Filipi
Paulus pe surat for jemaat di Filipi
Kata Pengantar
Ni kitab Filipi ini Paulus yang da tulis. Kitab ini de pe model surat, kong Paulus da kirim ni surat for jemaat di kota Filipi. Dia da tulis ni surat waktu dia ada di kota Roma, waktu itu dia da dapa se maso ka bui lantaran dia pe karja for se tau tu Kabar Bae tentang Yesus pa orang-orang (Flp. 1:13-17).
Waktu Paulus pigi for se tau tu Kabar Bae tentang Yesus di daera Eropa, pertama dia da lewat di kota Filipi tu kota yang top tu ada di propinsi Makedonia, satu daera yang ada di pemerenta Romawi. Di kota Filipi dia mulai tu de pe karja for se tau tu Kabar Bae tentang Yesus, kong di Filipi ini no tu jemaat pertama di Eropa. Biar lei ada banya orang di Filipi yang tolak pa Paulus, mar ada jo no yang jadi percaya pa Tuhan Yesus (Kis. 16).
Waktu Paulus se tinggal tu kota Filipi, bebrapa kali tu orang dari jemaat Filipi kirim akang doi for tolong pa dia. Waktu dorang da dengar dia da dapa se maso ka bui di Roma, dorang utus pa Epafroditus supaya pigi bawa akang doi for dia. Waktu Epafroditus sampe di Roma, dia tinggal bebrapa bulan di Roma for tolong pa Paulus. Serta so lewat bebrapa bulan, Paulus suru Epafroditus supaya pulang ka Filipi kong bawa surat yang dia da tulis ini.
Paulus pe maksut da tulis ni surat for se cirita tentang dia pe keadaan di bui. Dia se cirita kalu dia da dapa se maso ka bui lantaran dia pe karja for se tau tu Kabar Bae tentang Yesus. Mar justru deng dia maso ka bui, lebe banya kesempatan dia kase tau tu Kabar Bae tentang Yesus kong lebe tatamba tu orang yang jadi percaya (Flp. 1:12-16). Dia se tau pa jemaat Filipi kalu dorang musti hidop sama deng tu cara hidop yang pantas for tu orang yang so percaya tu Kabar Bae tentang Yesus, samua satu hati supaya lebe tatamba lei tu orang-orang yang jadi percaya pa Yesus (Flp. 1:27–2:18, 4:2-3). Dia se nasehat pa dorang supaya dorang hati-hati deng tu orang yang malawang pa dia, dorang tu da mangajar yang nyanda butul. Mar biar lei bagitu, Paulus pe hati waktu tulis ni surat snang deng slalu baharap yang bae lantaran dia pe percaya pa Yesus Kristus. Paulus pe maksut di surat ini for bilang makase banya for tu jemaat Filipi pe sumbangan yang dia so trima waktu dia da mangada tu susa. Dia lei se nasehat pa dorang supaya dorang sabar deng brani waktu mangada tu pendritaan. Dia minta supaya dorang tetap renda hati sama deng Tuhan Yesus. Dia se nasehat lei pa dorang supaya dorang hidop baku-baku bae deng nyanda beking sala supaya lebe tatamba orang yang percaya tu Kabar Bae tentang Yesus.