6 Pilat gi, haû su ga kô é lé wó gyo jáng, Yesuq Galile byù nghut é, a nghut é hkyô lé myî wú ri. 7 Yesuq gi, Herot ùp é mau mâ é byù nghut é lé Pilat sé jáng, haú u lé Yerusalem wà mó má nyi tô é Herot chyáng, ê dé kat nhang ri.
8 Herot gi, Yesuq lé myàng jáng, gyai yhang gabú pyâm ri. Hkâsu mù gâ le, Yhâng é hkyô lé wó gyô wú mù, Yhang làklaí alhô agàn ralhum lhum kut shit râ lé, wó myâng shoq ga, myìt myòqbyu nyi é nghut luî, Yhang lé myàng nau é gyai yhang myáng bê nghut ri. 9 Haû mù, yhang gi, Yesuq lé dangmyi myo myô èq myî wú kôlhang, Yesuq gi, dang rahkun lháng a tû taí byi nghut ri. 10 Hkyangjong agyi pé eq târâ sará pé gi, yàp to mù, Yhang lé mara gyai yhang chôm hun akô. 11 Herot eq yhâng é gyèzô pé gi, Yesuq lé rhoî jihkyoî kut mù, a-tam é dông taî hpoî kôluî, réng é mèbu hut byi mù, Pilat chyáng dum taû dé nhang kat akô. 12 Haú nyí jáng, hí hpyang gyè dùt lhûm é Herot eq Pilat gi, buìnùm dùt byùq bekô nghut ri.
Yesuq Lé Sat Râ Matú Dòqdân É Hkyô
13 Haú hkûn, Pilat gi, hkyangjong agyi pé eq zau sûwún wuî, mingbyû wuì lé wùt tsîng to mù, 14 “Shí yùq gi, mingbyû wuì lé hkyô shuî nghoq ri ga, Yhang lé núngmòq ngá chyáng shuî lé lô bekô. Ahkuî, wú keq, núngmòq é hí má, Yhang lé ngò myî wú le, Yhang má núngmòq hun é mara lé ngò a myàng nghut ri. 15 Hau htoq agó, Herot le, hai mara le a myàng mû, shí yùq lé ngá-nhûng chyáng dum dé kat byi bê nghut ri; haû mù luî, wú keq, shí yùq gi, shî gíng é mara haî le a kut shut nghut ri. 16 Haû mù, ngò, Yhang lé dam byi luî, nhang pyám râ.” ga luî, yhángmòq lé taî ri.
17 Nghut kôlhang, Lhoqlhai Poî hkangmó má, Pilat gi, mingbyû wuì lé htóngbyû rayùq yùq nhang kat byi byi kut é yánmai, 18 yhángmòq bànshoq bang gi, “Shí yùq lé gi, yu pyám aq; Barabaq lé kúm gi, nhang kat byi laq.” ga luî, chôm wùt garû bum akô. 19 Barabaq gi, wà htum má gumlau kut é eq byù sat é yánmai, htóng gyó nyî sû nghut ri.
20 Pilat gi, Yesuq lé nhang pyám nau é nghut mù luî, yhángmòq lé dum puq taî ri. 21 Nghut kôlhang, yhángmòq gi, “Yhang lé tapzîng má jén tap pyám aq, jén tap pyám aq!” ga luî, wùt taî garû nyi bum akô.
22 Haû mù luî, sum dâm nghû râ hkûn, Pilat dum taî é gi, “Haî mù luî lhú? Yhang gi, hai mara kut shut bê lhú? Yhang má shî gíng é mara lé ngò a myàng, haû mù, ngò, Yhang lé bàt, nhuq, mhoqshit luî, nhang pyám râ.” ga luî, yhángmòq lé taî ri.
