Udiꞌdi Jesús lu ná Pilatu
27
Casi birá gueelaꞌ,
uníꞌ stiidxa ca xaíque sti ca sacerdote ne ca xaíque sti guidxi que guuti ca Jesús.
2 Ne bindiibi ca laabe yené ca laabe ra nuu gobernador Poncio Pilatu.
Ra guti Judas
3 Biiya si Judas ni yeutoo laabe que ma chi gati be la?
beeda malaya laa,
para yeudxii treinta moneda que ca xaíque sti ca sacerdote ne ca xaíque sti guidxi.
4 Ne na rabi laacaꞌ:
―Naa bichee purti bituaa tobi ni nayá ladxidóꞌ.
Para na cabe rabi cabe laa:
―Xi runi importar laadu yaꞌ.
Lii guꞌyu xi guꞌnuꞌ.
5 Ne óraque bizuꞌnda be ni ndaani yuꞌdu roꞌ que,
ne biree be yenduu be doo yanni be.
6 Gundisa ca xaíque sti ca sacerdote ca moneda que,
peru na caꞌ:
―Qué zanda cuꞌ nu moneda ri lade ofrenda sti yuꞌduꞌ,
purti bixuíꞌ né ni rini sti ti hombre.
7 Ne óraque uníꞌ stiidxa cabe xi guni né cabe bidxichi que.
Para uzíꞌ cabe ti layú lu ni ruzáꞌ guisu ne na cabe iquiiñe ni para igaachi judíu ni gueeda de sti ladu.
8 Nga runi gulee lá cabe layú que Layú de Rini ne nga lá ni dede yanna.
9 Ne zacá guca ni modo uníꞌ Dios de ruaa profeta Jeremías dxi na:
10 Ca xiiñi Israel gudixhe idoo be treinta moneda de plata,
ne dxi bigueta moneda que lu ná cabe,
ucuaa cabe ni,
uzíꞌ né cabe ni ti layú lu ni ruzáꞌ guisu.
Zacá nga gudxi Dios naa.
Zuhuaa Jesús lu Pilatu
11 Ne ora zuhuaa Jesús nezalú gobernador,
na gobernador que rabi laabe:
―Ñee lii nga rey sti ca judíu la?
Para na be:
―Casi na lu ca,
nga laani.
12 Peru óraque neca gudixhe irá ca xaíque sti ca sacerdote ne ca xaíque sti guidxi xqueja be,
ma qué niníꞌ ru be gastiꞌ.
13 Para na Pilatu,
rabi laabe:
―Cadi cayuna diaga lu irá ni cugaani cabe luguiá lu ri la?
14 Peru qué nicabi be laa nin ti diidxaꞌ.
Ne nabé bidxagayaa gobernador que.
Guta gati Jesús
15 Chiqué,
cada iza ra cayaca saa,
rundaa gobernador que ti presu para ca binni que,
tutiisi gapa ca gana.
16 Ne iza que nuu ti presu ni zaꞌbi stiidxa irá ladu,
lá Barrabás.
17 Ngue runi,
ora bidxiña cabe,
na Pilatu rabi laacabe:
―Tu racalaꞌdxi tu undaa para laatu yaꞌ,
Barrabás la?
o Jesús ni rabi cabe Cristu.
18 Nanna ca Pilatu bedané cabe Jesús ra nuu purti si qué na cabe chi nanda binni laa.
19 Ma zuba Pilatu ra juzgadu stiꞌ,
bisenda tidxi xheela laa,
na xheela rabi laa:
―Cadi guꞌnu hombre chaꞌhui ca gastiꞌ,
purti pur laabe nabé bine sufrir lu bacaanda nuchiꞌ.
20 Peru ucuá ca xaíque sti ca sacerdote ne ca xaíque sti guidxi tema lú ca binni que para inaba ca ilaa Barrabás ne gati Jesús.
21 Oraque na gobernador que rabi laacabe sti tiru:
―Tu pe de laacabe racalaꞌdxi tu undaa para laatu pue.
