Orang-orang percaya jadi satu biar masing-masing ada playanan
4
1 Sudara-sudara, kita ini orang yang da dapa se maso ka bui lantaran ja beking tu Tuhan da suru. Kong so lantaran Tuhan so se tunjung Dia pe bae pa ngoni, so itu kita se smangat pa ngoni tu orang-orang yang Tuhan so pangge for iko pa Dia, supaya ngoni hidop butul sama deng tu orang-orang yang so iko pa Dia musti hidop. 2 Ngoni pe cara hidop musti bagini: nyanda sombong, nyanda kasar pa orang laeng deng pangsabar. Kong kalu ada orang beking sala pa ngoni, ngoni sabar jo deng dia lantaran ngoni baku sayang. 3 Tuhan pe Roh so beking ngoni jadi satu, so itu brusaha jo tetap hidop jadi satu deng cara hidop baku-baku bae. 4 Torang yang percaya pa Yesus so jadi satu sama deng torang ini so jadi satu badan, deng tu Roh Kudus yang ada pa torang itu lei cuma satu. Bagitu lei Tuhan Allah so pangge pa torang for satu harapan, torang baharap deng yakin pa Dia yang da pangge pa torang for iko pa Dia. 5 Cuma ada satu Tuhan, torang pe percaya cuma satu, deng cuma ada satu baptisan. 6 Trus cuma ada satu Tuhan Allah tu Bapa dari torang samua. Dia yang berkuasa pa torang samua, Dia yang bakarja pa torang samua, deng Dia hidop pa torang samua pe hati.7 Mar pa torang masing-masing, Kristus so kase akang karunia yang baku-baku beda, kong tu torang pe karunia-karunia itu iko apa yang Dia suka kase pa torang. 8 So lantaran itu, di Kitab Suci da tulis bagini,
“Waktu Dia nae ka tampa yang tinggi,
Dia bawa lei tu Dia pe musu-musu yang Dia so se kala itu,
kong pa Dia pe orang-orang Dia kase akang berkat.”
9 Jadi kalu bilang, “Dia nae ka tampa yang tinggi,” itu de pe arti Dia lei so perna turung ka tampa yang paling bawa di bumi. 10 Dia yang so perna turung itu no Kristus, Dia lei yang so nae ka tampa yang paling tinggi di sorga, supaya Dia bole pegang prenta pa samua yang ada. 11 Kristus da kase karunia pa Dia pe orang-orang, ada yang Dia kase karunia for jadi rasul tu Dia pe utusan, ada lei yang Dia kase karunia for jadi nabi tu orang yang ja kase tau Tuhan pe pesan, ada yang Dia kase karunia for jadi penginjil tu orang yang ja kase tau tu Kabar Bae pa orang yang blum dengar itu, ada yang Dia kase karunia for jadi pemimpin di jemaat sama deng gembala urus bae-bae tu de pe domba, deng ada lei yang Dia kase karunia for mangajar pa jemaat. 12 Kristus kase Dia pe karunia pa tu orang-orang itu for tolong tu Tuhan pe orang-orang yang sama deng Yesus Kristus pe badan supaya dorang mampu beking tu dong pe playanan masing-masing, deng lei bole baku kase kuat tu dorang pe percaya, 13 sampe torang samua tu Dia pe orang-orang jadi satu hati lantaran torang sama-sama percaya, kong torang bole kanal pa tu Anak Allah, torang lei bole mo butul-butul percaya, deng torang pe sifat lebe hari bruba jadi lebe bae sampe sama deng Yesus Kristus pe sifat.
14 Kalu torang so rupa itu, torang pe pikiran nyanda mo sama deng anak kacili yang gampang kana tipu. Jadi kalu ada orang datang kase ajar de pe ajaran yang sesat for mo tipu pa torang supaya iko pa dia, torang nyanda mo taiko. Torang nyanda mo gampang taiko-iko sama deng omba yang takasana-kamari da iko angin batiop. 15 Mar torang ja bilang yang butul pa orang laeng lantaran torang sayang pa dorang, kong di samua hal torang pe sifat lebe lama lebe tatamba sama deng Kristus pe sifat. Dia tu pemimpin for samua orang percaya, sama deng Dia tu torang pe kapala. 16 Kong torang yang percaya so jadi satu, torang ini so jadi sama deng Dia pe badan. Dia pe kuasa ada pa torang samua kong beking torang itu jadi satu. Kalu torang masing-masing beking tu tugas yang Dia kase pa torang, itu mo beking torang baku kase kuat satu deng yang laeng kong lebe hari torang lebe baku sayang.
