Udixhe cabe inaaze cabe Jesús
26
Biluxe si uníꞌ Jesús ca diidxa ca,
na rabi ca discípulu stiꞌ:
2 ―Ma nanna tu xhupa si gubidxa riaadxa para saa pascua,
ne lade ca dxi que zanaaze cabe Hombre Biseenda Dios para icá lu cruz.
3 Ne zaqué guca ni,
bidxiña ca xaíque sti ca sacerdote ne ca maistru de ley ne ca xaíque sti ca judíu ndaani patiu ralidxi sacerdote gola Caifás.
4 Ne raqué uníꞌ stiidxa ca inaaze ca Jesús sin ganna binni,
ne guuti ca laabe.
5 Peru na ca cadi gaca ni ndaani pe saa que,
ti qué cui zisi binni.
Bichá ti gunaa nisa rindáꞌ naxhi ique Jesús
6 Ca dxi que uyé Jesús Betania,
ralidxi Simón ni gupa lepra que.
7 Raqué nuu be bedané ti gunaa ti frascu dxá de aceite rindáꞌ naxhi ni nabé risaca,
ne bichá ni ique be ra zuba be ruaa mexaꞌ.
8 Ora biꞌya ca discípulu ni biꞌni gunaa que,
bidxiichi ca ne na caꞌ:
―Xiñee gudxite si be aceite que.
9 Purti ñanda nidoo ni ne niree stale vueltu para ñaazi lu ca pobre.
10 Peru ma nanna Jesús xi caníꞌ cabe,
para na rabi laacabe:
―Lachuu dxí,
cadi guchiiña tu gunaa riꞌ purti nabé sicarú ni biꞌni be naa riꞌ.
11 Ca pobre la?
qué ziaadxa ca lade tu,
peru naa zadxiña dxi guiaadxa lade tu.
12 Ra bichá be aceite ri lade la?
cayuni chaahui be naa para igaacheꞌ.
13 Ne gabe caꞌ laatu,
ratiica güi cabe stiidxa Dios ndaani idubi naca guidxilayú riꞌ,
zuzeete cabe ni biꞌni be,
ti cadi guiaanda be.
Ra bitoo Judas Jesús
14 Oraque uyé Judas Iscariote,
tobi de ca discípulu sti Jesús que,
ra nuu ca xaíque sti ca sacerdote.
15 Ne na rabi laacaꞌ:
―Pagala udii tu naa saca gulué laabe laatu.
Ne óraque bidii ca laabe treinta moneda de plata.
16 Ne dede dxi que nisi cuyubi be modo guluíꞌ be Jesús laacaꞌ.
Ra gudó xhi né Jesús ca discípulu stiꞌ
17 Primé ca dxi bizulú saa ra ro cabe pan sin levadura,
beeda ca discípulu sti Jesús ra nuu,
ne na ca rabi ca laabe:
―Paraa racalaꞌdxu guni chaahui du para gó xhi lu pascua riꞌ.
18 Para na be rabi be laacaꞌ:
―Laché ndaani guidxi ra nuu tobi hombre ne lagabi laa:
“Na maistru ma bidxiña dxi stiꞌ ne racalaꞌdxi utiidi pascua ri raliꞌdxuꞌ,
laa ne ca discípulu stiꞌ.”
19 Ne óraque uyé ca discípulu que casi gudxi Jesús laacaꞌ,
ne gudixhe chaahui ca endaró xhi para pascua que.
20 Casi bixhinni,
gurí né be idubi doce discípulu stibe ruaa mexa que.
21 Ne ora cayó xhi cabe na be rabi be laacaꞌ:
―Gabe caꞌ ndi laatu,
tobi de laatu zutoo naa.
22 Nabé triste biaana cabe óraque,
ne bizulú cayabi cabe laabe:
―Naa la?
Señor.
23 Para na be rabi be laacaꞌ:
―Ni naguu ná ndaani bladu ra naguaa naya riꞌ nga ni chi utoo naa.
24 Huandí maca cá lu guiꞌchi naquiiñe gati Hombre Biseenda Dios,
peru ni chi guluíꞌ laabe la?
gapa gá si laa.
Jma galán ñaca para laa pa qué ñuu dxi ñale.
25 Ne óraque na Judas ni yeutoo laabe que,
rabi laabe:
―Ñee naa la?
Maistru.
Para rabi be laa:
―Lii caníuꞌ ni.
26 Ra cayó xhi cabe que,
ucuaa be pan guluu be ndaayaꞌ,
ne gundaa be ni lú ca discípulu stibe ne rabi be laacaꞌ:
―Laicaa ne lagó.
Ndi nga cuerpu stinneꞌ.
27 Oraque ucuaa be ti copa ne bidii si be diuxquixe Dios bidii be ni laacaꞌ,
ne rabi be laacaꞌ:
―Laguéꞌ ni,
irá xixé tu.
