Gùngjum Shî Sû Lé, Yesuq Lhoqgê Byî É Hkyô
2
Buìnyì hkâ-myháng a myáng má, Yesuq gi, Kaperina‑um wà má dum wang lò jáng, Yhang yhûm dum taû jé lô bê gâ é hkyô lé, byu pé wó gyô bum akô nghut ri. 2 Haû mù, byù myo myo zîng lé lô kôluî, yhúmhkaû má jowò a jòq lô é htoq agó, hkúmtot má lháng a jòq lo nghut ri; Yesuq gi, yhángmòq lé mungdang hko kyô nyi ri. 3 Haú hkûn, byù myi yuq gi, gùngjum shî sû rayùq lé chôm dang wàq luî, Yhâng chyáng lé lo akô. 4 Yhángmòq gi, byù lûm myô chyîn chyap to mù, byù haú yùq lé Yesuq chyáng a wó shuî jé ê kô é yánmai, Yesuq é u htoq mâ é yhûmhkûng lé dong htông yù luî, gùngjum shî sû lé taphkang eq roq hkyô kat akô nghut ri. 5 Yesuq gi, yhángmòq é lùmjíng myìt lé byu-myàng jáng, gùngjum shî sû lé, “Ngá zo ê, náng é yubàk mara lé hkyut pyám byi bê.” ga taî ri.6 Haú hkûn, târâ sará pé ra-am gi, haú má zung to kôluî, yhángmòq é i‑myìt ûnghkaû má, 7 “Byù shí yùq gi, haî mù luî haû su gâ lhê làq? Yhang gi, Garai Gasang lé rhoî dang taî nyi ri; Garai Gasang mai lai luî, ó yùq wá mara wó hkyut byi râ lhú?” ga luî, myìt són wuî nyi bum akô nghut ri.
8 Yesuq gi, yhángmòq é ûnghkaû má myìt wú nyî kô é hkyô lé, radá dâm Yhâng é myìt mai sé mù, “Núngmòq é i‑myìt hkaû má, haî mù haû su nghû myìt són wuî nyi bum akô lhú? 9 Haû gùngjum shî sû lé, ‘Náng é yubàk mara lé hkyut pyám byi bê.’ nghû taî é dang eq, ‘Toq àq, náng é taphkang lé yù mù, hkyô so aq.’ nghû taí râ má, hká hkun je taí lui lhê lhú? 10 Nghut kôlhang, haû Byu Yhangzoa gi, mingkan htoq má, mara hkyut byi râ ahkáng wó Sû nghut é lé, núngmòq lé sé nhâng nau lhê.” ga, yhángmòq lé taî kat ri. 11 Hau htâng, Yhang gi, haû gùngjum shî sû lé, “Ngò, nang lé taí bá, toq àq, náng é taphkang lé yu chûng luî, yhûm taû ló àq hkoi.” ga taî ri. 12 Haú yùq gi, toq mù, yhâng é taphkang lé yu chûng luî, yhángmòq bànshoq bang wú tsuq tô é myòq hí mai sô htoq ló byùq bê nghut ri. Hau é yánmai, yùq hkangmó gi, maú hong bùm kômù, “Îsû é hkyô gi, hkâ-nhám lháng a myang wú shi.” ga, Garai Gasang lé hkya-on kúngton bum akô nghut ri.
Lewiq (Mahte) Lé Wùt Yu É Hkyô
13 Yesuq gi, nhông yàm má radàm dum htoq e ri. Haú hkûn, byù mòqmó gi, Yhâng chyáng jé lé lo bùm kômù, Yhang gi, haú bang lé lhom mhoqshit nyi ri. 14 Yhang gi, sô yông ló nyi é hkûn, hkán hkyuî zúm má zung tô é, Alahpe yhang zo Lewiq lé myang kat luî, “Ngá htâng cháng aq.” ga taî ri. Haú hkûn, Lewiq gi, toq luî, Yhâng htâng cháng bê nghut ri.
