Filipi 1

Filipi

Paulus pe surat for jemaat di Filipi

Paulus pe salam

1  Ni surat dari kita, Paulus, deng Timotius. Torang dua ini cuma orang-orang yang ja beking tu Kristus Yesus ja suru. Ni surat for ngoni samua tu Tuhan pe orang-orang yang ada di Filipi, ngoni tu orang-orang yang so percaya pa Kristus Yesus. Ni surat lei for ngoni tu da jadi pemimpin jemaat deng lei for ngoni tu da jadi diaken di situ. 2 Kita minta supaya Tuhan Allah tu torang pe Bapa deng Tuhan Yesus Kristus kase tunjung tu Dia pe bae pa ngoni deng beking ngoni hidop deng hati tenang.

Paulus bilang makase pa Tuhan Allah for tu jemaat di Filipi

3 Tiap kali kita inga pa ngoni, kita bilang makase pa Tuhan Allah tu Tuhan yang kita ja semba. 4 Kong tiap kali kita basombayang for ngoni samua, kita slalu basombayang deng snang hati. 5 Kita bilang makase rupa itu lantaran dari tu hari pertama ngoni jadi percaya pa Tuhan sampe skarang, ngoni so ambe bagean supaya orang-orang bole dengar tu Kabar Bae tentang Yesus. 6 Tuhan Allah so mulai bakarja pa ngoni pe hati, Dia bakarja beking tu bae pa ngoni, kong kita yakin butul kalu Dia mo se trus tu karja itu sampe klar, sampe di hari Kristus Yesus datang ulang.

7 Ngoni da bantu pa kita waktu kita ada di bui ini, kong kita ada di bui ini lantaran kita da kase tau pa orang-orang Kabar Bae tentang Yesus. Ngoni so bantu pa kita da bela tu Kabar Bae tentang Yesus dari tu orang-orang yang malawang tu Kabar Bae itu. Ngoni samua so ambe bagean di karja yang Tuhan da kase pa kita, tu karja itu Dia da kase pa kita lantaran Dia pe bae yang Dia da se tunjung pa kita. So itu memang pantas no kalu kita bilang makase rupa itu waktu kita inga pa ngoni, lantaran ngoni samua ada pa kita pe hati. 8 Soalnya Tuhan Allah tau butul kalu kita rindu skali pa ngoni. Kita sayang skali pa ngoni sama deng Kristus Yesus sayang pa ngoni.

9 Kong kita basombayang akang for ngoni, kita minta pa Tuhan supaya lebe hari tu ngoni pe basayang pa orang lebe tatamba, ngoni lebe mampu mangarti banya hal, deng lei ngoni bole mo se beda mana yang butul deng yang nyanda butul. 10 Deng bagitu ngoni bole tau mo pili mana yang paling bae supaya ngoni bole hidop deng hati yang bersi, kong di hari Yesus Kristus datang ulang, ngoni nyanda ada sala apa-apa. 11 Kita basombayang supaya ngoni ja beking tu butul lantaran Yesus Kristus bakarja pa ngoni pe hati, trus orang-orang mo puji deng hormat pa Tuhan Allah lantaran dorang lia tu ngoni pe kalakuan yang butul itu.

Paulus se tau tu Kabar Bae waktu dia di bui

12 Sudara-sudara, kita suka ngoni tau kalu kita da dapa se maso di bui, kong itu justru beking tatamba trus tu orang-orang yang dengar tu Kabar Bae tentang Yesus. 13  Jadi so lantaran kita da dapa se maso ka bui di Roma ini, samua tu pengawal di istana yang ada di sini deng tu orang-orang laeng jadi tau kalu kita da dapa se maso ka bui lantaran kita ja beking tu Yesus Kristus da suru. 14 Kong so lantaran kita da dapa se maso ka bui, banya dari tu sudara-sudara yang percaya tu ada di daera ini jadi lebe kuat tu dorang pe percaya pa Tuhan, sampe dorang lebe brani ja kase tau tu Kabar Bae tentang Yesus deng nyanda ada rasa tako lei.