28 Purti ndi nga rini stinne ni chi ixii para ixá stonda stale binni.
Ne ra ixii ni la?
zaguixhe Bixhoze ti modo cubi chuꞌ né binni laa tobi si.
29 Gabe caꞌ laatu,
ma qué zee ruaꞌ nisa uvas dede dxi ibigueta guee nia ni laatu sti tiru ra runi mandar Bixhozeꞌ.
Na Jesús zaníꞌ Pedru qué runibiáꞌ laa
30 Biluxe biinda si cabe ti cantu,
biree cabe ze cabe lu dani Olivo.
31 Oraque na Jesús rabi laacabe:
―Irá tu zaxele tu de naa yanna gueelaꞌ,
purti maca cá ni lu Xquiꞌchi Dios:
“Zunenaꞌya pastor sti ca dendxuꞌ ne zareeche ndase caꞌ.”
32 Peru dxi guiasa de lade gueꞌtu la?
ziaa Galilea ne raqué cueza laatu.
33 Oraque na Pedru rabi laabe:
―Neca ixele irá cabe de lii,
peru naa qué ziuu dxi ixele de lii.
34 Para rabi be laa:
―Gabe caꞌ lii,
yanna gueela ca,
ante guꞌnda gallu,
zaníuꞌ chonna tiru qué runibiáꞌ lu naa.
35 Para na Pedru rabi laabe:
―Neca gate nia lii,
peru qué ziuu dxi inié qué runebiaꞌya lii.
Ne ngue ca na irá discípulu que.
Getsemaní
36 Oraque yené be laaca ti lugar lá Getsemaní,
para na be rabi be laacaꞌ:
―Lacuí rarí laga chaa raricaꞌ,
chi inié nia Dios Bixhozeꞌ.
37 Ne uzá né be Pedru ne iropa xiiñi Zebedeu stindaa,
ne óraque uyuu be triste ne uyuu yuuba ladxidóꞌ be.
38 Para na be rabi be cani né be que:
―Nabé naná yuuba ni nuu ndaani ladxiduáꞌ riꞌ,
yuuba para guuti.
Laguiaana gá rarí ne cadi gasi tu.
39 Ne óraque bixele huiini be caadxi de laacaꞌ,
ne raqué bizuxibi be gudixhe ique be layú,
ne uníꞌ né be Bixhoze be ni nuu ibáꞌ,
na be:
―Padre stinneꞌ,
pa zanda la?
ulee enda naná ri de naa,
peru cadi aca ni rabe sínuque ni na luꞌ.
40 Ne bigueta be ra nuu ca discípulu stibe.
Bedandá be laaca nisiaasi caꞌ.
Para na be rabi be Pedru:
―Ñee qué zanda gataná né tu naa neca ti hora la?
41 Lagataná ne lainíꞌ né Dios ti qué uquiinde binidxaba laatu.
Neca ndaani ladxidóꞌ to racalaꞌdxi tu guni tu jneza peru cuerpu stitu nagueenda riguudxi.
42 Bigueta uyé be yeníꞌ né be Dios rairopa tiru,
na be:
―Padre stinneꞌ,
pa qué zanda tidi enda naná ri luguiaꞌya sin qué aca ni la?
biꞌni ni na luꞌ.
43 Ne óraque beeda be ra nuu ca discípulu stibe sti tiru.
Ne laca bedandá be laaca nisiaasi caꞌ purti nabé nuu bacaanda lú caꞌ.
44 Para bisaana be laaca yeníꞌ né be Dios raguionna tiru ne laca zaqueca uníꞌ be.
45 Oraque ru bigueta be ra nuu ca discípulu stibe ne na be rabi be laacaꞌ:
―Lagasi yanna ne laiziilaꞌdxiꞌ.
Ma bidxiña ora tidi Hombre Biseenda Dios lu ná cani qué runi jneza.
46 Laguiasa,
ma chuu nu.
Laguuya mápeca zeda dxiña ni chi uluíꞌ naa.
Ra bigaa Jesús
47 Caníꞌ ru be,
mala zeeda Judas,
tobi de lade doce discípulu stibe que.
Zedané stale binni ni biseenda ca xaíque sti ca sacerdote ne ca xaíque sti ca judíu,
ne naaze ca espada ne palu.
48 Ne maca gudxi Judas laacaꞌ:
―Ni guꞌya tu gahua ti bixidu lucuá la?
ngue nga laabe,
ne zanda inaaze tu laabe.
49 Ne casi yendá be ra nuu Jesús,
bigapa diuxi be laa,
ne na be rabi be laa:
―Maistru.
―Xhamiguaꞌ xi zeda gunuꞌ.
Oraque bidxiña irá cabe guluu ná cabe Jesús para chiné cabe laa.
