Kolose 2

1 Kita suka mo se tau pa ngoni, kalu pe brat skali tu kita da berjuang for bantu pa ngoni yang percaya di Kolose deng for dorang di Laodikia, deng for samua orang yang blum kanal lei pa kita di tampa laeng. 2 Kita kase tau itu supaya bole se kuat ngoni pe hati deng lei ngoni bole mo baku-baku sayang sampe ngoni jadi satu. Deng bagitu ngoni bole butul-butul yakin deng tau tentang Tuhan Allah pe rahasia. Tu Tuhan Allah pe rahasia itu no tu Yesus Kristus yang dari dulu Tuhan Allah nyanda kase tau pa orang-orang, mar skarang torang so bole tau. 3 Lewat Yesus Kristus itu torang bole tau dua hal yang berharga skali yang dari dulu torang nimbole tau: torang bole tau banya hal deng torang bole tau mana tu bae yang torang musti beking. 4 Ini samua kita kase tau pa ngoni supaya biar lei ada orang yang mo bicara deng kata-kata manis for mo se sesat pa ngoni, ngoni pe percaya tetap kuat. 5 Soalnya biar lei kita sandiri nyanda ada sama-sama deng ngoni di sana, kita tetap ja inga pa ngoni, anggap jo kita ada di tenga-tenga pa ngoni. Kita lei snang da dengar tu ngoni pe hidop yang baku-baku bae, deng ngoni pe percaya pa Kristus tetap kuat.

Hidop iko pa Yesus deng Dia pe ajaran

6 Sudara-sudara, lantaran ngoni so trima pa Kristus Yesus sbagai ngoni pe Tuhan yang ngoni ja iko akang, jadi ngoni musti hidop iko pa Dia yang ngoni percaya itu. 7 Ngoni pe percaya pa Yesus Kristus musti kuat sama deng tu akar pohong yang da tatanang kuat di tana, kong ngoni musti hidop bagantong pa Dia. Deng ngoni pe percaya pa Dia musti tetap kuat iko tu ajaran yang so se ajar pa ngoni, kong ngoni musti slalu bilang makase pa Tuhan.

8 Sudara-sudara, ngoni musti hati-hati deng tu orang-orang yang mo se pengaru pa ngoni supaya ngoni iko tu dorang pe ajaran tentang agama. Dorang pe ajaran itu nyanda ada de pe guna apa-apa kong mo beking sesat pa ngoni. Tu dorang pe ajaran itu cuma da iko dorang pe nene moyang pe kebiasaan dulu deng lei iko tu atoran-atoran yang cuma bicara tentang hal-hal duniawi, tu dorang pe ajaran itu bukang ajaran yang butul tentang Yesus Kristus.

9 Jang ngoni tapengaru lantaran samua tu kuasa deng sifat dari Tuhan Allah itu ada pa Yesus Kristus pe diri. 10 Kong yang ada pa Yesus Kristus so ada lei pa ngoni yang so percaya pa Dia. Yesus Kristus itu berkuasa pa samua yang pegang prenta deng pa samua kuasa yang ada. 11 Kalu torang tu orang Yahudi dapa sunat, tu sunat itu cuma da beking pa torang pe badan for jadi tanda kalu torang so jadi Tuhan Allah pe orang. Mar skarang torang samua yang so percaya pa Kristus, torang lei sama deng so dapa sunat, mar bukang sunat sama deng tu torang orang Yahudi ja beking dulu. Torang samua yang percaya pa Kristus, torang pe sunat itu sama deng Kristus so se bebas pa torang dari tu sifat ja beking dosa. 12  Waktu ngoni dapa baptis, itu sama deng tu ngoni pe sifat ja beking dosa itu so mati kong so se kubur sama-sama deng Yesus Kristus. Kong deng lei tu baptisan ngoni bole hidop ulang kong dapa hidop baru sama-sama deng Yesus Kristus. Itu samua ngoni bole dapa lantaran ngoni percaya tu Tuhan Allah pe kuasa yang luar biasa tu da se hidop ulang pa Yesus Kristus.