Orang yang percaya musti se tinggal tu cara hidop dulu kong beking tu butul
17 Deng kuasa Tuhan, kita mo bilang deng kita mo se tegas pa ngoni bagini: ngoni pe cara hidop jang lei sama deng cara hidop dari orang yang nyanda kanal pa Tuhan Allah, pa dorang pe pikiran itu nyanda ada yang bae. 18 Dorang pe pikiran so glap, susa for dorang mo tau yang butul. Dorang hidop jao dari tu hidop yang Tuhan Allah mo kase pa dorang lantaran dorang pe kapala batu, deng dorang nimau tau tentang Dia. 19 Dorang lei so nyanda ada rasa malo, dorang ja iko tu dong pe nafsu yang besae deng dorang suka skali mo beking-beking trus tu hal-hal yang caparuni.
20 Mar tu ajaran tentang Kristus yang ngoni so dengar, nyanda kase ajar tu ajaran for mo hidop besae rupa itu. 21 Soalnya ngoni so dengar tu ajaran tentang Kristus dari tu orang-orang yang kase ajar pa ngoni. Ngoni so trima tu ajaran yang butul tentang Dia kong yang butul itu memang ada pa Yesus. 22 Tu ajaran itu bagini: ngoni se tinggal jo tu ngoni pe kalakuan yang dulu, yang dari waktu ngoni blum percaya pa Yesus. Soalnya tu kalakuan yang dulu itu nyanda bagus, tu nafsu besae itu yang ngoni da iko akang yang beking sampe ngoni jadi sesat, kong tu nafsu itu tu da beking rusak tu ngoni pe hidop. 23 Ngoni se biar jo tu Tuhan pe Roh roba tu ngoni pe pikiran, 24 deng ngoni jadi manusia baru, manusia yang Tuhan Allah da ciptakan iko Dia pe sifat, supaya ngoni ja beking tu butul deng hidop kudus.
25 Jadi brenti jo badusta, ngoni musti bicara jo yang butul satu deng laeng lantaran torang samua yang percaya pa Yesus ini so sama deng anggota dari satu badan. 26 Kalu ngoni mara, jang ngoni beking dosa, jang simpang tu ngoni pe mara itu sampe matahari so maso. 27 Kalu nyanda simpang mara bagitu, tu setang pe bos nyanda mo ada kesempatan goda pa ngoni for beking dosa. 28 Orang yang bapancuri, jang dia bapancuri lei. Dia musti rajin bakarja supaya deng de pe hasil karja dia bole babantu pa orang yang ada perlu.
29 Ngoni jang bicara tu besae-besae, jang tu kata-kata bagitu kaluar dari ngoni pe mulu. Mar kalu ngoni bicara, ngoni pake jo tu kata-kata yang se kuat orang pe hati, deng pake tu kata-kata yang orang perlu mo dengar for dia pe bae. 30 Ngoni bicara jo yang bae-bae, jang sampe ngoni beking tu Tuhan Allah pe Roh yang Kudus itu jadi sedi. Soalnya Tuhan Allah pe Roh yang ada pa torang itu jadi tanda kalu torang ini memang Tuhan Allah punya sampe tu hari Dia datang ulang for se slamat pa torang. 31 Ngoni musti kase tinggal jo tu ngoni pe kalakuan yang pangbasaki hati, pangbakalae deng kalakuan yang pangmara. Ngoni brenti jo bicara mara yang beking kacau, deng brenti jo se besae orang laeng pe nama. Ngoni brenti jo ja beking samua yang jaha. 32 Mar lebe bae ngoni se tunjung tu bae pa orang laeng deng sayang pa dorang. Ngoni kase ampung jo tu orang yang beking sala pa ngoni, sama deng Tuhan Allah so kase ampung pa ngoni yang so percaya pa Kristus.