Torang jadi butul di muka pa Tuhan Allah lantaran percaya pa Yesus Kristus
3
1 Kita pe sudara-sudara, snang jo ngoni lantaran ngoni so percaya pa Tuhan. For kita, nyanda jadi masala kalu kita mo tulis ulang tu hal ini pa ngoni, lantaran kita mo jaga pa ngoni supaya nyanda ada orang yang mo beking sesat pa ngoni.2 Ngoni musti hati-hati deng tu orang-orang yang da se putar bale tu ajaran yang butul, dorang pe jaha bole mo se sama deng anjing-anjing. Hati-hati jo deng dorang, dorang itu suka ja bapaksa pa orang-orang for mo sunat. Dorang beking bagitu bole mo se sama deng tu orang yang suka potong beking rusak orang pe badan. 3 Soalnya torang samua ini tu orang-orang yang butul-butul iko pa Tuhan, torang semba pa Tuhan Allah lantaran Tuhan Allah pe Roh yang ada pa torang pe hati bantu pa torang. Torang lei puji pa Kristus Yesus deng torang nyanda bagantong deng tu atoran-atoran. Jadi torang nyanda sama deng dorang yang bapikir kalu dorang bole jadi orang-orang yang iko pa Tuhan lantaran dorang bagantong deng tu atoran-atoran rupa tu atoran sunat. 4 Kita nyanda bagantong deng tu atoran-atoran di Kitab Taurat supaya kita bole jadi orang yang iko pa Tuhan Allah, padahal kalu kita mo babangga, kita sebenarnya ada dasar for mo rasa bangga tentang sgala hal dari tu atoran di kitab Taurat yang dulu kita perna da beking. Kalu ada orang yang bapikir dia bole babangga tentang tu atoran-atoran di kitab Taurat yang dia so perna beking, sebenarnya kita lebe dari dia lei. 5 Bagini, waktu kita masi umur dlapan hari, kita so dapa sunat iko tu atoran di kitab Taurat. Kita ini orang Israel tu ja bilang lei orang Ibrani, kita orang Ibrani asli tu dari suku Benyamin. Kita ini lei dari golongan Farisi, tu golongan yang kras ja iko tu atoran-atoran agama Yahudi. 6 Kong kita taat ja beking tu atoran-atoran di kitab Taurat, sampe kita ja siksa tu orang-orang yang percaya pa Yesus lantaran kita pikir kalu dorang itu nyanda butul da iko tu atoran-atoran di kitab Taurat itu. Kita memang ja beking deng butul tu atoran-atoran di kitab Taurat, so itu nyanda ada yang bole mo se sala pa kita tentang hal itu.
7 Tu kita pe hidop yang dulu itu, kita anggap bawa untung for kita. Mar serta skarang, kita pe hidop yang dulu itu kita anggap nyanda bawa untung apa-apa, lantaran kita skarang so iko pa Kristus. 8 Mar bukang cuma itu lei, malatare samua hal kita anggap nyanda ada arti apa-apa lantaran kita skarang so bole kanal pa Kristus Yesus tu kita pe Tuhan, kong itu yang jao lebe berharga. So lantaran Dia, kita se lapas tu samua yang dulu itu, kita anggap tu samua itu sama deng sampa, supaya kita bole kanal pa Kristus, 9 deng kita bole hidop satu deng Kristus. Kita bole jadi butul di muka pa Tuhan Allah, itu bukang lantaran kita da brusaha iko tu atoran-atoran di kitab Taurat, mar itu cuma lantaran kita percaya pa Kristus. Jadi Tuhan Allah beking kita jadi orang yang butul di muka pa Dia, itu bukang lantaran apa tu kita da beking dulu, mar itu cuma lantaran kita percaya pa Kristus. 10 Tu kita pe mau, kita cuma mo kanal pa Kristus deng lei mo rasa tu kuasa yang kase hidop ulang pa Dia dari kematian. Kita so siap mendrita sama deng tu pendritaan yang Dia da rasa dulu, kong siap lei mati sama deng Dia da mati dulu. 11 Kong de pe alasan kiapa kita suka bagitu supaya kalu kita mati Dia mo kase hidop ulang pa kita.
Brusaha jo trus for iko tu conto dari Yesus Kristus
12 Kita nyanda bilang kalu kita so mampu hidop sama deng Kristus ato kalu kita ini so jadi sempurna, nyanda kasiang. Mar kita tetap brusaha supaya kita bole hidop sama deng itu, lantaran Kristus Yesus tu da pili pa kita for jadi Dia punya. 13 Sudara-sudara, kita nyanda anggap kalu kita pe cara hidop so sama deng Kristus pe cara hidop, mar ini tu kita ja beking: kita so nyanda ja inga-inga apa yang so perna kita da beking, mar kita brusaha kras maju trus sama deng tu orang da iko lomba lari yang brusaha kras supaya sampe di finis. 14 Kita brusaha trus supaya kita bole sampe pa kita pe tujuan for hidop sama deng Kristus Yesus da hidop, itu bole mo se sama deng tu orang yang iko lomba lari da brusaha balari trus sampe di garis finis supaya bole mo dapa tu piala. Tu piala yang kita mo dapa, itu no tu hidop kekal, kong Tuhan Allah pangge pa kita for dapa tu hidop kekal itu lantaran kita so percaya pa Kristus Yesus.
15 So itu torang samua yang so butul-butul percaya, torang itu musti satu hati for mo hidop rupa tu kita baru da kase tau di surat ini. Kalu ada di antara pa torang yang baku beda pendapat deng apa tu kita da kase, nanti Tuhan Allah kase tunjung kalu apa tu kita da bilang itu butul. 16 Yang penting torang tetap hidop iko tu Tuhan Allah so kase tunjung pa torang.
17 Sudara-sudara, kita minta pa ngoni supaya ngoni iko jo tu kita pe cara hidop, kong tarukira lei tu orang-orang yang dong pe cara hidop sama deng torang pe cara hidop tu jadi conto for ngoni iko akang. 18 Soalnya kwa banya orang yang hidop ja malawang tu ajaran tentang Kristus, dorang nyanda trima tu ajaran yang bilang kalu Kristus mati di kayu salib for se ampung tu manusia pe dosa-dosa. Kita so banya kali se tau pa ngoni tentang itu, trus skarang deng manangis kita se tau ulang lei pa ngoni. 19 Tu orang-orang yang ja malawang itu nanti mo binasa. Tu orang-orang itu cuma suka beking puas tu dorang pe diri sandiri, sampe itu jadi yang paling penting pa dorang pe hidop. Dorang beking tu hal-hal yang sebenarnya beking dorang jadi malo skali mar dorang suka orang puji-puji tu dorang da beking itu, kong dorang pe pikiran cuma da pikir-pikir tu hal-hal duniawi. 20 Mar torang ini so jadi warga krajaan sorga, kong torang lei da tunggu-tunggu tu Tuhan Yesus Kristus tu Juruslamat mo datang dari sana. 21 Torang pe badan yang skarang ini, badan yang mo binasa. Kong nanti Yesus mo roba torang pe badan ini mo jadi luar biasa sama deng tu Dia pe badan yang luar biasa. Dia nanti beking bagitu pake Dia pe kuasa, tu kuasa yang beking samua iko Dia pe prenta.