EFESUS
Paulus pe surat for jemaat di Efesus
Kata Pengantar
Ni kitab Efesus ini Paulus yang da tulis. Ini surat Paulus da tulis for jemaat di Efesus deng jemaat-jemaat yang ada di sekitar situ. Dia tulis ni surat waktu dia ada di kota Roma, waktu itu dia da dapa se maso ka bui lantaran dia pe karja se tau tu Kabar Bae tentang Yesus pa orang-orang (Ef. 3:1, 13, 4:1). Tu orang-orang di Efesus itu paling banya bukang orang Yahudi (Ef. 2:11-12). Kota Efesus itu ada di propinsi Asia (skarang ini di negara Turki). Kota itu kota yang basar deng kota yang top. Paulus so perna tinggal di situ slama tiga taong kong mangajar tu Kabar Bae tentang Yesus deng beking mujisat di situ (Kis. 19). Banya orang di Efesus yang jadi percaya pa Yesus.
Di surat ini, Paulus bicara tentang berkat rohani dari sorga yang torang trima lantaran torang so percaya pa Kristus (Ef. 1:3). Paulus se tau tentang Tuhan pe rencana mo beking jadi satu samua yang di sorga deng samua yang di bumi di bawa Kristus pe kuasa, trus samua itu mo jadi pas di waktu yang Tuhan so tentukan (Ef. 1:9-10). Di ni surat, Paulus pake bebrapa macam kiasan for kase tau tentang tu de pe inti dari surat ini: Yesus itu dia se sama deng kapala, kong tu orang-orang yang percaya itu dia se sama deng Kristus pe anggota badan. (Ef. 1:10, 22-23, 4:4, 15-16, 5:23-32). Trus dia se sama lei Yesus deng batu utama dari satu ruma yang da se badiri, kong tu orang-orang percaya itu sama deng ruma tu da se badiri (Ef. 2:20-21). Paulus lei bilang kalu Roh Kudus itu jaminan for orang percaya, tu jaminan yang jadi tanda kalu torang ini Tuhan punya kong torang mo trima apa yang Tuhan so janji mo kase pa torang (Ef. 1:13, 4:30). Trus Paulus lei bicara tentang laki bini sama deng Kristus deng jemaat (Ef. 5:23-32). Di surat ini Paulus se nasehat for laki bini, orang tua deng anak, budak deng tu tuang-tuang (Ef. 5:22–6:9). Dia lei se nasehat supaya pake tu Tuhan Allah pe perlengkapan prang, tu perlengkapan prang itu no tu perlengkapan rohani supaya bole mo batahang for malawang tu cobaan-cobaan dari setang pe bos (Ef. 6:11).