Nasehat for anak-anak deng orang tua
6
1 Ngoni tu anak-anak yang so percaya pa Tuhan, ngoni musti dengar-dengaran pa ngoni pe orang tua lantaran itu yang butul yang ngoni musti beking. 2 Di Kitab Suci ada tu atoran bagini, “Ngoni musti hormat tu ngoni pe papa deng tu ngoni pe mama.” Kong dari antara tu atoran-atoran, tu atoran ini yang pertama Tuhan Allah da pake akang janji for sapa jo yang iko akang. 3 Tu Tuhan pe janji itu bagini, “Ngoni mo hidop snang deng mo dapa umur panjang di dunia ini.”4 Ngoni tu papa-papa, ngoni jang kasar pa ngoni pe anak-anak sampe beking dorang jadi mara, mar ngoni didik jo deng latih pa dorang iko tu Tuhan pe ajaran.
Nasehat for tu budak-budak deng tu tuang-tuang
5 Ngoni tu budak-budak, dengar-dengaran jo pa ngoni pe tuang yang ada di dunia ini. Ngoni tako jo deng hormat pa dorang deng hati yang sunggu-sunggu, sama deng ngoni dengar-dengaran pa Kristus sandiri. 6 Ngoni dengar-dengaran pa ngoni pe tuang jang cuma waktu dorang lia-lia pa ngoni supaya mo beking dong pe hati snang. Mar ngoni musti dengar-dengaran pa dorang lantaran ngoni itu orang-orang yang ja beking tu Kristus da suru, deng ngoni memang ja beking tu Tuhan Allah pe mau deng sunggu-sunggu. 7 Ngoni beking jo tu ngoni pe karja deng snang hati, sama deng ngoni ja bakarja for Tuhan bukang for manusia. 8 Ngoni karja jo rupa itu lantaran torang samua so tau kalu sapa jo ja beking tu bae, biar dia itu budak ato bukang budak, pasti Tuhan mo balas tu bae yang dia da beking itu.
9 Deng ngoni tu tuang-tuang, ngoni musti beking lei bae-bae pa ngoni pe budak-budak. Jang ngoni baancam pa dorang. Ngoni tu tuang-tuang inga jo bae-bae: ngoni itu pe Tuang, deng lei tu budak-budak pe Tuang itu satu, Dia itu no tu Tuhan yang ada di sorga, kong Dia nyanda pili-pili orang.
Orang percaya musti siap malawang kuasa glap sama deng tentara siap malawang musu
10 Di akhir ni surat, kita bilang bagini: ngoni so percaya pa Tuhan, jadi se kuat jo tu ngoni pe hati, se biar jo Tuhan pe kuasa yang kuasai pa ngoni. 11 Tentara ja pake baju prang deng senjata lengkap supaya bole mo batahang malawang de pe musu, bagitu lei deng torang, torang musti pake tu perlengkapan prang dari Tuhan Allah supaya bole mo batahang malawang tu cobaan-cobaan dari setang pe bos. 12 Soalnya torang nyanda baprang malawang pa manusia, mar torang baprang malawang tu setang pe bos deng dia pe anak-anak bua yang torang nyanda dapa lia. Torang baprang malawang samua yang berkuasa di dunia yang glap ini, deng torang lei malawang samua yang jaha yang berkuasa di langit. 13 So itu pake jo samua tu perlengkapan prang yang dari Tuhan Allah supaya ngoni bole batahang malawang tu srangan-srangan di waktu yang jaha. Kong kalu ngoni so klar malawang tu srangan-srangan itu, ngoni pe percaya tetap mo kuat.
14 Jadi ngoni se siap jo tu ngoni pe diri for malawang tu srangan-srangan itu deng cara ini: ngoni tetap hidop jo slalu ja iko tu ajaran yang butul, kalu ngoni hidop bagitu, ngoni itu bole mo se sama deng tu tentara yang da pake ban supaya dia so siap malawang tu musu. Ngoni musti hidop slalu ja beking tu butul kong nyanda ja beking tu jaha, itu bole mo se sama deng tu tentara yang da pake baju besi for jaga de pe diri dari tu srangan-srangan musu. 15 Ngoni lei musti slalu siap for pi kase tau tu Kabar Bae tentang Yesus supaya orang bole baku bae deng Tuhan, kong kalu ngoni slalu siap bagitu, ngoni itu bole mo se sama deng tentara yang slalu ja pake de pe capatu for siap malawang de pe musu. 16 Kong di tiap waktu ngoni musti tetap percaya jo pa Tuhan, kong kalu ngoni percaya bagitu, ngoni itu bole mo se sama deng tu tentara yang slalu pegang de pe perisai for pele de pe diri dari musu pe pana. Soalnya ngoni pe percaya itu bole mo kase mati tu pana api dari setang pe bos yang da se ser pa ngoni. 17 Tuhan Allah so se slamat pa ngoni dari tu hukuman dosa, kong tu keslamatan yang Dia da kase pa ngoni itu bole mo se sama deng tu topi baja yang tentara da pake for lindungi tu kapala. Kong ngoni slalu siap jo for pake tu Tuhan Allah pe firman yang Dia pe Roh da kase pa ngoni, deng ngoni slalu siap bagitu, ngoni bole mo se sama deng tentara yang da pegang pedang for siap malawang de pe musu. 18 Ngoni basombayang jo siang deng malam, kong ngoni minta pa Tuhan Allah dalam samua hal, kong se biar jo tu Roh Kudus yang tolong pa ngoni waktu ngoni basombayang. Ngoni basombayang deng smangat kong jang brenti basombayang akang for samua tu Tuhan Allah pe orang-orang.
19 Ngoni basombayang akang lei for kita. Minta jo pa Tuhan supaya waktu kita mo babicara pa orang-orang, Dia kase akang pa kita kata-kata apa yang kita musti bilang, kong deng brani kita bole kase tau tu Kabar Bae tentang Yesus yang dulu manusia blum tau. 20 Kita da jadi utusan for ja kase tau tu Kabar Bae tentang Yesus, kong kita da dapa se maso ka dalam bui lantaran da kase tau tu Kabar Bae itu. Ngoni basombayang akang jo for kita supaya kita deng brani kase tau tu Kabar Bae itu, sama deng yang mustinya kita kase tau pa orang-orang.
Paulus pe akhir surat
21 Sudara-sudara, kita mau ngoni tau tu kita pe keadaan deng tu kita da beking di sini, so itu kita da suru pa Tikhikus pigi pa ngoni supaya dia bole pi kase tau tentang itu pa ngoni. Dia itu torang pe sudara yang percaya yang torang sayang, deng dia lei rajin ja beking tu karja yang Tuhan da kase pa dia. 22 Kita suru pa dia for pigi pa ngoni supaya dia bole kase tau pa ngoni tentang tu torang pe keadaan di sini, deng supaya dia lei bole se kuat tu ngoni pe hati.
23 Kita minta pa Tuhan Allah tu torang pe Bapa, deng pa Tuhan Yesus Kristus, supaya ngoni tu sudara-sudara bole hidop baku-baku bae, supaya ngoni bole hidop baku sayang, deng supaya ngoni lei bole tetap percaya pa Yesus Kristus. 24 Kita minta pa Tuhan supaya kase tunjung De pe bae pa samua orang yang dorang pe sayang pa Yesus Kristus tu torang pe Tuhan itu nyanda mo abis-abis.