1 Tesalonika
Paulus pe surat yang pertama for jemaat di Tesalonika
Kata pengantar
Ni kitab 1 Tesalonika ini Paulus yang da tulis. Kitab ini de pe model surat, kong Paulus kirim ni surat pa jemaat di Tesalonika. Tu Tesalonika itu dulu kota plabuhan yang paling top di daera Makedonia. Tesalonika lei satu kota penting for tampa bajual deng babli deng lei pusat militer kong pemerenta Romawi yang da kuasai tu kota itu. Tu penduduk dari tu kota itu ada orang dari bangsa Yahudi, mar yang paling banya orang dari bukang bangsa Yahudi tu ja basemba opo-opo. Paulus, Timotius deng Silas datang ka kota Tesalonika kong se tau tu Kabar Bae tentang Yesus pa orang-orang di situ, trus ada dari pa dorang yang percaya pa Yesus (Kis. 17:1-4). Mar nyanda brapa lama, Paulus deng dia pe tamang-tamang musti lari dari Tesalonika pigi ka Berea lantaran tu orang-orang Yahudi yang nyanda percaya mangiri pa Paulus deng Silas kong mo siksa pa dorang (Kis. 17:5-10). Mar biar lei bagitu, Paulus lei suka skali supaya sudara-sudara yang percaya di Tesalonika bole lebe mangarti tu dorang pe iman, so itu dia suru pa Timotius pigi for kase kuat dorang pe hati deng kase nasehat pa dorang supaya dorang pe percaya lebe tatamba kuat. (1Tes. 3:1-2). Kong waktu tu Timotius pulang dari Tesalonika, baru no kong Paulus tulis ni surat.
Paulus pe tujuan da tulis ni surat for se inga pa jemaat di Tesalonika bagimana tu dorang pe kalakuan dulu waktu Paulus masi sama-sama deng dorang (1Tes. 2:1-2). Dia lei se tenang deng se smangat pa dorang yang dapa siksa supaya tetap percaya pa Tuhan (1Tes. 3:3-5), kong lei supaya dorang hidop deng kalakuan yang pantas for orang yang percaya pa Tuhan (1Tes. 4:1-10). Dia lei se tau pa dorang tentang apa yang mo jadi pa orang Kristen yang so mati deng pa tu orang Kristen yang masi hidop di hari waktu Yesus datang ulang (1Tes. 5:13-17). Dia lei se nasehat pa dorang supaya dorang jang malas bakarja waktu dorang samantara batunggu Yesus mo datang kadua kali.