23 Yhángmòq gi, Yesuq lé tapzîng má wó jén sat pyám shoq ga, zùq zùq htê mó o mó èq dûng wùt nyi akô nghut é yánmai, wó taî ung yù bekô nghut ri. 24 Haû mù luî, Pilat gi, yhángmòq dûng é eq rajung za myìt hpyit dòqdan byî ri. 25 Haû su mù, yhang gi, yhángmòq dûng é eq rajung za, wà htum má gumlau kut é eq byù sat é mai, htóng gyó nyî sû lé nhang kat byi luî; Yesuq lé gi, yhángmòq ô nau é dông àp byî kat bê nghut ri.
Yesuq Lé Tapzîng Htoq Má Jén Tap É Hkyô
26 Yhángmòq gi, Yesuq lé shuî htoq ló kô é hkûn, yòsô wà mai lo é, Kuruni wà mó byû nghut é Simun ga sû lé, chyup yû mù, tapzîng wàq nhâng luî, Yesuq htâng má cháng nhang akô. 27 Byù rajùm rayò gi, Yhâng htâng má châng e ló bum akô. Yhâng é yánmai ngaùbyi ngaùnhap eq iyon yôn é myiwe zo wuì le haú má bo tô ri. 28 Yesuq gi, yhángmòq shut lhîng wú luî, “Yerusalem byìzo wuì ê, Ngá é yánmai hkâ-ngau nyì kó, núngmòq gi, yhûmsing gùng eq yhûmsing é zodù wui é matú shèq ngau nyì keq. 29 Hkâsu mù gâ le, ‘Zogûng a dùt wú é eq naú a huq wú é baùdung myhí pé gi, hkungsô wó nyi ri.’ ga luî, taî é buìnyì gi, jé lô râ nghut lhê. 30 Haú buìnyì má, byu pé gi, bùm pé lé,
‘Ngá-mòq ahtoq má byòq nhé aq!’
ga luî le, kong pé lé,
‘Ngá-mòq ahtoq má nghop àq!’a
ga luî le, wùt taî bùm bekô râ nghut lhê. 31 Byu pé gi, sikgâm jûm tô ashî le îsu kut kô é nghut le gi, màn jáng gi, hkâsu wá dùt lò râ lhú?” ga taî ri.
32 Haú hkûn, da-myàq í yùq lé le, sat pyám râ ga, Yesuq eq rahá shuî htoq ló akô. 33 Ahkuî, Ugyap nghu é kong má jé jáng, Yesuq lé tapzîng htoq má jén tap tô é hkûn, da-myàq í yùq lé le, lòqpai lòqyò shut kut luî tapzîng má jén tap tô akô. 34 Haú hkûn, Yesuq gi, “Âwa ê, yhángmòq lé mara hkyut pyám byi laq; hkâsu mù gâ le, yhángmòq kut é hkyô lé yhángmòq a sé kó nghut ri.” ga taî ri. Gyèzô pé gi, Yhâng é mèbu pé lé lháng, hkyîn shosé she é dông gam yu pyám byî akô.
35 Mingbyû wuì gi, yàp to mù tu wú nyi akô. Zau sûwún wuî Yhang lé nyhàp é gi, “Yhang gi, byù góbang lé hkyi yu é sû nghut ri. Yhang gi, Garai Gasang hkyin yu é sû Hkrisidùq nghut le gi; Yhânggùng yhang le hkyi yu wú sháng gàq.” gâ akô.
36 Gyèzô pé le, huî ê mù, rhoî nyaú nyaú akô. Yhángmòq gi, chyîn wing lé yhun byi kôluî, 37 “Nàng gi, Yudaq byu pê é hkóhkâm nghut é nghut le gi, Náng gûng yhang nàng, hkyi yu wú aq.” ga Yhang lé taî akô.
38 Yhâng é ulhum ahtoq má le, Grik dông le, Latin dông le, Hebre dông le, “SHÍ YÙQ GI, YUDAQ BYU PÊ É HKÓHKÂM.” gâ é laiká kâ tap tô akô.
39 Tapzîng htoq má bàt tap lhâng to huî é da-myàq rayùq gi, “Nàng gi, Hkrisidùq nghut lhê, a nghut lhú? Haû Náng gûng nàng le, ngá-nhik lé le, hkyi yù àq.” ga luî, Yhang lé rhoi ri.
