Bánno Buìnyi É Yhûmsîng
12
Haú yòq lhê é Bánno Buìnyì ra-nyí má, Yesuq gi, Yhâng é chángzô pé eq rahá yò hkaû mai sô laî ló nyi ri. Yhâng é chángzô pé gi, zò-mut é yánmai, kyôshi ra-tsuí lângshap yû mù, zô akô nghut ri. 2 Hparishe pé gi, haú lé myàng kôjáng, “Wú aq! Náng é chángzô pé gi, Bánno Buìnyì má a ge kut jung lé kut nyi akô.” ga taî kat akô.3 Haú hkûn, Yesuq tû taî é gi, “Dawiq lháng gi, yhâng htâng châng é bang eq rahá zò-mut huî é hkûn hkâsu kut é hkyô lé, núngmòq a nghap wú kó lhú? 4 Dawiq gi, Garai Gasâng é yhúmhkaû má wang ê mù, hkyangjông pé mai lai luî, ó le a ge zô é, ting tô é mùk lé, yhang eq yhâng htâng châng é bang yù zo kô é a nghut kó lhú? 5 Hau htoq agó, Bánno Buìnyì má, hkyangjông pé gi, noqkuq yhúmhkaû má Bánno Buìnyi é târâ lé shut kôlhang mara a wó é lé, haû târâ laiká má núngmòq a nghap wú kó lhú? 6 Ngò, núngmòq lé taí kôlé, haû noqkuq yhûm htoq je ko sû gi, shí má nghut nyi lhê. 7 ‘Ngò ô nau é gi, hkungga nhông hkyô a nghut, shogyo nhikmyin hkyô shèq ru nghut lhê’a gâ é lichyúm lé núngmòq sé kô é ru nghut le gi, mara a bò bang lé mara hûn kôrâ a nghut. 8 Hkâsu mù gâ le, haû Byu Yhangzo gi, haû Bánno Buìnyi é Yhûmsîng nghut lhê.” gâ ri.
9 Hau htâng, Yhang gi, haú jowò mai e ló mù, yhángmòq é târâjong má wang e ló ri. 10 Lòq rahkyam ajum shi byùq é byù rayùq le, haú má nyi tô ri. Yhángmòq gi, Yesuq lé, “Bánno Buìnyì má, nòhpyo lhoqgê byî le, târâ wang lhê lhú?” ga myî é dông, Yhang lé mara hûn râ hkyô ho akô nghut ri.
11 Haú hkûn, Yesuq gi, “Núngmòq chyáng mâ é ó yùq wá, yhûmsing é sau radu, Bánno Buìnyì má dong hkaû má gyó tô le, a xe htoq yu é nyì kôrâ lhú? 12 Byù gi, saû htoq má hpaudap dik é nghut lhê! Haû mù, Bánno Buìnyì má ge é hkyô kut le, târâ wang lhê.” ga yhángmòq lé tû taî ri.
13 Hau htâng, Yhang gi, haû lòq jum shî sû lé, “Náng é lòq nyhang kat àq.” ga taî kat jáng, haú yùq gi, lòq nyhang kat jáng, lòq haû gi, a no é lòq su ge byùq bê nghut ri. 14 Hparishe pé kúm gi, htoq ló kômù, Yesuq lé hkâsu kut wó sat pyám râ hkyô lé, chôm hpyê lhûm bum akô nghut ri.
Garai Hkyin Tô É Duìnhâng Zoshâng
15 Yesuq gi, haú hkyô lé sé jáng, haú jowò mai htoq ló bê nghut ri. Byù myo myo le, Yhâng htâng châng bùm kômù, Yhang gi, nòhpyo hui bang bànshoq lé lhoqgê byi luî, 16 Yhang ó yùq nghut é hkyô lé, a taî byông htoq râ matú, yhángmòq lé taî hkûm tô ri. 17 Haû gi, myìqhtoi Esai-a é nhut dông mai taî tô é dang lé lhoqdìk râ matú nghut ri. Dang haú pé gi,
18 “Shí yùq gi, Ngò chyit, Ngò myìt nguì luî, hkyin tô é Ngá é duìnhâng zoshâng nghut lhê;
Ngò gi, Ngá é Sô, Yhang lé kat byi râ nghut mù,
Yhang gi, târâ díngmán é hkyô lé byù myû bànshoq pé má taî kyo râ nghut lhê.