Para na cabe:
―Barrabás.
22 Oraque na Pilatu rabi laacabe:
―Yanna xi gune nia Jesús ni rabi cabe Cristu ri yaꞌ.
Para bicabi irá cabe:
―¡Icá be lu cruz!
23 Para na gobernador que:
―Xiñee,
xi huayuni be.
Peru laacabe jma rusi bicaa cabe ridxi,
na cabe:
―¡Icá be lu cruz!
24 Biiya si Pilatu pur gana si caníꞌ ne mayaca uzulú ti bulla la?
gucuaa nisa ne gudiibi ná nezalú ca binni que,
para na rabi laacabe:
―Cadi luguiaꞌya diaꞌ nuu donda purti chi ixii rini sti hombre chaꞌhui riꞌ.
Laatu laguuya xi iree xa ni laatu.
25 Para na ca binni que:
―Zaa guiaana donda ca luguiá du ne luguiá ca xiiñi du.
26 Oraque bindaa be Barrabás para laacaꞌ,
ne bini mandar be quiñe cabe Jesús para bidii be laa icá lu cruz.
27 Oraque gucuaa ca soldadu sti gobernador que Jesús,
yenduu ca laabe ndaani palaciu para bidxiña idubi batallón ra nuu be.
28 Gulee ca xhaba be ne bicuaꞌqui ca laabe ti lari xhiñáꞌ.
29 Ne bizáꞌ ca ti laꞌpa de guichi uluu ca ique be ne bigaasa ca tindaa gueere ná be ladu derechu.
Oraque bizuxibi ca xañee be ne bini burla ca laabe,
na caꞌ:
―¡Viva rey sti ca judíu!
30 Ne bichá xhinni ca lú be ne guxha ca gueere que ná be,
bichenda ca ni ique be.
31 Biluxe si bini burla ca laabe zaqué la?
gulee ca lari que ne bigacu ca laabe xhaba be,
ne ziné ca laabe para icá be lu cruz.
Ucuá Jesús lu cruz
32 Ra ze cabe que bidxaaga cabe ti hombre de Cirene lá Simón ne bicaa cabe laa gua cruz sti Jesús
33 dede yendá cabe ti lugar lá Gólgota.
Ni riníꞌ diidxa Gólgota ca la?
Lugar sti Calavera.
34 Raqué bidii cabe laabe vinagre nucha nisa xculáꞌ.
Peru ora biꞌya be xi naca ni la?
qué niná be ñeꞌ be ni.
35 Bicaa si cabe laabe lu cruz guluu cabe xhaba be lu rifa,
ne cada tobi ucuaa ni gulee.
Guca ni zaqué ti iree ni modo pe uníꞌ Dios de ruaa ti profeta de laabe,
ra na:
“Gudiizi cabe xhabaꞌ,
ne uluu cabe laa lu rifa.”
36 Para gurí cabe cayapa cabe laabe.
37 Ne bicaa cabe ca diidxa ri xaíque be:
“Ndi nga Jesús Rey sti ca judíu.”
Purti na cabe pur laani cá be lu cruz.
38 Oraque bicaa né cabe laabe chupa gubaanaꞌ,
tobi ladu derechu ne stobi ladu bigaꞌ.
39 Ne cayuni burla ca binni zidiꞌdi raqué laabe,
cuniibi ique ca lú be,
40 na caꞌ:
―Lii nouꞌ zuxhá lu yuꞌdu roꞌ ne zucuí lu ni lu chonna gubidxa.
Yanna bilá laca lii.
Pa dxandí Xiiñi Dios lii la?
biete de lu cruz ca.
41 Ne zaqueca na ca xaíque sti ca sacerdote ne ca maistru de ley ne ca fariseu ne ca xaíque sti guidxi,
cuchá ca ni lú be:
42 ―Stobi bilá be peru laca laabe qué zanda ulá be.
Na be rey sti Israel laabe,
ne pa dxandí ni la?
guiete be de lu cruz ca yanna,
ne zuni cre nu laabe.