40 Da-myàq góyùq sû kúm gi, “Nàng le shí yùq eq rajung za jén tô é hui luî nhîng, Garai Gasang lé a gyùq lhú? 41 Ngá-nhik gi, yhûmsîng kut shut é mara eq rajung za, jéyáng hui zo gíng é sû nhik nghut lhê; shí yùq kúm gi, hai mara lé kut shut wú sû a nghut.” ga luî, haú yùq lé tân kat ri.
42 Hau htâng, yhang Yesuq lé taî é gi, “Yesuq ê, Nàng, Náng é mîngdán má jé ló jáng, ngo lé myìtbun laq ô.” gâ ri.
43 Haú hkûn, Yesuq gi, “Ngò, nang lé teng za taí lé, hkû-nyí yhang nàng Ngò eq rahá hparadisub má nyì râ nghut lhê.” ga luî, yhang lé tû taî kat ri.
Yesuq Kângsoq Byìt É Hkyô
44 Haú ahkyíng gi, nyí káng raxe í hkyíng nghut luî, myínhtâng sum hkyíng jé shoq ra-mau gón mauchut tuq dùt byùq bê nghut ri;c 45 hkâsu mù gâ le, buìloq shum byùq é yánmai nghut ri. Noqkuq yhûm mâ é pán-gyang le, í hkyam byáng dùt byùq bê nghut ri. 46 Haú hkûn, Yesuq gi, “Âwa ê, Ngò, Ngá é sô náng é lòq má àp byî lhê.” ga htê mó èq garû kat ri. Haû su ga ban taí eq, Yhang kâng byìt bê nghut ri.
47 Shô ùp gyèzau hpó gi, haû su dùt é lé myàng jáng, “Shí yùq gi, gè gè yhang, díngmán sû nghut ri.” ga luî, Garai Gasang lé hkya-on kúngton ri. 48 Haû hkyô lé wú râ ga, lé zîng tô é byù lhúnglhâng bang le, haû su dùt é hkyô pé lé myàng kôjáng, myìt yón kôluî, wànggàng bàt mù, dum taû ló byùq bekô. 49 Nghut kôlhang, Yhang lé sê é bang eq Galile mau mai Yhâng htâng châng é myiwe wuì gi, we we má yàp to mù, haú hkyô pé lé byu wú nyi akô.
Yesuq É Màng Lé Lùp Hkaû Má Kat É Hkyô
50 Haú hkûn, Yuda mau Aramahti gâ é wà mó má, Yosep gâ é sû rayùq nyi ri. Haú yùq gi, nhik bo é sû eq díngmán é sû nghut é htoq agó, Garai Gasâng é mîngdán jé râ hkyô lé myìt myòqbyu to sû le, nghut mù luî, 51 yhang gi, Yudaq ùphkâng hpúng mâ é rayùq nghut kôlhang, hpyê lhûm é hkyô má le, zui saî é hkyô má le, myìt a bo huî lom é sû nghut ri. 52 Yhang gi, Pilat chyáng wàng luî, Yesuq é gùngsôm lé dûng yu ri. 53 Haû mù, gùngsôm haú lé tapzîng mai hkyut hkyô yù luî, pán yúng èq htup yùp mù, ó lé lháng a kat wú shî é, lùqgòk lé kyûng tô é lùqgòk lùp hkaû má kat tô ri. 54 Haú nyí gi, Hên Lajang Buìnyì nghut luî, Bánno Buìnyì jé râ za nghut bê.
55 Galile mau mai Yesuq eq rahá htoq lé lo é myiwe zo wuî le, Yosep htâng má châng ê luî, lùp haú lé le, Yesuq é gùngsôm lé le, hkâsu kut tô tô é lé, ê myang akô. 56 Hau htâng, yhángmòq gi, yhûm shut taû lò mù, Yesuq é gùng sôm lé bùt byi râ matú, namngón é jung eq mura xû lé hen tô akô. Bánno Buìnyì má kúm gi, târâ jòq é eq rajung za, yhángmòq yuban bân nyi bum akô nghut ri.