Orang percaya musti jaga tu dorang pe hidop
13
1 Ini mo jadi yang katiga kali for kita mo pigi pa ngoni. Inga jo apa yang da tulis di Kitab Suci bagini, “Kalu ada orang yang dapa tudu beking sala, musti ada dua ato tiga orang yang jadi saksi for bilang kalu tu orang itu sala ato nyanda.” 2 Soalnya waktu kita da datang kadua kali pa ngoni, kita so perna da se inga pa tu orang-orang yang dulu so beking dosa. Kong skarang samantara kita da jao deng ngoni, kita mo se inga ulang lei pa dorang deng pa tu orang-orang laeng. Kita se inga pa dorang samua bagini: nanti waktu kita datang ulang, kita mo togor deng kras pa samua orang yang ja beking dosa. 3 Kita nanti mo beking bagitu lantaran ngoni da cari bukti kalu Kristus memang butul-butul da pake pa kita. Kong kalu Kristus togor pa ngoni, Dia bukang togor deng cara yang nyanda tegas mar Dia mo se tunjung tu Dia pe kuasa di antara pa ngoni. 4 Soalnya biar Kristus nyanda kuat di hari waktu Dia dapa salib, mar skarang Dia so hidop ulang lantaran tu kuasa dari pa Tuhan Allah. Bagitu lei deng torang yang percaya pa Kristus, torang lei nyanda kuat sama deng Kristus dulu, mar tu kuasa dari Tuhan Allah mo beking torang hidop sama-sama deng Kristus sampe torang lei bole layani pa ngoni.5 Co ngoni uji tu ngoni pe diri sandiri, apa ngoni itu butul-butul percaya pa Kristus ato nyanda. Uji jo dulu tu ngoni pe diri! Kalu uji ngoni pe diri bagitu, ngoni pasti mo sadar kalu Kristus itu ada pa ngoni pe hati. Kalu Kristus nyanda ada pa ngoni pe hati, ngoni nyanda tahang uji. 6 Kong tentang torang, kita harap deng yakin ngoni tau kalu torang so tahang uji, torang ini rasul yang butul. 7 Torang da minta pa Tuhan Allah supaya ngoni jang beking tu jaha. Torang pe tujuan da minta itu pa Tuhan bukang supaya dapa lia kalu torang ini lulus dari tu ujian kong torang ini butul-butul rasul, mar sebenarnya torang pe tujuan itu cuma supaya ngoni bole ja beking tu bae. Kalu ngoni bole ja beking tu bae, itu nyanda masala kalu orang laeng anggap kita ini kata bukang rasul. 8 Soalnya torang nimbole beking sesuatu yang malawang tu ajaran yang butul, yang torang bole beking itu tu ajaran yang butul. 9 Soalnya torang rasa sukacita biar torang dapa lia nyanda kuat asal torang bantu pa ngoni jadi kuat percaya pa Kristus. Torang minta pa Tuhan supaya ngoni jadi sempurna iko pa Tuhan. 10 Jadi kita tulis ni surat for ngoni waktu kita ada jao dari pa ngoni, supaya nanti kalu kita so ada sama-sama deng ngoni, kita nyanda usa lei mo ambe tindakan kras mo togor pa ngoni. Kita nyanda mo pake tu kuasa yang Tuhan da kase pa kita for togor pa ngoni lantaran waktu trima kita pe surat ngoni so bertobat. Tu kuasa itu Tuhan da kase pa kita for se kuat tu ngoni pe percaya, bukang for se ancor pa ngoni.
Paulus pe akhir surat
11 Sudara-sudara, di akhir surat ini kita minta pa ngoni supaya ngoni bersukacita jo. Ngoni brusaha jo supaya hidop bae-bae di sgala hal, ngoni trima jo samua tu kita so se nasehat pa ngoni. Ngoni musti hidop satu hati deng hidop baku-baku bae satu deng laeng. Kalu ngoni hidop rupa itu, Tuhan Allah yang sayang pa torang deng lei yang beking torang pe hidop jadi tenang mo sama-sama deng ngoni.
12 Waktu ngoni baku dapa, ngoni baku kase salama jo satu deng laeng. Kong samua tu Tuhan pe orang-orang yang ada di sini da titip salam lei for ngoni.
13 Kita minta supaya Tuhan Yesus Kristus kase tunjung Dia pe bae pa ngoni, supaya Tuhan Allah sayang pa ngoni, deng lei supaya ngoni ada hubungan dekat deng tu Roh Kudus, kong samua itu mo ada trus deng ngoni.