51 Peru mala bisigaa ná tobi de cani nuu né Jesús raqué,
guxha espada stiꞌ,
bigá diaga ti xpinni sacerdote gola.
52 Oraque na Jesús rabi laabe:
―Guluu espada stiuꞌ jlugar,
purti irá ni cuꞌ ná espada la?
zati né espada.
53 Ñee na tu qué ñanda ninié nia Bixhoze nagasi ne nuseenda stale mil ángel para ñacané naa la?
54 Peru pa ñune nga la?
ximodo ñanda ñaca casi cá lu Xquiꞌchi Dios ra na naquiiñe gaca ni sicarí yaꞌ.
55 Oraque na Jesús rabi ca binni que:
―Casi rie cabe luguiá gubaana zeeda tu luguiaꞌyaꞌ,
né tu espada ne palu.
Inqué ti dxi gurié ndaani yuꞌdu roꞌ,
bisiideꞌ ne qué ninaaze tu naa.
56 Peru cayaca irá ndi ti iree ni casi cá ni lu ca guiꞌchi ni bicaa ca profeta.
Ne óraque bixooñe irá ca discípulu bisaana ca laabe.
Ra zuhuaa Jesús nezalú justicia
57 Yené ca binni que laabe ra nuu sacerdote gola Caifás ne ma nuu ca maistru de ley ne ca xaíque sti guidxi raqué.
58 Zinanda Pedru laabe zitu zitu dede biuu ndaani patiu sti sacerdote gola que,
ne raqué gurí né ca gendarme para guꞌya xi gaca be.
59 Ne óraque bizulú biyubi ca xaíque sti ca sacerdote ne irá ni naca justicia sti ca judíu tuuxa iníꞌ paraa pe bichee Jesús,
neca cadi dxandí ni,
ti chuꞌ xi pur gati be.
60 Peru neca stale tu ulee falsu luguiá be,
qué nidxela ca paraa bichee be.
Ultimu beeda xhupa zeda ndee falsu luguiá be.
61 Na ca rabi ca ca binni que:
―Bina diaga du uníꞌ be ñanda nuxhá be yuꞌdu roꞌ sti Dios ne lu chonna gubidxa nucuí be ni sti tiru.
62 Oraque bizuhuaa sacerdote gola,
na rabi laabe:
―Xi na lu de ni cugaani cabe luguiá lu ri yaꞌ.
63 Peru qué niníꞌ be gastiꞌ.
Para na sacerdote gola que rabi laabe:
―Pur Dios ni nabani nga cayabe lii gaꞌbu laadu pa lii nga Cristu Xiiñi Dios.
64 Para rabi be laa:
―Naa,
casi nouꞌ ca.
Ne gabe caꞌ laatu dede yanna zuuya tu Hombre Biseenda Dios zuba cueꞌ Dios ni nandxóꞌ,
ne zuuya tu zeda yete be de ibáꞌ lade za.
65 Oraque ucheza sacerdote gola que xhaba ne na:
―Yanna huaxa ma uníꞌ be,
cayuni be laabe Xiiñi Dios.
Ma cadi naquiiñe uyubi nu tu iníꞌ paraa bichee be purti ma bina diaga tu biree ni de ruaa be,
cayuni be laabe Xiiñi Dios.
66 Yanna yaꞌ,
xi na tu.
Para na cabe:
―Gati be xa.
67 Ne óraque bichá xhinni cabe lú be ne gudiñe cabe laabe ne udapa cabe ruaa be.
68 Ne na cabe rabi cabe laabe:
―Pa nouꞌ lii nga Cristu la?
gudxi laadu tu cagapa lii ti iduꞌya du pa nannuꞌ.
Ra uníꞌ Pedru qué runibiáꞌ Jesús
69 Zuba Pedru ndaani patiu que ora bidxiña ti criada laa,
na rabi laa:
―Lii laca xpinni Jesús de Galilea lii njaꞌ.
70 Peru qué niná Pedru niníꞌ pa xpinni be laa sínuque na rabi badu dxaapa que nezalú irá binni rí raqué:
―Qué ganna xii nga caníꞌ luꞌ.
71 Ma ziree Pedru ra puertaꞌ,
biiya sti badu dxaapa laa,
para na rabi ca binni que:
―Ndi laca xpinni Jesús de Nazaret laa.
72 Bigueta uníꞌ Pedru sti tiru dede bini jurar:
―Qué runebiaꞌya diaꞌ hombre ca.
73 Qué nindaa de ngue bidxiña caadxi de cani zuhuaa raqué,
na rabi laabe:
―Dxandí de laacabe lii,
purti de modo riníuꞌ ca rihuinni.
74 Oraque bizulú be caguu dí be ne cayuni jurar be:
―Gunidé Dios naa pa cusiguieeꞌ,
ma gudxe laatu qué racabiaꞌya laabe.