19 Yhang gi, haî a hpuq tû é htoq agó, a garu râ nghut lhê; Yhâng é htê lé, hkyô mó pé má wó gyo râ a nghut.
20 Yhang gi, târâ díngmán é hkyô lhoqung é hkûn jé shoq,
nâng chap pyám bê jàmgàm lé le, lhoqhkyui râ a nghut, myihkau za htoq nyî bê myi lé le, lhoqsat pyám râ a nghut.
21 Byù myû chângjup gi, Yhâng é myìng má myìt myòqbyù kôrâ nghut lhê.”b
gâ ri.
Yesuq Eq Bezebulaq
22 Hau htâng, agè ashop é nàt gang wang júng luî, myòqjìt nhutjìt é byù rayùq lé, Yesuq chyáng shuî lé lô kôjáng, Yesuq gi, haú yùq lé lhom lhoqgê byî ri; haû mù, haú yùq gi, dang le wó nyô, myòq le wó myâng dùt bê nghut ri. 23 Byù hpûng mó gi, haú lé wú maú byùq kômù, “Shí yuq, Dawiq é Yhang zo za gi, nghut lhê laq?” ga taî bum akô.
24 Nghut kôlhang, Hparishe pé gi, haú lé wó gyo kôjáng, “Shí yùq gi, nàt gâng pê é zau Bezebulaqc é wum-o a-tsâm èq za nàt gâng pé lé wó hkat htoq é nghut ri.” ga taî bum akô nghut ri.
25 Yhángmòq myìt nyi é hkyô lé Yesuq sé mù, yhángmòq lé taî é gi, “Hká mîngdán nghut kôle, ahkaû má byòq gâng lhûm nyì kô é nghut jáng, htên byòq byùq râ za nghut lhê; haû eq rajung za, wà mó rawà nghut nghut, yhûmhtu ralhum nghut nghut, yhangchang byòq lhûm nyì kô é nghut jáng, haû gi, wó gîng nyì râ a nghut. 26 Tsádán gi, Tsádán lé hkat htoq pyâm é nghut jáng, yhûmsing gùng yhûmsîng lhoqhpyoq nyî gù bê nghut ri. Haû su nghut jáng, yhâng é mîngdán gi, hkâsu kut wó gîng to râ lhú? 27 Haû mù luî, Ngò gi, Bezebulaq é wum-o a-tsâm èq za nàt gâng pé lé hkat htoq é nghut jáng, núngmòq é byu pé gi, ó yùq é wum-o a-tsâm èq hkat htoq pyám kô é nghut lhê lhú? Haû su nghut jáng, haú bang gi, núngmòq lé târâ jéyáng bang dùt kôrâ nghut lhê. 28 Nghut kôlhang, Ngò gi, Garai Gasâng é So èq nàt gâng pé lé hkat htoq pyâm é nghut jáng, Garai Gasâng é mîngdán gi, núngmòq chyáng jé bê nghut ri.
29 Ó yùq nghut kôle, wum-o bò sû lé hí tuî zing pyâm é a nghut le gi, yhâng é yhûm má lú wâng mù, yhâng é sùtzè lé hkâsu wó lú yû râ lhú? Haú yùq lé hí tuî zing pyám jáng shèq, yhâng é sùtzè lé wó lú yû râ nghut lhê.
30 Ngá hkyam shut a dàp sû gi, Ngo lé gyè kut sû nghut lhê; Ngò eq rahá a shûm tsing sû gi, lhoqpyo pyâm é sû nghut nyi ri. 31 Haû mù, Ngò, núngmòq lé taí kôlé, byu pê é yubàk mara hkangmó eq Garai Gasang lé rhoî dang taî pyâm é lhúnglháng gi, mara hkyut byî é wó hui râ nghut lhê. Nghut kôlhang, haû Chyoiyúng Sô lé rhoî dang taî pyâm é gi, mara hkyut byî é hui râ a nghut. 32 Haû Byu Yhangzo lé dang dông shut é sû gi, mara hkyut byî é wó hui râ nghut lhê; nghut kôlhang, haû Chyoiyúng Sô lé dang taî shut é sû gi, shí i-pyàt má le, htang pyàt má le, mara hkyut byî é hui râ a nghut.
