Ejemplu sti chii binni dxaapaꞌ
25
Bigueta gudixhe Jesús sti ejemplu de modo runi mandar Dios,
na rabi laacabe:
―Sicarí bizaaca lú chii binni dxaapaꞌ,
ucuaa ca lámpara sticaꞌ,
biree ca zindeza ca ti novio para chiné ca ra xquenda xheelaꞌ.
2 Gaayu de laacabe guyuu xpiaaniꞌ,
peru xcaayu que coꞌ,
3 purti ucuaa ca lámpara stica peru qué ñuuya ca pabiáꞌ aceite napa cani.
4 Peru xcaayu que bichá ca lámpara stica ne yené ru ca xcaadxi ndaani botella.
5 Qué ñeeda gá novio que ne ucuá bacaanda laacabe,
gusi cabe.
6 Biaꞌ galaa gueela ucuá ridxi:
“Ma zeeda novio.
Lairee,
lachichagalú laabe.”
7 Oraque biasa irá ca badu dxaapa que ne bini chaahui ca lámpara sticaꞌ.
8 Para na cani nahuati que rabi cani nuu xpiaani que:
“Lacuee laꞌ caadxi aceite lu stitu latané laadu,
purti mayaca gyuiꞌ lámpara stidu.”
9 Peru cani nuu xpiaani que,
laga na ca rabi ca laacabe:
“Para cadi irá stitu ne stidu la?
laché lachisí para laatu.”
10 Peru laga zesí cabe que beeda novio,
biuu né cani cabeza laa que ra chi gaca enda xheela que,
ne bieegu ra puertaꞌ.
11 Ratu si que beeda xcaayu badu dxaapa que ne na caꞌ:
“Señor,
Señor,
bixhele guiuꞌ du.”
12 Para na be rabi be laacaꞌ:
“Tu laatu yaꞌ.
Qué runebiaꞌya laatu.”
13 Nga runi,
na Jesús rabi laacaꞌ,
naquiiñe gataná tu purti qué ganna tu padxí nin pora ibigueta Hombre Biseenda Dios.
Hombre bisigapa xpidxichi
14 Ne gudixhe ru be sti ejemplu para laacaꞌ,
na be:
―Enda runi mandar sti Dios zeda gaca casi ti hombre che viaje,
peru ante iree be de xquidxi be la?
guridxi be ca xpinni be,
bisaana né be laaca xpidxichi be.
15 Tobi bidii be laa biaꞌ gaayu mil moneda,
ne stobi bidii be laa chupa mil,
ne stobi bidii be laa ti mil si.
Cada tobi ucuaa biaꞌ laa.
Oraque biree be ze be.
16 Ni ucuaa gaayu mil que la?
biꞌni né ni dxiiña de bisaa ni chii mil.
17 Zaqueca ni ucuaa chupa mil que,
laca bini ganar xhupa,
bisaa ni tapa.
18 Peru ni ucuaa tobi que la?
undaa ndaani yu ne raqué bicaachi bidxichi sti xpixuaanaꞌ.
19 Bindaa para beeda xpixuaana cabe que,
beda guuya xi bini né cabe xpidxichi.
20 Para bidxiña ni ucuaa gaayu mil que,
ne bedané xcaayu ne na rabi laabe:
“Señor,
gaayu mil bidiiu naa,
peru bine nia ni dxiiña dede bisaa ni chii.”
21 Para na xpixuaana be rabi laabe:
“Galán,
jneza biꞌni lu xhiiñaꞌ.
Pa nga caadxi si bisaana nia lii ne biꞌnu jneza la?
yanna jma rusi stale zudiee lii.
Biuu,
guieche nia lii.”
22 Oraque bidxiña ni ucuaa chupa mil que,
na rabi laabe:
“Señor,
chupa mil bidiiu naa,
ne bine nia ni dxiiña dede bisaa ni tapa.”
23 Para rabi be laa:
“Galán,
jneza biꞌni lu xhiiñaꞌ.
Pa nga caadxi si bisaana nia lii ne jneza biꞌnu la?
yanna jma rusi stale zudiee lii.
Biuu,
guieche nia lii.”
24 Oraque bidxiña ni ucuaa ti mil que,
ne na rabi laabe:
“Señor,
runebiaꞌya lii,
ne nanna pabiáꞌ naduxhu né lu xpinni luꞌ,
ne ribeeu guela neca cadi lii guluu lu biní,
ne rutopa lu ra cadi lii bidxiiba luꞌ.
