Yesuq Kyûdûng É Hkyô
17
Yesuq gi, haû su ga taî é htâng má, mauhkûng shut tu wú luî, kyûdûng é gi, “Âwa ê, ahkyíng jé bê nghut ri; haû Nungzo gi, Nang lé hpungwup shingkang wó hu nhâng sháng gàq, Nungzo lé hpungwup shingkang hû ló nhâng làq ô!
Yohan 17:1-12
2 Hkâsu mù gâ le, Nàng mai Yhang lé àp byî tô é bang bànshoq lé, Yhang, ahtum abyùq é chyungxe wó byi sháng gàq ga, Nàng gi, byù lhúnglhâng bang lé ùp râ ahkáng, Yhang lé byî tô é yánmai nghut ri. 3 Nàng za tengmán é Garai Gasang nghut é eq Nàng nhang kat é sû Yesuq Hkrisidùq lé, sê é gi, ahtum abyùq é chyungxe nghut lhê. 4 Ngò gi, Nàng, Ngo lé wùn wàq nhang é múzó lé lhoqpân é dông, myìdàm htoq má, Náng é hpungwup shingkang lé lhoqhtoq shit bê nghut lhê. 5 Âwa ê, haû mingkan lháng a jòq shî mai, Ngò, Nàng eq rahá chôm wó é hpungwup shingkâng èq, ahkuî, Náng é myòq hí má, Ngo lé hpungwup shingkang dan hu nhâng laq.
Chángzô Pé Matú, Yesuq Kyûdung Byî É Hkyô
6 Mingkan mai, Nàng, Ngo lé hkyin htoq yû byî é bang lé, Ngò gi, Náng é myìng lhoqhtoq shit bê nghut lhê. Yhángmòq gi, Náng é byu pé nghut bekô; Nàng gi, yhángmòq lé, Ngá é lòq má àp byi bê nghut luî, yhángmòq gi, Náng é dang lé châng kut bekô nghut ri. 7 Nàng, Ngo lé byî é lhúnglháng gi, Náng chyáng mâ é nghut é lé, ahkuî, yhángmòq sé bekô nghut ri. 8 Hkâsu mù gâ le, Nàng, Ngo lé byî kat é mungdang pé lé, Ngò, yhángmòq lé byi bê nghut luî, yhángmòq gi, haú pé lé hàp yù bekô nghut ri; Ngò gi, Náng chyáng mai lé é sû nghut é lé le, yhángmòq hkyak sê akô; Nàng, Ngo lé nhang kat é hkyô lé le, yhángmòq lùmjíng bekô nghut ri. 9 Ngò gi, yhángmòq é matú kyûdung byî lhê. Ngò gi, haû mingkan byu pê é matú dung byî nyi é a nghut; Nàng, Ngo lé àp byî tô é bâng é matú shèq dung byî nyi é ru nghut lhê; hkâsu mù gâ le, yhángmòq gi, Náng é byu pé nghut akô. 10 Ngò wó é lhúnglháng gi, Náng é chyat nghut mù, Nàng wó é lhúnglháng le, Ngá é chyat nghut lhê. Haû mù, Ngò gi, yhángmòq má hpungwup shingkang hû é hui bê nghut lhê. 11 Ngò gi, Nàng chyáng lò râ nghut lhê mù, mingkan htoq má nyi nyì râ a nghut lo; nghut kôlhang, yhángmòq gi, mingkan htoq má nyi nyì shirâ nghut lhê; chyoiyúng é Âwa ê! Ngáhpe gi, ragùng za nghut é su, yhángmòq le ragùng za wó dùt nyì kó sháng gàq, Nàng, Ngo lé byî é, haû Náng mying é a-tsâm èq yhángmòq lé ùpzúng nyì àq. 12 Ngò gi, yhángmòq eq rahá nghut nyi é u lé, yhángmòq lé ùpzúng bê nghut luî, Nàng, Ngo lé byî é myìng hau èq, yhángmòq lé rago zúng bê nghut lhê. Haû Chyúmdang lhoqdìk sháng gàq ga, haú bang mâ é htên byòq hui râ sû mai lai luî, ó yùq le a byùq byùq é nghut lhê.