33 Ashi lé wú luî, agàm lé sé râ nghut é yánmai, agàm lé lhoqgê jáng, ashi le gè râ nghut lhê; agàm lé a lhoqgê jáng, ashi le gè râ a nghut; 34 Dùq htân lhângmuì a-myû ê, núngmòq gi, agè ashop é bang nghut to kôluî nhîng, dang gê hkâsu wó taí kôrâ lhú? Hkâsu mù gâ le, i‑myìt ûnghkaû má byíng mui tô é lé za, nhut mai taí htoq lo é nghut lhê. 35 Ge é sû gi, yhûmsing é i‑myìt ûnghkaû mâ é sùtdò mai ge é zè pé lé lhoqhtoq shit lhê. Agè ashop é sû gi, yhûmsing é i‑myìt ûnghkaû mâ é agè ashop é sùtdò mai, agè ashop é zè pé lé lhoqhtoq shit lhê. 36 Ngò, núngmòq lé taí kôlé, byù gi, yhûmsîng taî kat é a-kyû a bo é dang pê é matú, târâ jéyáng é buìnyì má taî sân kyo ra kôrâ nghut lhê. 37 Hkâsu mù gâ le, yhûmsîng mara lùt râ le, ó le ó taî é dang pé mai; mara byî é hui râ le, ó le ó taî é dang pé mai, nghut râ nghut lhê.” gâ ri.
Alhô Agàn Lé Dung Kô É Hkyô
38 Hau htâng má, Hparishe pé eq târâ sará pé ra-am gi, “Sará ê, ngá-mòq gi, Nàng, maúhpo alhô agàn kut shit râ lé myàng nau ri.” ga Yhang lé dûng akô.
39 Haû mù, Yhang tû taî é gi, “Agè ashop é eq lhum a zuî é i-pyàt shî gi, maúhpo alhô agàn dûng nyi rí myhî-nhung! Myìqhtoi Yonaq é alhô agàn mai lai luî, gótû haî le tûn shit râ a nghut. 40 Hkâsu mù gâ le, Yonaq gi, ngo mó é wamdau hkaû má sum nyí sum myîn lúng é su, haû Byu Yhangzo le, myigùng káng má sum nyí sum myîn lúng râ nghut lhê. 41 Ninewe wà byù wuì gi, Yonaq mungdang hko kyô é hkûn myìt lhîng kô é nghut mù, târâ jéyáng é buìnyì má, i-pyàt shí mâ é bang eq rahá toq lò luî, i-pyàt shí mâ é bang lé mara hûn kôrâ nghut lhê; haû Yonaq htoq ko sû gi, ahkuî shí má jé nyì to bê. 42 Maupyî mâ é hkóhkâm myhí gi, maumyî ló htâng é mai lé lô mù, Sholumon é hpàqchyî dang lé, lé gyô yù bê nghut mù, haû târâ jéyáng é buìnyì má, i-pyàt shí mâ é bang eq rahá toq lô luî, i-pyàt shí mâ é bang lé mara hûn râ nghut lhê; haû Sholumon htoq ko sû gi, ahkuî shí má jé nyi to bê.
43 Haû agè ashop é nàt gi, byù rayùq chyáng mai htoq ló mù, kyuq huî é jowò pé má sô yông e ló luî, no râ jowò hkat ho wú le, a myang hô nghut ri. 44 Haú hkûn, yhang gi, ‘Ngò nyi laî lo é yhûm má dum taû ló wú râ.’ ga taî ri. Yhang dum taû jé ló wú le, yhûm haú lé, ó le a sing yu hpyuq é htoq agó, san za rago dùt to láng é lé ló myang ri. 45 Haû jáng, yhang gi, dum taû ê mù, yhâng htoq je wuî é nàt nyhit nàt lé shuî lò luî, haú má lo wang nyi to bekô. Haû mù, haú yùq é nyì yàp sâmlai gi, hí lhê htoq má je wuî lò bê nghut ri; agè ashop é i-pyàt shî le, haû eq rajung za dùt râ nghut lhê.” gâ ri.
Yesuq É Yhâng Nu Eq Yhang gû Pé
46 Yesuq, shiwa byu pé lé dang rû nyo nyi ashî hkûn, yhâng nu eq yhang gû pé gi, Yhang lé nyò naù kômù, shinggan má lé yàp tô akô nghut ri. 47 Haû mù, Yesuq lé, “Náng nu eq nunggû pé gi, Nang lé nyò naù mù, shinggan má láng yàp bum akô.” ga taî kyô akô.
48 Haú hkûn, Yhang gi, “Ô pé gi, Ngá nu eq Ngá gû pé nghut akô lhú?” ga tû taî kat ri. 49 Hau htâng, Yhang gi, Yhâng é chángzô pé lé lòq tun luî, “Wú keq, shí bang gi, Ngá nu eq Ngá é gu-mang wuì nghut bê. 50 Hkâsu mù gâ le, mauhkûng htoq mâ é Ngá wa ô nau é hkyô châng é sû ó yùq nghut kôle, Ngá gu Ngá mang, Ngá gu Ngá nhá, Ngá nu chyat nghut bê.” ga xoq taî ri.