13  Dulu waktu ngoni blum percaya, ngoni sama deng so mati lantaran ngoni ja langgar tu Tuhan Allah pe prenta, ngoni lei nyanda da sunat iko tu atoran di kitab Taurat, jadi ngoni ini bukang Tuhan Allah pe pilihan. Mar Dia se ampung samua tu ngoni pe dosa-dosa, Dia kase hidop baru pa ngoni sama-sama deng Yesus Kristus. 14  Ngoni pe dosa-dosa so sama deng so tatulis di surat utang. Kalu mo iko tu de pe atoran di kitab Taurat, ngoni mo dapa hukuman lantaran malawang Tuhan Allah pe prenta. Mar tu ngoni pe surat utang itu so se paku di kayu salib, itu de pe arti tu ngoni pe dosa so dapa hapus. 15 Kong di kayu salib itu Tuhan Allah so se kala samua tu kuasa glap tu da berkuasa, deng bagitu Dia beking dorang jadi malo di muka umum.

16  Sudara-sudara, ada orang yang suka mo se sala pa ngoni lantaran nyanda iko tu atoran-atoran tentang makang deng minum, deng suka mo se sala pa ngoni lantaran nyanda iko tu prayaan hari-hari raya Yahudi, rupa tu hari raya bulan baru ato ngoni nyanda iko tu atoran-atoran for tu hari Sabat. Mar ngoni nyanda usa tarukira apa tu dorang ja bilang. 17 Tu atoran-atoran itu nyanda penting, itu cuma sama deng bayang-bayang dari yang lebe penting yang mo datang itu, mar tu de pe butul itu ada pa Yesus Kristus, Dia itu yang penting. 18 Ngoni jang dengar tu orang-orang yang ja bilang Tuhan Allah mo hukum pa ngoni lantaran nyanda iko tu dorang pe ajaran. Dorang mo suru ngoni hidop sama deng dorang yang pura-pura hidop renda hati, dorang mo suru lei ngoni basemba pa malaekat-malaekat. Dorang suka bicara ja se bangga tentang dong pe penglihatan-penglihatan. Dorang ja se sombong tu dorang pe diri iko tu dorang pe pikiran yang nyanda ada guna lantaran itu cuma manusia pe pikiran. 19  Dorang lei so nyanda ja iko tu Yesus Kristus pe ajaran, padahal Yesus Kristus itu Kapala, deng De pe orang-orang sama deng Dia pe anggota badan. Tuhan Allah tu ja baator tu orang-orang percaya itu supaya dorang bole jadi satu sama deng anggota-anggota badan yang nimbole tapisa satu deng yang laeng, kong deng bagitu tu dorang pe percaya bole tatamba kuat.

20 Sudara-sudara, ngoni yang so percaya pa Yesus Kristus, ngoni pe hidop lama sama deng so mati sama-sama deng Kristus, jadi ngoni so nyanda lei taika deng tu atoran-atoran yang cuma bicara tentang hal-hal duniawi. So itu, ngoni nyanda usa lei iko tu atoran-atoran yang rupa ini: 21 “Jang pegang ini”, “Jang makang itu”, “Jang sontong ini”. 22 Samua tu dorang pe ajaran itu cuma tentang makang deng minum, tu barang yang satu kali pake kong abis, trus nyanda ada guna lei. Tu atoran-atoran deng tu ajaran itu cuma ja iko tu manusia pe pikiran sandiri. 23 Memang katu waktu dorang se tunjung tu atoran-atoran agama yang dorang da beking itu, dorang dapa lia orang-orang yang bijaksana. Dorang pura-pura hidop renda hati, dorang se ajar pa dorang pe orang-orang for beking siksa tu dorang pe diri iko tu dorang pe atoran-atoran supaya orang laeng puji pa dorang. Mar samua tu atoran-atoran itu nyanda ada de pe guna lantaran itu nyanda beking dorang mo bruba, dorang cuma iko dorang pe keinginan-keinginan duniawi.