2 Korintus 7

1 Sudara-sudara yang kita sayang, torang so trima tu Tuhan pe janji-janji itu, so itu mari jo torang beking bersi tu torang pe diri dari samua hal yang bole mo beking kotor tu torang pe hati deng torang pe badan. Deng torang beking bagitu, tamba hari torang yang so kudus jadi lebe sempurna deng tako pa Tuhan Allah.

Paulus snang lantaran dia pe surat bole bantu orang Korintus bertobat

2 Sudara-sudara, kase akang dang tampa torang ini pa ngoni pe hati. Torang nyanda perna beking sala pa sapa-sapa, nyanda perna beking sesat pa sapa-sapa, deng torang lei nyanda ja bacari untung biar cuma pa satu orang. 3 Kita bilang bagitu, de pe tujuan bukang mo se sala pa ngoni. Soalnya rupa tu kita so perna da bilang, torang sayang pa ngoni, itu sama deng ngoni so ada pa torang pe hati. Torang nyanda mo tapisa deng ngoni biar torang hidop ato mati. 4 Kita memang percaya skali pa ngoni, malatare kita lei bangga skali pa ngoni. Jadi biar lei kita banya kali ja mangada tu pendritaan, kita pe hati tahibur deng kita lei rasa snang skali.

5  Soalnya waktu torang sampe di daera Makedonia, torang nyanda ada waktu for mo se istirahat tu tong pe badan, mar di mana-mana torang ja mangada tu pendritaan. Torang ja mangada tu tong pe rasa tako yang ada pa tong pe diri sandiri lantaran torang da pikir-pikir pa ngoni, deng lei tu orang laeng yang ja baku ambe deng torang. 6 Mar Tuhan Allah tu ja kase kuat orang yang putus asa. Dia so kase kuat torang pe hati deng cara kirim Titus pa torang. 7  Torang pe hati jadi kuat bukang cuma lantaran Titus da datang pa torang, mar torang lei jadi kuat lantaran tu kabar tentang ngoni yang dia da se tau pa torang. Dia da se tau pa torang bagimana ngoni da beking dia pe hati jadi kuat waktu dia da sama-sama deng ngoni, dia lei bilang kalu ngoni rindu for mo baku dapa deng torang. Trus ngoni lei kata pe hati manyasal deng apa tu ngoni da beking dulu, deng lei dia bilang tentang ngoni pe smangat for babela pa kita. So lantaran itu no tu kita pe sukacita lebe tatamba lei.

8 Jadi biar lei kita so beking ngoni pe hati jadi sedi deng tu kita pe surat yang lalu itu, kita nyanda rasa manyasal deng itu. Memang no di hari waktu kita da tulis tu surat itu kita da rasa manyasal, lantaran kita tau kalu tu surat itu mo beking ngoni pe hati jadi sedi, biar lei tu sedi yang ngoni da rasa itu cuma nyanda lama. 9 Mar skarang kita rasa sukacita, itu bukang lantaran ngoni da rasa tu sedi, mar lantaran tu sedi yang ngoni da rasa itu beking ngoni jadi bertobat. Soalnya tu sedi yang ngoni da rasa itu, itu sedi yang sama deng tu Tuhan Allah pe mau, kong kita pe surat itu nyanda beking rugi apa-apa pa ngoni, biar lei cuma sadiki. 10 Kita bilang bagitu lantaran tu sedi yang iko Tuhan Allah pe mau, itu beking orang bole bertobat kong mo dapa slamat, so itu torang nyanda manyasal deng tu sedi rupa itu. Mar komang tu sedi yang dari orang-orang yang cuma ja iko tu dunia pe mau, tu sedi itu nyanda beking orang jadi bertobat kong dorang nanti mo dapa hukuman tapisa deng Tuhan Allah for slama-lamanya.

11 Co ngoni tarukira jo bae-bae, tu sedi yang ngoni rasa waktu baca surat itu, itu tu sedi yang iko Tuhan pe mau. Tu sedi itu beking ngoni lebe brusaha mo beking tu butul, ngoni se bersi tu ngoni pe nama dari tu kalakuan yang nyanda bagus tu ngoni so perna da beking, ngoni binci deng dosa, ngoni tako beking dosa, ngoni rindu baku dapa deng torang, deng ngoni lei smangat for hukum tu orang-orang yang da beking dosa. Samua tu ngoni da beking itu se bukti kalu ngoni nyanda sala di samua hal itu. 12 Jadi waktu kita da tulis tu surat itu pa ngoni, itu bukang lantaran for mo bantu tu orang yang da beking tu sala itu, ato bukang lei for mo bantu pa orang yang mendrita lantaran tu sala yang orang itu da beking pa dia. Mar kita tulis tu surat supaya ngoni sandiri bole tau kalu ngoni itu memang da sayang butul-butul pa torang, deng Tuhan Allah lei bole tau kalu ngoni so basayang deng butul-butul. 13 So lantaran ngoni da beking tu kita da tulis itu, torang pe hati jadi kuat.

Kong biar lei torang pe hati so jadi kuat, torang lei lebe rasa sukacita waktu torang tau kalu Titus da rasa sukacita lantaran ngoni da bae-bae pa dia kong itu beking dia pe hati jadi snang. 14 Kita memang da se bangga-bangga ngoni pa Titus seblum dia pigi pa ngoni, kong memang ngoni nyanda beking malo pa kita. Bagitu lei samua yang torang da se tau pa ngoni itu butul sama deng samua tu torang da se bangga-bangga akang tentang ngoni pa Titus lei memang butul. 15 Kong dia pe sayang pa ngoni lebe tatamba basar, lantaran dia inga kalu ngoni samua itu dengar-dengaran pa dia, deng lei bagimana ngoni da trima pa dia deng rasa hormat. 16 Kita rasa sukacita lantaran di samua hal kita bole mo percaya akang pa ngoni.