Filipi 4

1 Jadi sudara-sudara yang kita sayang deng yang kita rindu, kita minta supaya ngoni tetap jo percaya pa Tuhan. Ngoni yang beking kita pe hati jadi snang. Ngoni itu kita pe kebanggaan, itu sama deng ngoni itu kita pe mahkota. Kong kita memang sayang pa ngoni.

Paulus se kuat tu hati dari orang percaya di Filipi

2 Kita mohon pa Euodia deng Sintikhe supaya ngoni dua bole baku bae ulang, sama rupa tu orang-orang yang so percaya pa Tuhan musti beking. 3 Kita minta pa ngana Sunsugos tu kita pe tamang karja yang setia, ngana bantu akang pa tu dua parampuang itu supaya dorang dua itu baku bae ulang. Dorang dua itu so karja kras sama-sama deng kita, torang ja kase tau pa orang-orang tu Kabar Bae tentang Yesus. Bagitu lei deng Klemens deng lei tu torang pe tamang-tamang laeng yang so karja sama-sama deng kita se tau tu Kabar Bae. Dorang samua pe nama so tatulis di buku kehidupan, tu buku yang da tulis akang tu nama-nama dari orang yang trima tu hidop kekal.

4 Sudara-sudara, ngoni yang percaya pa Tuhan, ngoni musti slalu snang. 5 Kong biar jo samua orang bole mo lia ngoni pe kalakuan yang bae-bae. So nyanda lama lei Tuhan so mo datang ulang. 6 Ngoni jang kuatir tentang apa-apa, mar basombayang jo minta pa Tuhan Allah tentang samua hal. Ngoni se tau jo samua tu ngoni pe perlu pa Dia, deng bilang jo makase pa Dia. 7 Deng ngoni beking bagitu, Tuhan Allah mo beking ngoni hidop deng hati tenang, kong manusia nyanda mampu mo mangarti bagimana sampe tu ngoni pe hati bole rasa tenang bagitu. Tu rasa tenang yang dari pa Tuhan Allah itu mo jaga tu ngoni pe hati deng pikiran supaya nyanda kuatir lantaran ngoni so percaya pa Kristus Yesus.

8 Jadi sudara-sudara, de pe laste kita minta pa ngoni supaya ngoni pikir jo slalu tentang samua hal ini: samua yang butul, samua kalakuan yang pantas dapa hormat, samua yang adil, samua yang suci, samua yang bae, samua yang bagus tu orang suka mo dengar, samua kalakuan yang pe bagus skali, deng lei samua yang pantas for dapa puji, ngoni pikir-pikir jo tentang tu samua hal itu. 9 Samua yang ngoni so blajar dari pa kita, yang ngoni so dengar deng trima dari pa kita, deng lei yang ngoni so lia dari pa kita, ngoni beking jo tu samua itu. Kalu ngoni beking bagitu, Tuhan Allah yang ja beking orang pe hati tenang, Dia mo sama-sama deng ngoni.

10 Kita so hidop satu deng Tuhan kong kita pe hati snang skali lantaran skarang ngoni da tarukira akang ulang for bantu tu kita pe perlu. Memang katu dulu ngoni nyanda perna lupa for bantu pa kita, mar lantaran torang so lama da tapisa, ngoni nyanda ada kesempatan for mo kirim tu ngoni pe bantuan pa kita, mar skarang ngoni so bantu ulang pa kita. 11 Kita da bilang bagitu bukang lantaran kita ada kekurangan kong minta ngoni bantu lei pa kita, bukang bagitu. Soalnya kwa kita so blajar beking cukup tu kita pe diri sandiri di samua keadaan. 12 Kita tau bagimana hidop deng kekurangan, deng kita lei tau bagimana hidop deng talebe-lebe. Kita so blajar bagimana tu de pe rahasia for hidop beking cukup tu diri sandiri di samua keadaan, biar itu waktu kanyang ato lapar, biar itu waktu kita kekurangan ato di waktu kita talebe-lebe. 13 Kita bole mangada samua tu keadaan lantaran Kristus yang kase kita kekuatan for mangada itu. 14 Mar biar lei bagitu ngoni pe bae-bae pa kita, ngoni da bantu pa kita waktu kita da mangada tu keadaan susa.

15  Hei ngoni tu kita pe sudara-sudara di Filipi, ngoni sandiri tau butul bagimana kita dulu waktu kita mulai se tau tu Kabar Bae pa ngoni, sampe kita se tinggal tu daera Makedonia. Waktu itu, nyanda ada jemaat laeng yang bantu kase akang doi sumbangan for se cukup tu kita pe perlu sampe kita bole se tau tu Kabar Bae itu pa orang laeng, cuma ngoni yang da bantu pa kita. 16 Kong bukang cuma itu lei, waktu kita ada di Tesalonika, ngoni bebrapa kali da kirim akang doi sumbangan for bantu tu kita pe perlu di sana. 17 Kita bilang bagitu, itu bukang lantaran kita suka cari ngoni pe sumbangan, mar kita suka ngoni trima tu berkat dari pa Tuhan lantaran ngoni so bantu pa kita. 18  Kita skarang so trima samua tu kita pe perlu dari pa ngoni, malatare lebe dari cukup. Samua tu bantuan yang ngoni da kirim pa kita, kita so trima itu dari pa Epafroditus kong skarang yang ada pa kita sampe talebe-lebe lei. Tu ngoni pe bantuan itu kita so trima. Tu ngoni pe bantuan itu sama deng korban persembahan yang bobou sadap, tu Tuhan Allah suka deng yang beking Dia snang. 19 Tuhan Allah yang kita semba mo kase samua tu ngoni perlu dari tu Dia pe kekayaan yang pe luar biasa. Dia kase tu ngoni pe perlu itu lantaran ngoni so percaya pa Kristus Yesus.

20 Mari jo torang puji deng hormat pa Tuhan Allah tu torang pe Bapa sampe slama-lamanya! Amin.

Paulus pe akhir surat

21 Kita minta pa ngoni supaya ngoni bilang akang tu kita pe salam pa samua Tuhan pe orang-orang yang ada di situ, tu orang-orang yang so percaya pa Kristus Yesus. Kong ngoni lei dapa salam dari tu sudara-sudara yang percaya tu ada sama-sama deng kita di sini. 22 Salam for ngoni dari samua tu Tuhan pe orang-orang yang ada di sini, lebe kusus dari tu Tuhan pe orang-orang yang karja di istana dari raja yang paling tinggi di krajaan Romawi.

23 Kita minta supaya Tuhan Yesus Kristus kase tunjung tu Dia pe bae pa ngoni samua.