Hidop iko Tuhan Allah pe mau
5
1 Jadi sudara-sudara, ngoni ini Tuhan Allah pe anak-anak yang Dia sayang, ngoni musti iko tu Dia pe sifat. 2 Ngoni musti hidop baku-baku sayang, sama deng Kristus sayang pa torang sampe Dia srahkan Dia pe diri mati for torang. Waktu Kristus srahkan Dia pe diri, itu sama deng korban persembahan yang bobou sadap tu beking Tuhan Allah pe hati snang.3 Ngoni itu Tuhan pe orang-orang, kong ngoni musti hidop iko tu kalakuan yang pantas for Tuhan pe orang-orang. Ngoni jang baseks bebas, jang beking tu kalakuan-kalakuan yang caparuni deng ngoni jang sraka, kong biar cuma mo cirita tu kalakuan-kalakuan itu jangan. 4 Ngoni jang ja bilang tu kata-kata kotor, ngoni jang ja bilang tu hal-hal yang nyanda ada de pe guna, deng lei jang ja bakusedu tu caparuni. Soalnya tu kata-kata yang rupa itu nyanda pantas for ngoni yang percaya pa Kristus mo bilang, mar lebe bae ngoni basombayang kong bilang makase pa Tuhan. 5 Soalnya ngoni musti inga bae-bae, tu orang-orang yang ja baseks bebas, yang beking tu kalakuan-kalakuan yang caparuni nyanda ada yang mo jadi orang-orang dari Tuhan Allah deng Yesus Kristus yang berkuasa sbagai Raja. Bagitu lei deng tu orang-orang yang suka samua jadi dorang punya, nyanda ada yang dari pa dorang tu mo jadi orang-orang dari Tuhan Allah deng Yesus Kristus, dorang itu kurang sama deng orang-orang yang so beking samua itu jadi lebe penting dari Tuhan. 6 Jang ngoni percaya pa orang-orang yang bilang tu kalakuan-kalakuan rupa itu bukang dosa. Tu dorang da bilang itu nyanda butul. Dorang cuma mo tipu pa ngoni supaya ngoni beking tu kalakuan yang besae itu. Soalnya Tuhan Allah pasti mo hukum pa orang-orang yang beking dosa rupa itu, dorang yang nyanda dengar-dengaran pa Dia. 7 So itu ngoni jang ja iko tu orang-orang yang beking dosa rupa itu.
8 Dulu, ngoni nintau tu ajaran yang butul yang dari pa Tuhan, ngoni sama deng da hidop di dalam glap. Mar skarang ngoni so tau itu kong so percaya pa Tuhan, ngoni itu bole mo sama deng da hidop di dalam trang. Jadi ngoni sbagai anak-anak trang, ngoni hidop jo bae-bae sama deng Tuhan Allah pe anak-anak musti ja beking. 9 Soalnya kalu ngoni hidop trus dalam trang, ngoni mo beking tu hal-hal yang bae, yang butul deng ngoni lei ja bicara yang jujur. 10 Deng ngoni lei musti brusaha cari tau apa yang beking Tuhan pe hati snang. 11 Jang iko tu kalakuan dari tu orang yang hidop dalam glap, tu dorang ja beking itu nyanda ada de pe guna, mar lebe bae ngoni bilang kalu tu kalakuan itu sala. 12 Soalnya apa yang dorang beking deng sambunyi-sambunyi itu beking malo skali, biar torang cuma bicara tentang itu torang so rasa malo. 13 Mar kalu orang-orang beking sala, trus dorang dengar tu Tuhan pe firman, itu sama deng da pasang lampu supaya dorang bole balia di glap. 14 Soalnya tu trang yang beking orang-orang bole balia dalam glap. So itu, ada tu da tulis bagini,
“Hei ngoni yang masi tidor, bangong jo, ngoni ini sama deng so mati mar ngoni musti hidop ulang.
Kristus mo beking ngoni tau tentang tu ajaran yang butul, itu sama deng ada cahaya yang kase trang pa ngoni.”