13 Ngò gi, ahkuî, Náng chyáng lò râ nghut bê; nghut kôlhang, Ngá é gabú hkyô gi, yhángmòq chyáng byíng jùp sháng gàq nghû, Ngò gi, haú pé lé mingkan má taî é nghut lhê.
Yohan 17:13-26
14 Ngò gi, yhángmòq lé, Náng é mungdang byi bê nghut lhê; haû mingkan gi, yhángmòq lé a naù a wom nghut ri; hkâsu mù gâ le, Ngò gi, mingkan mâ é a nghut é su, yhángmòq le, mingkan mâ é a nghut kô é yánmai nghut ri. 15 Ngò kyûdûng é gi, Nàng, yhángmòq lé mingkan mai shuî htoq yû râ matú dûng é a nghut, haû agè ashop su chyáng mai, yhángmòq lé ùpzúng yû râ matú shèq dûng é ru nghut lhê. 16 Ngò gi, mingkan mâ é a nghut é su, yhángmòq le, mingkan mâ é a nghut kó. 17 Yhángmòq lé, haû tengmán hkyo èq lhoq sân-yúng yû làq; Náng é mungdang gi, tengmán hkyô nghut ri. 18 Nàng, Ngo lé, mingkan má nhang hâng kat é su, Ngò le, yhángmòq lé, mingkan má nhang hâng kat é nghut lhê. 19 Yhángmòq lé, tengmán hkyô má wó lhoq sân-yúng yû kó sháng gàq nghû, Ngò gi, yhángmòq é matú, yhûmsing gùng lé lhoq sân-yúng yu é nghut lhê.
Lùmjíng Bang Lhúnglhâng É Matú, Yesuq Kyûdung Byî É Hkyô
20 Ngò gi, yhángmòq é matú baú za kyûdung byî é a nghut; Yhángmòq é danglu é yánmai, Ngo lé lùmjíng kôrâ bâng é matú le, Ngò kyûdung byî é nghut lhê. 21 Haû mù, yhángmòq bànshoq bang gi, rading ralhum za dùt nyì kó sháng gàq. Haû mingkan gi, Nàng, Ngo lé nhang kat é hkyô lé wó lùmjíng sháng gàq; Âwa, Nàng gi, Ngò má nyi nyì mù, Ngò gi, Nàng má nyi nyi é su, yhángmòq le, ngáhpe má nyi nyì kó sháng gàq. 22 Ngáhpe gi, ragùng za nghut é su, yhángmòq le, rading ralhum za dùt nyì kó sháng gàq nghû, Ngò gi, Nàng, Ngo lé byî é hpungwup shingkang lé, yhángmòq lé byi bê nghut lhê. 23 Nàng, Ngo lé nhang kat bê hkyô eq Nàng, Ngo lé chyitdàp é su, yhángmòq lé chyitdàp é hkyô lé, haû mingkan wó sé râ matú, yhángmòq gi, gúmjùp shoq rading ralhum za wó dùt kó sháng gàq nghû, Ngò gi, yhángmòq má nyi nyì luî, Nàng gi, Ngò má nyi nyi é nghut lhê.
24 Âwa ê, haû mingkan lháng a jòq shi mai, Nàng, Ngo lé chyitdàp luî byî tô é hpungwup shingkang haû lé, Nàng, Ngo lé byî tô é bang, wó myâng kôrâ matú le, Ngò nyi é jang má, Ngò eq rahá wó nyî kôrâ matú le, Ngò ô nau ri.
25 Díngmán é Âwa ê, haû mingkan gi, Nang lé a sé kôlhang, Ngò gi, Nang lé sê lhê; Nàng, Ngo lé nhang kat é hkyô lé gi, yhángmòq sê akô nghut ri. 26 Nàng, Ngo lé chyitdàp é chyitdàp myìt gi, yhángmòq má wó jòq nyì râ matú le, Ngò gi, yhángmòq má wó nyi nyì râ matú le, yhángmòq lé, Ngò, Náng é hkyô sé nhâng bê nghut luî, xoq mù sé nhang nyì shirâ nghut lhê.” gâ ri.