Gùngjum Shî Sû Lé Lhoqgê Byî É Hkyô
9
Yesuq gi, lhaî má wàng mù, yhûmsing é wà shut jî dàp ló bê nghut ri. 2 Byù ra-am gi, gùngjum shî sû rayùq lé, taphkang mai Yhâng chyáng wàq lé lo akô. Yesuq gi, yhángmòq é lùmjíng myìt lé byu-myàng jáng, haû gùngjum shî sû lé, “Ngá zo ê, nhik hkâ-ngê; náng é yubàk mara lé hkyut pyám byi bê.” ga taî ri.3 Haú hkûn, târâ sará pé ra-am gi, yhángmòq é i‑myìt hkaû má, “Byù shí yùq gi, Garai Gasang lé rhoî dang taî nyi ri.” ga myìt nyi bum akô nghut ri.
4 Yesuq gi, yhángmòq myìt nyi é hkyô lé sé mù, “Núngmòq é i‑myìt hkaû má, haû su agè ashop é dông haî mù myìt nyi akô lhú? 5 ‘Náng é yubàk mara lé hkyut pyám byi bê.’ nghû taí râ eq ‘Toq luî, hkyô so aq.’ nghû taí râ má, hká hkun je taí lui lhê lhú? 6 Nghut kôlhang, haû Byu Yhangzo gi, mingkan htoq má, mara hkyut byi râ ahkáng wó Sû nghut é lé, núngmòq lé sé nhâng nau lhê.” ga taí luî, haû gùngjum shî sû lé, “Toq aq, náng é taphkang yu chûng luî, yhûm taû ló aq hkoi.” ga taî kat ri. 7 Haû mù, haú yùq gi, toq mù, yhûm shut ló byùq bê nghut ri. 8 Byù hpûng mó gi, haú hkyô lé myàng kôjáng, gyùq maú kômù, byu pé lé haû sû é ahkáng ayá byi tô é Garai Gasang lé hkya-on kúngton bum akô nghut ri.
Mahte lé shuî yu é hkyô
9 Yesuq gi, haú jowò mai sô e ló é hkûn, hkán hkyuî zúm má zung tô é Mahte ga sû lé myàng mù, “Ngá htâng cháng aq.” ga taí jáng, haú yùq gi, toq luî, Yhâng htâng cháng bê nghut ri.
10 Yesuq gi, Mahte é yhûm má myínzang zô nyi é hkûn, hkán hkyuî bang myo myo eq yubàk dàp bang myo myo lé jé kômù, Yhang eq Yhâng é chángzô pé eq rahá zo shuq bum akô. 11 Haú lé, Hparishe pé myàng kôjáng, Yhâng é chángzô pé lé, “Núngmòq é sará gi, haî mù luî, hkán hkyuî bang eq yubàk dàp bang eq rahá zo shuq nyi lhê lhú?” ga myî akô.
12 Yesuq gi, haû su ga kô é lé wó gyo jáng, “Wángzán bang gi, chi sará a ra kó; nòhpyo hui bang za shèq ru râ lhê. 13 ‘Ngò ô nau é gi, hkungga nhông hkyô a nghut, shogyo nhikmyin hkyô shèq ru nghut lhê.’a gâ é lichyúm lé mhoq yû keq. Hkâsu mù gâ le, Ngò gi, díngmán bang lé wùt yù râ matú jé lé é a nghut, yubàk dàp bang lé ji yù râ matú shèq jé lé é ru nghut lhê.” ga tû taî kat ri.
Zoshuq Tûm É Eq Sêng É Hkyô
14 Hau htâng, Wuìmyhup Sará Yohan é chángzô pé gi, Yesuq chyáng jé lé kômù, “Ngá-mòq eq Hparishe pé gi, zoshuq túm túm kut lhê; nghut kôle, Náng é chángzô pé gi, haî mù a túm kô é lhú?” ga luî, lé myî akô.
15 Haû mù, Yesuq tû taî é gi, “Bíng pé gi, lusik eq rahá nghut nyi tô ashî hkûn, hkâsu ge yón kôrâ lhú? Lusik lé, yhángmòq chyáng mai shuî yu pyâm é hkyíng jé râ nghut lhê; haú hkûn kúm gi, yhángmòq zoshuq túm kôrâ nghut lhê.
16 Ó yùq le, mèbu xau má pán sik èq a lhaq hpo wú kó; hkâsu mù gâ le, pán sik kun byùq jáng, mèbu xau le je lhoqcheq pyám râ nghut lhê. 17 Tsibyiq wing asik lé le, sho-kuq htûng axau má ó a kat wú kó. Kat é nghut jáng, tsibyiq wing asik soq htân luî, htûng bùq gòq byùq mù, tsibyiq wing le yui shun byùq, htûng le htên byùq, dùt râ nghut lhê. Haû mù, tsibyiq wing asik lé, sho-kuq htûng sik má kat jáng shèq, haû í jûng é a hten râ nghut lhê.” gâ ri.