25 Nga runi bidxibeꞌ,
ne bicaache xpidxichi lu ndaani yu.”
26 Para rabi be laa:
“Aque qué iquiiñe lu xa hombre,
ne nachaaba luꞌ.
Pa nannu ximodo naa,
ribee guela neca cadi naa uluaa biní ne rutopa ra cadi naa bidxiiba la?
27 xiñee qué niguu lu bidxichi stinne lu bancu,
ne ora ñenda la?
ma ñaca ni jma stale.”
28 Ne na be rabi be ca xpinni be:
“Lagaxha laabe ni né be ca,
ne lagudii ni ni napa chii mil que.
29 Purti cani napa,
zacaa ca xcaadxi ti idale sticaꞌ,
peru cani qué gapa la?
laga ziaaxha ca dede ni napa caꞌ.
30 Ne hombre qué iquiiñe ri la?
laundaa laa lu guelacahui.
Raqué nga guꞌna be dede go yaa be guidi ruaa be.”
Ra cuidxi Jesús cuenta irá guidxi
31 Dxi ibigueta Hombre Biseenda Dios la?
zeeda casi rey,
zedané irá ca ángel stiꞌ,
ne zabí para guni mandar.
32 Ne zadxiña binni de irá guidxi ra nuu be.
Zabee chu be caadxi lade xcaadxi,
casi ribee chu pastor chiba lade dendxuꞌ.
33 Ne zuzuhuaa be ca dendxu ladu derechu stibe ne ca chiba ladu bigaꞌ.
34 Oraque zabi be cani zuhuaa ladu derechu que:
“Ma guluu Bixhoze ndaaya laatu,
yanna latáꞌ laicaa ra ma nexhe chaahui para laatu dede ante cha guidxilayú.
35 Purti bidii tu ni gudahua dxi candaanaꞌ,
ne bidii tu ni güee dxi cayate nisa,
ne bichagalú tu naa dxi canazaya xquidxi binni.
36 Bigacu tu naa lari dxi nuaa xie ladeꞌ,
ne yeganna tu naa dxi huaraꞌyaꞌ,
ne uyé tu ra nuaa dxi yeguayuaa.”
37 Oraque zaníꞌ cani nachaꞌhui que:
“Señor,
padxí biduꞌya du lii candaanuꞌ,
bidíꞌ du ni gudó loꞌ,
ne cayati lu nisa bidíꞌ du nisa güeꞌ luꞌ.
38 Ne padxí bichagalú du lii dxi canazá lu xquidxi binni ne bigacu du lii lari dxi xie ladi lu yaꞌ.
39 O padxí yeganna du lii huará luꞌ o yeduꞌya du lii ra yeguyoo loꞌ.”
40 Ne óraque zabi be laacaꞌ:
“Ndi nga laani:
ora biꞌni tu ni ti hermanu stinne neca huaxiéꞌ laa la?
casi ñaca biꞌni tu ni naa.”
41 Ne dxi queca zabi be cani nuu ladu biga que:
“Lairee de ra nuaaꞌ,
ni dxiba dí caꞌ.
Lachiguiaba lu gui ni qué ziuu dxi gyuiꞌ,
ni nexhe para binidxaba ne ca xpinni.
42 Purti qué nudii tu ni ñahua dxi candaanaꞌ,
ne qué nudii tu nisa ñee dxi cayate nisa.
43 Ne qué nuchagalú tu naa dxi canazaya xquidxi binni,
ne qué nugacu tu naa lari dxi nuaa xie ladeꞌ,
ne qué niganna tu naa dxi huaraꞌyaꞌ nin dxi yeguayuaa.”
44 Oraque laca zaníꞌ ca ngue:
“Señor,
padxí biduꞌya du lii candaanuꞌ o canazá lu xquidxi binni,
o xie ladi luꞌ,
o huará luꞌ o yeguyoo loꞌ,
ne qué ñacané du lii yaꞌ.”
45 Ne zabi be laacaꞌ:
“Ndi nga laani:
purti qué ñuni tu ni cani caquiiñe ni la?
casi ñaca qué ñuni tu ni naa.”
46 Ne cani gudxi be laa chi guiaba lu bele que la?
qué ziuu dxi iree ca de raqué,
peru cani nachaꞌhui que la?
zapa ca enda nabani ni qué zaluxe.