Orang Makedonia jadi conto for ja bakase sumbangan
8
1 Sudara-sudara, torang mo se tau pa ngoni tentang tu Tuhan Allah pe bae yang Dia da se tunjung pa jemaat-jemaat di daera Makedonia. 2 Dorang itu so dapa tes deng macam-macam pendritaan yang brat, mar dorang pe hati tetap sukacita waktu da mangada tu siksa itu. Biar lei dorang miskin skali, mar dorang pe hati rasa suka ja bakase pa orang laeng. 3 Kita basaksi tentang dorang kalu dorang itu so kase iko dong pe kemampuan, malatare lebe dari yang mampu dorang kase, kong nyanda ada yang paksa pa dorang for ja bakase. 4 Dorang sandiri bamohon-mohon pa torang supaya dorang bole ambe bagean for bantu kase doi sumbangan pa tu Tuhan pe orang-orang yang ada di Yerusalem. 5 Dorang itu da bakase doi sumbangan lebe banya dari tu torang da harap tu dorang mo kase, dorang da kase dong pe diri pertama pa Tuhan, kong abis itu dorang kase dong pe diri pa torang iko tu Tuhan Allah pe mau. 6 So lantaran itu, torang se smangat pa Titus supaya dia se trus beking apa tu dia so mulai da beking pa ngoni, dia bantu kumpul ngoni pe doi sumbangan sampe samua siap. 7 Ngoni so jadi bagus di banya hal rupa ini: ngoni pe percaya kuat, ngoni mampu babicara di muka pa orang-orang, ngoni so tau banya hal rohani, deng ngoni slalu ada smangat for ja beking tu Tuhan pe mau, kong ngoni lei sayang skali pa torang. Ngoni so bagus di hal-hal itu, bagitu lei ngoni musti bagus waktu ngoni babantu for kase tu doi sumbangan pa tu orang-orang miskin, itu tanda ngoni pe sayang pa dorang.8 Kita da bicara tentang tu doi sumbangan itu bukang for mo prenta pa ngoni, mar kita cuma suka ngoni tau pe rajin skali tu orang-orang di Makedonia ja babantu, kong kalu ngoni lei beking bagitu, dari situ kita bole tau kalu ngoni butul-butul basayang pa orang laeng. 9 Soalnya ngoni so tau bagimana tu bae yang Tuhan Yesus Kristus tu torang ja iko akang so se tunjung pa ngoni. Dia yang kaya beking Dia pe diri itu jadi miskin for ngoni pe bae, supaya Dia yang miskin itu bole beking ngoni jadi kaya di samua hal.
10 Ini kita pe pendapat: satu taong yang lalu, ngoni tu pertama yang suka mo babantu tu orang-orang miskin di Yerusalem sampe ngoni mulai kumpul-kumpul tu doi for mo bantu pa dorang. Yang ngoni da beking itu ada de pe guna for ngoni, 11 kong skarang se klar jo apa yang ngoni so mulai beking itu. Dulu ngoni pe smangat waktu ngoni da mulai kumpul tu doi sumbangan itu, so itu skarang ngoni lei musti smangat rupa waktu itu for se klar bakumpul tu sumbangan itu, iko apa yang ngoni mampu. 12 Soalnya kalu torang ada smangat for bakase deng lei torang bakase iko apa yang ada pa torang, Tuhan mo trima apa tu torang da kase. Dia nyanda perna minta pa torang bakase dari apa yang nyanda ada pa torang.
13 Soalnya kita nimau kalu ngoni bakase lebe banya dari tu ngoni mampu mo kase sampe ngoni pe tanggongan lebe brat kong tu orang laeng pe tanggongan lebe ringan dari ngoni, nyanda bagitu kasiang. Mar ini samua de pe tujuan supaya torang sama-sama bantu tu orang laeng deng tanggongan yang iko masing-masing pe kemampuan. 14 Jadi skarang ini, lebe bae apa yang lebe tu ada pa ngoni bole mo se cukup akang apa yang kurang pa dorang di Yerusalem, supaya lei nanti apa yang lebe tu ada pa dorang bole mo se cukup lei apa yang kurang pa ngoni, deng bagitu samua bole mo sama-sama se cukup akang apa yang kurang. 15 Itu samua sama deng tu da tulis di Kitab Suci,
“Orang yang dapa hasil banya,
dia nyanda talebe-lebe.
Orang yang dapa hasil sadiki,
dia nyanda kurang apa-apa.”
Titus deng de pe dua tamang dapa utus for pi antar tu doi sumbangan
16 Torang bilang makase pa Tuhan Allah, Dia yang kase pa Titus hati yang sama deng kita for suka skali babantu pa ngoni. 17 Soalnya Titus trima deng bae waktu torang da se nasehat pa dia for pi babantu pa ngoni. Mar bukang cuma lantaran torang da suru kong dia da beking itu, mar memang dia sandiri smangat skali mo pi babantu pa ngoni. 18 Torang lei da utus satu sudara yang percaya sama-sama deng dia for pigi pa ngoni. Samua jemaat ja puji-puji tu sudara itu lantaran de pe karja bagus waktu ja kase tau tu Kabar Bae. 19 Bukang cuma itu, tu jemaat-jemaat lei da pili pa dia for batamang akang deng torang for mo antar tu doi-doi sumbangan pa sudara-sudara yang percaya tu ada di Yerusalem. Torang beking tu samua itu supaya Tuhan bole dapa puji deng hormat, deng lei orang bole lia kalu torang memang suka mo babantu orang.
20 Torang hati-hati skali mo antar tu doi sumbangan supaya nyanda ada orang yang mo se sala pa torang waktu torang antar tu doi itu yang de pe jumla pe basar ini. 21 Soalnya torang suka mo beking apa yang butul bukang cuma di muka pa Tuhan, mar di muka pa manusia lei.
22 Kong sama-sama deng Titus deng tu sudara yang satu, torang da utus satu sudara lei yang percaya for pigi sama-sama deng dorang. Tu sudara itu, torang so tes brapa kali, kong memang dapa lia kalu dia rajin beking tu Tuhan pe karja. Kong skarang lei, dia suka skali mo bantu pa ngoni lantaran dia percaya skali pa ngoni. 23 Kong tentang Titus, dia itu kita pe tamang tu da bakarja deng kita for bantu pa ngoni. Tu dua sudara yang percaya tu da sama-sama deng Titus, dorang itu da dapa utus dari jemaat-jemaat for mo pi antar tu sumbangan ka Yerusalem, kong Kristus bole dapa puji deng dapa hormat lantaran apa tu dorang da beking. 24 So itu, ngoni tu orang Korintus, ngoni kase tunjung jo tu ngoni pe sayang pa dorang tiga yang da antar tu sumbangan itu, supaya samua jemaat tau kalu ngoni butul-butul sayang pa dorang deng lei apa tu torang ja se bangga-bangga tentang ngoni itu memang butul.