15 Jadi tarukira jo bae-bae tu ngoni pe cara hidop. Ngoni jang hidop sama deng orang-orang yang nintau apa-apa, mar hidop jo sama deng orang yang tau mana tu butul deng nyanda butul. 16 Ngoni pake bae-bae jo tiap kesempatan yang ada for beking tu bae, lantaran skarang ini so banya orang yang ja beking dosa trus-trus. 17 Jadi ngoni jang sama deng orang yang nintau apa-apa, mar ngoni musti mangarti bae-bae tu Tuhan Allah pe mau. 18 Ngoni jang bamabo, itu beking ngoni nyanda mampu kuasai tu ngoni pe diri, mar lebe bae ngoni kase tu ngoni pe diri for Roh Kudus mo kuasai. 19 Kong baku kase kuat tu ngoni pe hati satu deng laeng pake tu puji-pujian yang ada di Mazmur, lagu-lagu rohani deng lagu-lagu laeng yang Roh Kudus da kase pa ngoni. Ngoni manyanyi kong puji jo pa Tuhan deng segnap hati. 20 Kong dalam samua hal, ngoni slalu bilang jo makase pa Tuhan Allah tu torang samua pe Bapa lantaran apa yang Yesus Kristus tu torang pe Tuhan so beking.
Nasehat for laki-bini
21 Ngoni musti hidop baku-baku dengar satu deng laeng, kalu ngoni beking bagitu ngoni se tunjung ngoni pe hormat pa Kristus.
22 Ngoni tu bini-bini, ngoni musti dengar-dengaran pa ngoni pe laki, sama deng ngoni dengar-dengaran pa Tuhan. 23 Soalnya tu laki itu tu bini pe pemimpin, itu sama deng tu laki itu tu bini pe kapala. Itu sama deng Kristus, Dia itu kapala dari tu jemaat, kong tu jemaat itu bole mo se sama deng Dia pe badan. Dia yang da se slamat tu Dia pe jemaat dari hukuman dosa. 24 Jadi sama deng tu jemaat dengar-dengaran pa Kristus, bagitu lei deng tu bini-bini musti dengar-dengaran pa dong pe laki dalam samua hal.
25 Ngoni tu laki, ngoni musti sayang pa ngoni pe bini sama deng Kristus sayang pa Dia pe jemaat, sampe Dia srahkan Dia pe diri mati for torang. 26 Kristus beking bagitu supaya Dia beking kudus pa torang tu Dia pe jemaat, Dia beking bersi pa torang dari dosa lantaran torang da iko tu Dia pe firman deng lei torang so dapa baptis. 27 Deng beking bagitu, torang tu Dia pe jemaat bole jadi orang yang hati bersi, deng nyanda ada yang mo se sala pa torang, torang so nyanda mo ada dosa lei, jadi torang bole mo badiri di muka pa Dia. 28 Bagitu lei ngoni tu laki, ngoni lei musti sayang tu ngoni pe bini sama deng Kristus da sayang pa Dia pe orang-orang. Ngoni sayang jo tu ngoni pe bini sama deng ngoni sayang tu ngoni pe badan sandiri. Sapa jo yang sayang pa de pe bini, itu sama jo deng dia sayang tu dia pe diri sandiri. 29 Soalnya nyanda ada orang to yang mo beking besae tu de pe diri sandiri, pasti dia mo jaga deng sayang tu dia pe diri sandiri, sama deng Kristus da jaga deng sayang tu De pe jemaat. 30 Dia jaga deng sayang pa torang lantaran torang ini sama deng Dia pe badan. 31 Di Kitab Suci da tulis bagini, “So itu tu laki-laki mo se tinggal tu de pe papa deng mama, kong dia hidop satu deng de pe bini, kong dorang dua itu jadi satu.” 32 Kita da tulis tentang tu hubungan laki bini, kong de pe arti dalam skali deng orang laeng lei blum tau tentang itu. Kita tulis tentang tu hubungan itu, kita pe maksut mo kase gambaran for tu hubungan antara Kristus deng Dia pe jemaat. 33 Mar biar lei bagitu, tu laki musti tetap sayang pa de pe bini sama deng dia sayang tu de pe diri sandiri, kong tu bini musti hormat pa de pe laki.