15 Memang butul ada bebrapa orang yang ja kase tau tu ajaran tentang Kristus lantaran dorang mangiri deng suka mo malawang pa kita. Mar ada lei katu no orang-orang yang ja kase tau tu ajaran tentang Kristus deng tujuan yang bae. 16 Dorang yang ja kase tau tu ajaran tentang Kristus deng tujuan yang bae itu, dorang beking bagitu lantaran dorang sayang pa kita deng dorang lei tau kalu Tuhan Allah da pili pa kita for bela tu Kabar Bae supaya orang bole tau tu Kabar Bae itu butul. 17 Mar ada bebrapa orang yang ja se tau tu Kabar Bae tentang Kristus bukang deng hati yang sunggu-sunggu. Dorang se tau tu Kabar Bae cuma supaya mo malawang pa kita, kong dorang pikir deng bagitu bole mo beking kita pe hati rasa susa di bui. 18 Mar biar lei bagitu, itu nyanda apa-apa for kita. Soalnya biar dorang kase tau tu Kabar Bae itu deng maksut yang bae ato nyanda bae, yang penting dorang ja kase tau tu Kabar Bae tentang Kristus pa orang-orang, itu yang beking kita pe hati snang kong tu rasa snang itu mo ada trus pa kita pe hati. 19 Soalnya kita tau kalu tu ngoni pe sombayang for kita deng lei tu Roh yang dari pa Yesus Kristus itu mo tolong pa kita, trus kita pasti nanti mo dapa se bebas. 20 Kita baharap deng yakin kalu kita nyanda mo malo deng apa tu kita da beking di samua hal, kong itu no tu kita pe keinginan lei yang paling dalam. Mar kita baharap trus supaya kita brani for beking tu Yesus da suru pa kita sama deng tu kita da beking dari dulu. Jadi for kita, nyanda masala kalu kita mo hidop ato mo mati, yang penting tu Kristus bole mo dapa hormat dari apa tu kita da beking pa kita pe hidop.

21 Soalnya for kita, kita hidop cuma for Kristus, kong kalu kita mati, itu kita pe untung lantaran kita bole mo sama-sama deng Kristus. 22 Mar kalu kita hidop trus di dunia ini, itu kita pe kesempatan for beking tu Yesus pe karja. Jadi kita nintau mana tu kita mo pili. 23 Kita ini sama rupa da dapa tarek di antara dua jalang. Kita suka mo se tinggal ni dunia ini for tinggal sama-sama deng Kristus, lantaran itu memang jao lebe bae. 24 Mar lebe bae kalu kita tinggal sama-sama deng ngoni di dunia ini lantaran ngoni masi perlu pa kita. 25 Kita yakin tentang ini, kita tau kalu kita masi tetap mo hidop sama-sama deng ngoni samua di dunia ini supaya kita bole mo tolong for beking kuat tu ngoni pe percaya pa Yesus, deng lei supaya ngoni bole lebe snang lantaran ngoni pe percaya. 26 So itu nanti ngoni mo lebe babangga puji pa Kristus Yesus waktu ngoni lia kita so bebas kong babale pa ngoni.

27 Jadi yang penting skarang, ngoni musti hidop sama deng tu cara hidop yang pantas for tu orang yang so percaya tu Kabar Bae tentang Kristus. Ngoni musti hidop sama deng itu supaya kalu kita pigi pa ngoni ato kalu kita blum sempat pigi pa ngoni, kita bole tau kalu ngoni samua tetap kuat percaya deng samua satu hati, ngoni sama-sama berjuang se tau tu Kabar Bae pa orang-orang supaya dorang bole jadi percaya. 28 Ngoni sama skali jang tako pa tu orang-orang yang malawang pa ngoni. Deng dorang lia ngoni nyanda tako rupa itu, itu jadi tanda kalu dorang mo binasa, deng itu lei tanda kalu Tuhan Allah mo se slamat pa ngoni dari hukuman dosa. 29 Soalnya Tuhan Allah so bantu pa ngoni supaya jadi percaya pa Kristus, mar bukang cuma itu, supaya lei ngoni bole rasa tu siksa lantaran ngoni percaya pa Dia. 30  So itu skarang ngoni da berjuang malawang tu orang-orang yang nyanda trima tu Kabar Bae tentang Yesus, kong itu sama deng tu ngoni perna da lia kita da berjuang akang dulu deng lei yang skarang kita masi da berjuang akang di sini sama deng tu ngoni da dengar.