Kolose
Paulus pe surat for jemaat di Kolose
Kata Pengantar
Ni kitab Kolose ini Paulus yang da tulis. Kitab ini de pe model surat, kong Paulus kirim ni surat for jemaat di Kolose. Kolose itu satu kota tu ada di Asia kacil, di sabla timur dari kota Efesus. Paulus nyanda perna pigi di Kolose, kong Paulus deng tu jemaat di sana nyanda baku kanal (Kol. 2:1). Jadi bukang Paulus yang pertama da se tau tu Kabar Bae di Kolose. Mar ada bebrapa orang percaya dari Efesus yang pigi ka Kolose kong kase tau tu Kabar Bae, so itu ada orang-orang yang jadi percaya pa Tuhan Yesus di sana. Mar biar lei Paulus nyanda perna ka sana, Dia slalu sayang pa dorang deng basombayang akang for dorang. Waktu Paulus da dapa se maso ka bui lantaran dia pe karja for se tau tu Kabar Bae, dia tulis ni surat for tu jemaat di Kolose.
Paulus dapa brita kalu ada guru-guru palsu yang ja se ajar tu ajaran yang sala di Kolose. So lantaran itu, Paulus tulis ni surat for se inga pa dorang tentang tu ajaran palsu itu. Tu guru-guru palsu itu bilang kalu orang mo kanal pa Tuhan Allah deng mo dapa slamat, tu orang itu musti semba pa kuasa-kuasa yang ada di langit deng di bumi sbagai prantara antara Tuhan deng manusia, deng orang musti lei dapa sunat iko tu atoran agama Yahudi deng lei musti iko tu hal-hal yang nimbole mo beking. Paulus nyanda bilang dorang pe sala satu-satu, mar Paulus pe tujuan di surat ini dia kase tau kalu lewat Yesus Kristus, Tuhan beking samua yang ada di dunia deng lei di sorga. Samua kuasa ada di Yesus Kristus, kong cuma lewat Dia manusia pe dosa-dosa bole dapa ampung kong deng itu manusia bole kanal pa Tuhan. Yesus itu yang luar biasa kong lewat Dia torang bole dapa tu hidop kekal. Tikhikus yang da bawa tu surat ini ka Kolose sama-sama deng tu Onesimus. Onesimus itu satu budak yang Paulus da suru supaya babale pa de pe tuang Filemon, satu dari tu anggota jemaat di Kolose.