2 Korintus
Paulus pe surat yang kadua for jemaat di Korintus
Kata Pengantar
Ni kitab 2 Korintus ini, Paulus yang da tulis. Kitab ini de pe model surat, kong ini surat yang kadua yang Paulus da kirim for jemaat di kota Korintus. Paulus sandiri yang pertama kali da kase tau tu Kabar Bae tentang Yesus Kristus pa orang-orang di Korintus (Kis. 18:1-17).
Waktu Paulus ada di luar kota Korintus, ada bebrapa orang yang nyanda suka pa Paulus muncul di jemaat Korintus, dorang bilang kalu Paulus itu bukang rasul, tu Tuhan Yesus pe utusan. So itu Paulus utus pa Titus pigi ka Korintus. Titus bawa tu Paulus pe surat, tu surat yang de pe kata-kata kras for orang Korintus yang da tolak pa Paulus. Waktu Titus bale dari Korintus for baku dapa deng Paulus di daera Makedonia, dia se tau kalu ada banya orang Korintus yang so bruba tu dorang pe hati, dorang so akui ulang kalu Paulus itu rasul kong dorang lei rindu pa Paulus. Mar masi ada lei no bebrapa yang dong pe hati kras, tu masi tetap nimau mo akui pa Paulus. Kong waktu Paulus dengar tu brita itu, dia tulis ni surat yang kadua ini. Di surat yang kadua ini, dia se tau tentang dia pe karja for se tau tu Kabar Bae tentang Yesus (2Kor. 2:14–6:10). Dia se tau pa dorang kalu dia sayang skali pa dorang (2Kor. 6:11-13; 7:2-4, 13-16), kong dia snang lantaran banya dari pa dorang yang so bruba ulang tu hati for akui kalu dia itu rasul (2Kor. 7:5-13). Abis itu, dia minta pa dorang supaya dorang kumpul doi sumbangan for orang-orang Kristen yang miskin di daera Yudea (2Kor. 8-9), supaya waktu dia datang pa dorang, dia bole ambe tu doi kong bawa ka Yudea. Abis itu, dia pe kata-kata kras for togor pa orang-orang yang nimau mo akui pa dia (2Kor. 10-13). Paulus lei tulis ni surat for mo malawang tu guru-guru palsu yang trus-trus bicara for malawang pa dia, dorang pe tujuan supaya orang-orang nyanda akui kalu dia itu rasul deng dorang brusaha se putar bale tu Kabar Bae yang Paulus kase tau.