Pilat Hí Má Yesuq Jé Nyi É Hkyô
15
Haû nàpkyó noq za má, hkyangjong agyi pé gi, sûwún wuî, târâ sará pé, Yudaq byìn tú wàpdòq gón bang eq rahá kut, chôm bóng yû kômù, Yesuq lé tuî yû luî, shuî htoq ê kômù, mau zau Pilat chyáng ê àp byî akô nghut ri.2 Pilat gi, Yesuq lé, “Nàng gi, Yudaq byu pê é hkóhkâm nghut lhê lhú?” ga myi jáng, Yesuq gi, “Nàng taî é eq rajung za nghut lhê.” ga, tû taî ri.
3 Haû hkyangjong agyi pé gi, Yhang lé mara gyai myo shoq chôm hun akô. 4 Haû mù, Pilat gi, Yesuq lé, “Wú aq, yhángmòq, nàng lé mara haû myhó hun nyi le, nàng, haî le a tû taí lhú?” ga myî ri.
5 Nghut kôlhang, Yesuq gi, haî le a tû taí kut jáng, Pilat gi, maú byùq bê nghut ri.
6 Haû Lhoqlhai Poî u lé, mingbyû wuì dûng é htóng byû rayùq yùq lé, mau zau mai lhaq lhoqhtoq byi byi kut é htûng jòq ri. 7 Haú hkûn, Barabaq gâ é byù rayùq gi, gumlau gabyông é hkûn, byù sat é gumlau bang eq rahá, htóng gyó tô ri. 8 Byù hpûng mó gi, dòq lé lô mù, mau zau Pilat lé, yhang lhaq kut é eq rajung za, yhángmòq lé kut byi râ matú, dûng akô.
9 Haû mù, yhang gi, “Yudaq byu pê é hkóhkâm lé nhang htoq kat byi râ lé, núngmòq ô nau akô lhú?” ga myî ri. 10 Pilat, haû su ga myî é gi, haû hkyangjong agyi pé, Yesuq lé manôn kôluî, yhâng chyáng lé àp byi kô é hkyô lé sê é yánmai nghut ri. 11 Nghut kôlhang, haû hkyangjong agyi pé gi, Barabaq lé shèq nhâng byi râ matú, Pilat chyáng dung kó sháng gàq ga, haû byù mòqmó lé i‑myìt lhoqtoq byî akô.
12 Pilat gi, “Haû jáng, núngmòq mai Yudaq byu pê é hkóhkâm ga sû yùq lé, ngò hkâsu kut râ lhú?” ga yhángmòq lé myî ri.
13 Haú hkûn, yhángmòq gi, “Yhang lé tapzîng má jén sat pyám aq.” ga chôm garû akô.
14 Haû jáng, Pilat gi, “Haî mù luî lhú? Yhang haî kut shut bê lhú?” ga dum myi jáng, yhángmòq gi, htê mó èq, “Yhang lé tapzîng má jén sat pyám aq.” ga je riyhang garû lo bum akô nghut ri.
15 Pilat gi, haû byù mòqmó lé nhik dìk nhâng nau é yánmai, Barabaq lé gi, nhang kat byi mù, Yesuq lé gi, nhuq bàt nhâng mù, tapzîng má jén sat pyám râ matú, àp byî kat bê nghut ri.
Gyèzô Pé Yesuq Lé Rhoi É Hkyô
16 Gyèzô pé gi, Yesuq lé, Piretori yhûmwàng (mau zau hpô é yhûmwàng) mó hkaû má shuî wang ló kômù, gyèdap gón lé ji tsîng yu akô. 17 Hau htâng, yhángmòq gi, Yesuq lé buhîng nè radung hut byi mù, zujánmaú saî yù kôluî, Yhâng é ulhum má tsung byî akô. 18 Hau htâng, yhángmòq gi, “Yudaq byu pê é hkóhkâm hpó ê! Chyung hîng xê hing nyì sháng gàq ô!” ga wùt garû akô. 19 Hau htoq agó, yhángmòq gi, Yhâng é ulhum má dumbáng èq adàm dàm bàt kômù, sôkan byé gyun luî, Yhâng hí má hkyîhput htuq mù, paî mhaû akô nghut ri. 20 Yhángmòq gi, Yhang lé rhoî jihkyoî ban kut yû kôjáng, Yhang wùt tô é buhîng nè lé hkyut yû kômù, Yhâng é mèbu lé dum hut byi luî, tapzîng má jén sat pyám râ matú, Yhang lé shuî htoq e ló bekô nghut ri.
Yesuq Lé Jén Pyâm É Hkyô
21 Alesanderi eq Ruhpu nhiktang é yhâng wa, Kuruni wà mó byû nghut é Simun ga sû gi, yòsô wà mai lò mù, haú jowò mai laî ló ri. Haû hkûn, gyèzô pé gi, yhang lé, tapzîng wàq nhang akô nghut ri. 22 Yhángmòq gi, Yesuq lé, Golagahta gâ é jowò má shuî e akô. (Golagahta gâ é gi, ugyap jòq é jowò lé gâ é nghut ri.) 23 Hau htâng, yhángmòq gi, Yhang lé, muraa eq nyhô tô é tsibyiq wing huq akô; nghut kôlhang, Yhang gi, a lhom shuq byi nghut ri. 24 Hau htâng má, yhángmòq gi, Yhang lé tapzîng má jén tap to kôluî, Yhâng é mèbu pé lé, hkyîn shosé shê mù, âng é dông gam yu pyám byî akô nghut ri.