Shî Bê Myiwe Zo Eq No É Myiwe Myhí
18 Yesuq haû su ga taî nyi é hkûn, sûwún rayùq jé lé lô mù, Yhâng é hí má hkyîhput htuq luî, “Ngá zo byìzo gi, ahkuî za shi byùq bê. Nghut kôlhang, Nàng lé mù, yhâng é ahtoq má lòq lé ke byi laq, haû jáng, yhang, chyungxe dum dui lò râ nghut lhê.” ga taî ri. 19 Yesuq gi, toq mù, Yhâng é chángzô pé eq rahá, haú yùq htâng châng e ló akô.
20 Haú hkûn, raxe í zân yhang, suí yui nyi é myiwe myhí rayùq gi, Yhâng é nùnghtáng má huî lé mù, Yhâng é bushi htâng má ê záng kat ri. 21 Myiwe myhí haû gi, yhânggùng yhang, “Ngò, Yhâng é buhtâng má ê wó záng jáng gi, ge byùq râ nghut lhê.” ga, wó myìt é yánmai nghut ri.
22 Yesuq gi, lhing wú kat luî, yhang lé myàng jáng, “Ngá zo ê, nhik hkâ-ngê, náng é lùmjíng myìt gi, nang lé lhoqgê byi bê nghut ri.” ga taî ri. Haú hkûn jáng yhang, myiwe myhí haû gi, ge byùq bê nghut ri.
23 Yesuq gi, sûwún hpô é yhûm má jé wang ló é hkûn, sámpyí mùt bang eq garu garín dùt nyi é bang lé, ê myâng mù, 24 yhángmòq lé, “Hui keq. Myiwe zo gi, shi byùq é a nghut, yhup myhî tô é shèq ru nghut lhê.” ga taí jáng, yhángmòq gi, Yhang lé wuìzuì kut pyám byî akô. 25 Yesuq gi, byù hpûng lé, shinggan shut htoq ló nhâng mù, Yhang wang ê luî, myiwe zo haú lé lòq èq zuî kat jáng, myiwe zo haû gi, dum dui toq lo ri. 26 Haú hkyo é danglù gi, ra-mau gón yhang jam ló byùq bê nghut ri.
Myòqjìt Í Yùq Eq Nhut Jìt Sû Rayùq Lé, Lhoqgê Byî É Hkyô
27 Yesuq gi, haú jowò mai xoq e ló nyi le, Yhâng é htâng má, myòqjìt í yùq gi, châng dìn uchyang, “Dawiq é Yhang zo ê, ngá-nhik lé shogyô yù làq ô!” ga wùt taî akô.
28 Yesuq gi, yhúmhkaû má jé wang ló é hkûn, myòqjìt su nhik châng wang lò kômù, haú nhik lé, “Ngò wó kut byî é lé, núngnhik lùmjíng akô lùq?” ga myî ri.
Haú hkûn, yhángnhik gi, “Lùmjíng lhê ô, Yhûmsîng ê.” ga tû taî akô.
29 Hau htâng, Yhang gi, haú nhik é myòqjí má ê záng byi luî, “Núngnhik lùmjíng é eq rajung za dùt sháng gàq.” ga taî ri. 30 Haû mù, yhángnhik gi, myòq wó myâng bekô nghut ri. Yesuq gi, “Shí hkyô, ó lé le hkâsé nhâng kó.” ga, yhángnhik lé htân htân sidìq byî ri. 31 Nghut kôlhang, yhángnhik gi, haú hkyô lé, haú mau ra-mau gón yhang taî pyo ló bekô nghut ri.
32 Haú nhik htoq ló nyî kô é hkûn, nàt gang wang júng luî, dang a wó nyô sû rayùq lé, Yesuq chyáng shuî lé lo akô. 33 Nàt gang lé hkat htoq pyâm é hkûn, nhutjìt sû haû gi, dang wó nyô bê nghut ri. Byù hpûng mó gi, haú lé wú maú byùq kômù, “Shî su dùt é hkyô lé, Isira-elaq a-myû má radàm lháng a myang wú.” ga taî bum akô.
34 Nghut kôlhang, Hparishe pé kúm gi, “Nàt gâng pê é zaû é wum-o a-tsam èq za, nàt gâng pé lé hkat htoq pyâm é nghut ri.” ga taî bum akô nghut ri.
Mû Zui Byù Shaû Ri
35 Yesuq gi, wà mó pé eq wà pé bànshoq má wàng luî, haú pé mâ é târâjong pé má mhoqshit é eq, mauhkûng mîngdán hkyô eq sêng é gabú danglù lé hko kyo uchyang, nòhpyo ajung jung eq nòlì nòjàng hui bang yùq hkangmó lé, lhoqgê byî wún ri. 36 Yesuq gi, byù mòqmó lé myàng jáng, wú shogyô nyi ri. Hkâsu mù gâ le, yhángmòq gi, sau zúng sû a nyi é sau pé su, awui ahke dùt é eq byo myín bûm kô é yánmai nghut ri. 37 Haû mù, Yhang gi, Yhâng é chángzô pé lé, “Kyô shû yù râ myo shoq jòq kôlhang, mû zui râ byù gi, shaû nyi ri. 38 Haû mù, haû kyó Yhûmsîng lé, Yhâng é kyô yô má, kyô shu byù myo myo nhâng byi râ matú, dung keq.” ga taî ri.