15 Yesuq gi, Lewiq é yhûm má myínzang ê zô nyi é hkûn, hkán hkyuî bang myo myo eq yubàk dàp bang le, Yhang eq Yhâng é chángzô pé eq rahá zo shuq bum akô. Hkâsu mù gâ le, Yhâng htâng châng é bang gi, ajùm ayò nghut é yánmai nghut ri. 16 Târâ sará nghut é Hparishe pé ra-am gi, yubàk dàp bang eq hkán hkyuî zo bang le mù rahá, Yesuq zang zô nyi é lé myàng kôjáng, Yhâng é chángzô pé lé, “Yhang gi, haî mù luî, hkán hkyuî bang eq yubàk dàp bang eq rahá zo shuq nyi lhê lhú?” ga myî bum akô nghut ri.
17 Haû su ga myi kô é lé Yesuq wó gyo jáng, Yhang gi, yhángmòq lé, “Wángzán bang gi, chi sará a ra kó, nòhpyo hui bang za shèq ru râ lhê. Haû eq rajung za, Ngò gi, díngmán bang lé wùt yù râ matú jé lé é a nghut, yubàk dàp bang lé ji yù râ matú shèq jé lé é ru nghut lhê.” ga taî kat ri.
Zoshuq Tûm É Eq Sêng É Hkyô
18 Yohan é chángzô pé eq Hparishe pé gi, zoshuq tûm nyi akô nghut ri. Haû mù, ra-am gi, Yesuq chyáng jé lé kômù, “Wuìmyhup Sará Yohan é chángzô pé eq Hparishe pê é chángzô pé gi, zoshuq tûm akô; nghut kôlhang, náng é chángzô pé gi, haî mù a túm kô é lhú?” ga luî, myî akô nghut ri.
19 Haú hkûn, Yesuq tû taî é gi, “Bíng pé gi, lusik eq rahá nghut nyi tô ashî hkûn, zoshuq hkâsu wó túm râ lhú? Yhángmòq gi, lusik eq rahá nghut nyi é u lé, zoshuq túm kôrâ a nghut. 20 Nghut kôlhang, lusik lé yhángmòq chyáng mai shuî yu pyâm é hkyíng jé râ nghut lhê; haú buìnyì pé má kúm gi, yhángmòq, zoshuq túm kôrâ nghut lhê.
21 Ó yùq le, mèbu xau má pán sik èq a lhaq hpo wú kó; haû su kut é nghut jáng, pán sik gi, kun byùq mù, mèbu xau lé je lhoqcheq pyám râ nghut lhê. 22 Haû eq rajung za, tsibyiq wing asik lé le, sho-kuq htûng axau má ó a kat wú kó. Kat é nghut jáng, tsibyiq wing asik gi, htûng lé lhoqbùq gòq nhâng luî, tsibyiq wing eq sho-kuq htûng htên byùq râ nghut lhê. Haû mù, tsibyiq wing asik gi, sho-kuq htûng sik má za ge kat é nghut lhê.” gâ ri.
Bánno Buìnyi É Yhûmsîng
23 Bánno Buìnyì ra-nyí má, Yesuq gi, Yhâng é chángzô pé eq rahá yò hkaû mai sô laî ló é hkûn, Yhâng é chángzô pé gi, kyôshi ra-tsuí lângshap yu akô nghut ri. 24 Haû mù, Hparishe pé gi, Yesuq lé, “Wú aq, Bánno Buìnyì má a ge kut jung lé, haî mù, náng é chángzô pé kut nyi akô lhú?” ga taî akô.
25 Haú hkûn, Yesuq gi, yhángmòq lé, “Dawiq lháng gi, yhâng htâng châng é bang eq rahá zò-mut hui luî, zoshuq râ tô é hkûn, hkâsu kut é hkyô lé, núngmòq hkâ-nhám le a nghap wú kó lhú? 26 Abi-ahta, hkyangjong mó kut nyi é u lé, Dawiq gi, Garai Gasâng é yhúmhkaû má wang ê mù, hkyangjông pé mai lai luî, ó le a ge zô é, ting tô é mùk lé yù zo mù, yhâng htâng châng é bang lé le ra-tsuí tsuí byi tsô é nghut lhê.” ga tû taî ri.