Galatia 1

Galatia

Paulus pe surat for jemaat-jemaat di daera Galatia

Paulus pe salam

1 Ni surat dari kita, Paulus. Kita ini rasul tu Yesus Kristus pe utusan. Kita da jadi Dia pe rasul bukang lantaran manusia da suru ato bukang lantaran manusia yang da angka pa kita for jadi Dia pe rasul, mar Yesus Kristus deng Tuhan Allah tu torang pe Bapa yang da angka pa kita. Tuhan Allah itu no yang da se hidop ulang pa Yesus Kristus waktu Yesus mati.

2 Surat ini for ngoni tu jemaat-jemaat yang ada di daera Galatia. Samua sudara yang percaya tu da sama-sama deng kita di sini kirim surat ini for ngoni.

3 Kita minta pa Tuhan Allah tu torang pe Bapa deng pa Tuhan Yesus Kristus supaya kase tunjung tu bae pa ngoni deng lei beking ngoni hidop deng hati tenang. 4 Tuhan Yesus Kristus itu yang so srahkan Dia pe diri for tubus tu torang pe dosa-dosa supaya Dia bole se bebas pa torang dari tu kuasa jaha yang skarang ada di dunia ini, Dia beking samua itu iko Tuhan Allah tu torang pe Bapa pe mau. 5 Puji deng hormat jo pa Tuhan Allah sampe slama-lamanya! Amin.

Paulus togor tu jemaat-jemaat di Galatia

6 Sudara-sudara, kita heran skali pa ngoni. Soalnya Tuhan Allah so pangge pa ngoni for iko pa Dia, Dia se tunjung tu Dia pe bae pa ngoni lewat Kristus. Mar ngoni pe capat da bruba, ngoni so nyanda percaya lei pa Dia, kong ngoni so iko tu ajaran laeng yang orang da se tau pa ngoni, tu dorang ja bilang kabar bae tentang Kristus. 7 Padahal sebenarnya itu bukang tu Kabar Bae tentang Yesus. Mar dorang suka beking kacau ngoni pe pikiran deng cara se putar bale tu Kabar Bae tentang Kristus. 8 Mar biar lei torang ato satu malaekat dari sorga datang se tau pa ngoni tu ajaran yang baku beda deng tu Kabar Bae tentang Kristus tu torang so se tau lebe dulu pa ngoni, dia itu mo dapa kutuk dari pa Tuhan Allah! 9 Waktu torang masi ada deng ngoni, torang so perna bilang pa ngoni kong skarang kita mo bilang ulang lei pa ngoni bagini: kalu ada orang se tau pa ngoni tu kabar bae tentang Kristus yang baku beda deng tu perna ngoni trima dari pa torang, dia itu mo dapa kutuk dari pa Tuhan Allah.

10 Kita da bilang bagitu, bukang supaya kita bole mo dapa pujian dari manusia, bukang bagitu kasiang, kita cuma suka cari pujian dari pa Tuhan Allah. Mungkin ada dari pa ngoni yang bapikir kalu kita cuma mo beking snang pa manusia, padahal nyanda bagitu. Kalu misalnya kita cuma suka mo beking snang tu manusia pe hati, itu de pe arti kita ini bukang tu orang yang ja beking tu Kristus da suru.

Paulus se cirita bagimana dia jadi rasul tu Yesus Kristus pe utusan

11 Sudara-sudara, ngoni musti tau kalu tu Kabar Bae yang kita so perna da se tau pa ngoni itu, itu bukang ajaran dari manusia. 12 Soalnya tu Kabar Bae itu kita da trima bukang dari pa manusia, deng lei bukang manusia yang da se ajar itu pa kita, mar Yesus Kristus sandiri yang da se tau itu langsung pa kita.

13  Ngoni tantu so dengar tentang kita pe hidop dulu waktu kita masi iko tu agama Yahudi pe atoran. Waktu itu, kita ja siksa abis-abisan tu Tuhan Allah pe jemaat deng kita brusaha kras for se abis pa dorang. 14  Kong di agama Yahudi, kita jao lebe banya blajar tentang tu torang pe atoran-atoran agama deng ja beking tu atoran itu. Kong di antara tu kita pe tamang-tamang yang satu umur deng kita tu sama-sama orang Yahudi, nyanda ada yang sama deng kita. Kita memang sunggu-sunggu da iko akang samua tu adat yang torang pe nene moyang ja iko akang.

15  Mar Tuhan Allah so pili pa kita dari dulu lei waktu kita masi pa mama pe kandungan, Dia se tunjung tu Dia pe bae pa kita deng cara pangge pa kita for iko pa Dia. 16 Waktu Tuhan Allah pangge pa kita, Dia snang se tunjung tu Dia pe Anak pa kita supaya kita bole se tau pa orang-orang bukang Yahudi tentang tu Dia pe Anak itu. Kong kita nyanda minta pendapat pa orang-orang tentang itu. 17 Di Yerusalem, ada lei tu orang-orang yang so lebe dulu dari kita tu da jadi rasul-rasul. Kita lei nyanda pigi ka Yerusalem pi baku dapa deng tu orang-orang yang so lebe dulu jadi rasul for minta pendapat pa dorang, mar kita brangkat ka tana Arab, kong abis itu kita babale lei ka Damsyik.

18  Kong serta so lewat tiga taong, kita pigi ka Yerusalem for baku dapa deng Petrus. Kita da tinggal deng dia slama lima blas hari. 19  Mar waktu itu, kita nyanda baku dapa deng tu rasul-rasul yang laeng, kita cuma da baku dapa deng Yakobus tu Tuhan Yesus pe sudara. 20 Sudara-sudara, apa tu kita da tulis tentang kita pe diri ini memang butul samua, Tuhan Allah tau kalu kita nyanda badusta. 21 Kong abis baku dapa deng dorang, kita pigi ka daera-daera di Siria deng Kilikia. 22 Waktu itu, tu orang-orang yang percaya pa Yesus di daera Yudea blum sempat kanal pa kita. 23 Dorang di sana cuma da dengar tu cirita tentang kita bagini, “Tu orang yang dulu ja siksa pa torang tu orang yang percaya pa Yesus, skarang tu orang itu ja se tau pa orang-orang tentang percaya pa Yesus, padahal dulu dia itu yang mo se abis pa torang yang percaya pa Yesus.” 24 Kong dorang puji deng hormat pa Tuhan Allah lantaran apa tu Tuhan da beking pa kita.