25 Yhángmòq, Yesuq lé tapzîng má jén tap pyâm é hkûn gi, nàpkyó gau hkyíng nghut bê nghut ri. 26 Hau htoq agó, Yhang lé mara hun é dông kâ tap to kô é gi, “YUDAQ BYU PÊ É HKÓHKÂM” gâ ri. 27 Yhángmòq gi, da-myàq í yùq lé le, Yhâng é lòqyo hkyam shut rayùq, lòqpaî hkyam shut rayùq kut, tapzîng htoq má jén tap tô akô nghut ri. 28 (Haû gi, “Yhang gi, yubàk dàp bâng chyáng nghap lhôm é hui bê nghut ri.”c gâ é Chyúmdang lé lhoqdìk é nghut ri.)b 29 Hkyô sô laî ló é bang gi, nyhap é dông u‑ngut ngut mù, taí kô é gi, “Noqkuq yhûm lé hpyoq pyám luî, sum nyí gyoro má dum wó saî lhê ga Sû ê! 30 Náng gùng nàng hkyi yù luî, tapzîng mai gyó lo wú aq mhaî!” gâ akô nghut ri.
31 Haû eq rajung za, hkyangjong agyi pé eq târâ sará pé le, yhángmòq hkaû má, “Shí yùq gi, góbang lé hkyi yù sû nghut kôlhang, Yhânggùng yhang gi, a wó hkyi yù nghut ri myhî-nhung! 32 Ngá-nhúng wó myâng mù, lùmjíng râ matú, shî, Isira-elaq byu pê é hkóhkâm, Hkrisidùq gi, tapzîng mai gyó lo wú sháng gàq.” ga, Yhang lé rhoî dang taî akô. Yhang eq rahá tapzîng má jén tap to huî é su nhik le, Yhang lé rhoî dang taî akô nghut ri.
Yesuq, Shi É Hkyô
33 Nyí-káng raxe í hkyíng mai myínhtâng sum hkyíng jé shoq, ra-mau gón mauchut tuq dùt byùq bê nghut ri. 34 Myínhtâng sum hkyíng jé é hkûn, Yesuq gi, “Eloi, Eloi, lama sabakhtani.”d ga, htê mó èq garû kat ri. Hau é lichyúm gi, “Ngá Garai ê, Ngá Garai ê, Nàng, haî mù, Ngo lé tô pyâm tô lhê lhú?” gâ é nghut ri.
35 Haú nâm má yàp tô é bang ra-am gi, haú lé wó gyo kôjáng, “Gyô wú keq. Yhang gi, myìqhtoi Eliya lé wùt nyi ri.” ga, taî akô.
36 Haú hkûn, byù rayùq gi, din e ló mù, wuìmaù lé tsibyiq wing chyîn má jum yù luî, jàm yang má tuî tap mù, Yesuq shuq sháng ga yhun byi luî, “Eliya gi, lé lô mù, Yhang lé lé lhoqhkyô yù âbe, ngá-nhúng chôm láng wú sháng.” ga taî ri.
37 Yesuq gi, htê mó èq garû kat luî, kâng byìt byùq bê nghut ri.
38 Noqkuq yhûm mâ é pán-gyang gi, ahtoq mai a‑ô í hkyam byáng dùt byùq bê nghut ri. 39 Yesuq é hí má yàp tô é shô ùp gyèzau hpó gi, Yesuq é garu htê lé wó gyo mù, Yhang hkâsu kut shi é lé myàng jáng, “Shí yùq gi, gè gè yhang, Garai Gasâng é Yhangzo nghut rî-nhung!” ga taî ri.
40 Myiwe wuì ra-am gi, we we mai wú nyi bum akô. Haú bang má, Magadalaq wà mâ é Mariq, Yakuq tiq sû yùq eq Yosep nhiktang é yhâng nu Mariq eq Salome pé le bo akô nghut ri. 41 Haú bang sum yuq gi, Galile mau má, Yesuq htâng cháng mù, Yhang râ é hkyô pé lé châng kut byî é bang nghut akô. Yesuq eq rahá, Yerusalem wà mó má dòq lé lo é myiwe wuì, góbang myo myo le haú má nyi tô bum akô nghut ri.
Yesuq Lé, Myhup Pyâm É Hkyô
42 Haú nyí gi, Hên Lajang Buìnyì (Bánno Buìnyi é hî nyí) nghut ri. Haû mù, myínhtâng jé lô jáng, 43 Yudaq ùphkâng hpúng má bo é, xânghpoq nge wó é, Garai Gasâng é mîngdán lé láng nyi é sû, Aramahti wà byù Yosep gi, myìt wum lhoqkîng yù mù, Pilat chyáng wàng luî, Yesuq é gùngsôm lé ê dûng ri. 44 Pilat gi, Yesuq shî bê gâ é hkyô lé wó gyo jáng, maú byùq ri; haû mù, yhang gi, shô ùp gyèzau lé wùt yù mù, Yesuq shî teng bê lhú ga myî ri. 45 Shî teng bê hkyô lé, shô ùp gyèzaû chyáng mai wó sê yù jáng, Pilat gi, Yesuq é gùngsôm lé yù râ ahkáng, Yosep lé byî kat ri. 46 Haû mù, Yosep gi, pán yúng lé wui yù luî, gùngsôm lé yu hkyó mù, htup yùp luî, lùqgòk lé kyûng tô é lùp hkaû má ê kat tô ri. Hau htâng, yhang gi, lùphkum má, lùqlông èq lhêng myhî pyâm tô ri. 47 Magadalaq wà mâ é Mariq eq Yosep é yhâng nu Mariq gi, Yesuq lé, hká má lheq tô é lé, ê myang akô nghut ri.