Galatia
Paulus pe surat for jemaat-jemaat di daera Galatia
Kata Pengantar
Ni kitab Galatia ini Paulus yang da tulis. Kitab ini de pe model surat, kong Paulus kirim ni surat for jemaat-jemaat di daera Galatia. Tu orang-orang di daera Galatia itu bukang orang Yahudi. Dulu, dorang nintau tu Tuhan pe firman, so itu dorang semba pa opo-opo. Mar waktu Paulus datang di situ kong se tau tu Kabar Bae tentang Yesus, ada dari pa dorang yang jadi percaya pa Tuhan Yesus. Paulus tinggal di daera Galatia mar nyanda lama, trus Dia se tinggal tu daera itu. Abis itu, ada orang Yahudi yang so percaya pa Yesus datang ka situ kong mangajar yang nyanda butul. Dorang se ajar kalu nyanda cukup orang-orang cuma deng percaya pa Yesus trus jadi orang yang butul di muka pa Tuhan, mar orang musti dapa sunat kong iko samua atoran agama Yahudi yang ada di atoran-atoran di Kitab Taurat. Kong waktu Paulus dengar tu dorang pe ajaran itu, dia jadi mara. So itu dia tulis ni surat ini for se jelas pa orang-orang percaya di Galatia tentang ini: tu orang yang jadi orang yang butul di muka pa Tuhan, itu bukang lantaran da iko tu atoran-atoran di Kitab Taurat rupa tu atoran dapa sunat, mar itu cuma lantaran orang percaya pa Yesus. Paulus bilang kalu orang percaya pa Yesus, dia itu bole mo se sama deng Abraham pe keturunan. Paulus se tau for blajar dari Abraham. Abraham itu percaya pa Tuhan, so itu Tuhan bilang kalu Abraham itu orang yang butul. Torang yang percaya pa Yesus Kristus, torang lei jadi orang yang butul di muka pa Tuhan lantaran torang pe percaya itu, kong torang lei mo dapa berkat yang Tuhan so janji for Abraham pe keturunan (Gal. 3:6-9). Paulus se jelaskan kalu tu orang yang percaya Yesus, dia itu so bebas dari atoran-atoran di kitab Taurat, deng tu Roh Kudus yang kuasai dia sampe bole beking banya hal yang bae.