43 Ucuá lú be Dios,
yanna cueza be ulá Dios laabe,
pa nadxii laabe,
purti na be Xiiñi Dios laabe.
44 Ne zaqueca cayuni burla ca gubaana ni cá né be que laabe.
Ra guti Jesús
―¡Elí,
Elí,
lama sabactani!
Didxazá la?
niníꞌ be:
Dios stinneꞌ,
Dios stinneꞌ,
xiñee ma bisaanu naa.
47 Ne ora bina diaga cani zuhuaa raqué ni uníꞌ be que la?
na caꞌ:
―Cucaa ridxi be Elías.
48 Oraqueca biree tobi de laaca yecaa ti esponja bigadxe de vinagre ne bidxiiba ni ique ti gueereꞌ,
ne biguéꞌ ni laabe.
49 Peru na xcaadxi que rabi laa:
―Zaa nuu be,
iduꞌya nu pa zeda ulá Elías laabe.
50 Bigueta bicaa be sti ridxi ne raqué guti be.
51 Ne mala guca cortina sti yuꞌdu roꞌ chupa ndaa de punta punta,
ne guca xu,
gulaa stale guie.
52 Ne bixale caadxi baꞌ,
biasa stale de ca xpinni Dios ni ma guti.
53 Ne dxi ma biasa Jesús de lade gueꞌtu que la?
biree cabe de ndaani ca baꞌ que,
uyé cabe ndaani guidxi Jerusalén ne biiya stale binni laacabe.
54 Nabé bidxagayaa capitán ni cayapa Jesús que,
laa ne ca soldadu stiꞌ,
purti bini sentir ca guca xu ne biiya ca irá cosa ni guca que,
para na:
―Dxandí Xiiñi Dios ndiꞌ.
55 Zitu huiini de raqué zuhuaa caadxi gunaa ni beda nanda Jesús de Galilea,
beeda ca para gacané ca laabe.
Zuhuaa ca cayuuya ca ni cayaca que.
56 Lade cabe nuu María Magdalena ne María jñaa Jacobo ne José,
ne jñaa ca xiiñi Zebedeu.
Ra bigaachi Jesús
57 Huaxhinni que beeda ti hombre ricu de Arimatea lá José,
tobi de cani uzá né Jesús chiqué.
58 Ne uyé be ra nuu Pilatu,
yenaba be cuerpu sti Jesús laa,
para bisenda tidxi ca xpinni gudii cuerpu que laabe.
59 Ne ucuaa si be cuerpu que,
bichenda be laa ti lari gueela nayá,
60 ne gudixhe be laa ndaani ti baꞌ cubi ni maca gundaa be para laabe lu ti guie,
ne biseegu be sti guie ngola ra puerta baꞌ que,
para biree be ze be.
61 Ne zuba María Magdalena ne sti María gaxha ra puerta baꞌ que.
Cani cayapa xpaꞌ Jesús
62 Udiꞌdi si viernes que,
bidxiña ca xaíque sti ca sacerdote ne ca fariseu ra nuu Pilatu,
63 na ca rabi ca laabe:
―Señor,
cayetenalaꞌdxi du ni uníꞌ hombre rusiguii que dxi nabani,
na raguionna gubidxa ziasa de lade gueꞌtuꞌ.
64 Nga runi canaba du lii guseendu tu chi gapa ra baꞌ que dede ganda chonna gubidxa quenquita gueeda ca discípulu stibe cuana ca xcuerpu be ne gabi ca binni biasa be de lade gueꞌtuꞌ.
Ne zacá jma rusi zusiguii cabe,
que dxi bizulú ni.
65 Para na Pilatu rabi laacabe:
―Racá laicaa caadxi soldadu,
lachiné,
ne lauseegu chaahui ruaa baꞌ que,
biaꞌ ganda tiꞌ.
66 Oraque biree cabe uyé cabe ne biseegu dxiichi cabe ruaa baꞌ que ne bisaana cabe ca soldadu que gapa ni.