1 Korintus
Paulus pe surat yang pertama for jemaat di Korintus
Kata Pengantar
Ni kitab 1 Korintus ini Paulus yang da tulis. Kitab ini pe model surat, kong Paulus da tulis ni surat for orang-orang percaya di kota Korintus yang ada di daera Akhaya, tu skarang ada di negara Yunani. Tu orang-orang percaya di Korintus ada yang dari orang Yahudi deng yang bukang Yahudi, mar yang paling basar itu tu orang yang bukang Yahudi. Tu orang-orang Korintus banya yang nyanda kanal pa Tuhan Allah, kong dorang ja basemba pa opo-opo deng banya ja beking tu kalakuan yang jaha. Paulus yang pertama da se tau tu Kabar Bae tentang Yesus pa tu orang-orang di Korintus, trus ada banya dari pa dorang yang jadi percaya pa Yesus Kristus (Kis. 18:1-11).
Pe abis Paulus pigi dari Korintus, Apolos datang se trus mangajar pa orang-orang di situ (1Kor. 3:6). Waktu Paulus ada di Efesus, dia dapa dengar brita tentang masala-masala jemaat di Korintus (1Kor. 1:11), kong abis itu ada utusan dari jemaat di Korintus (1Kor. 16:17) yang kase surat pa dia, dorang da minta nasehat for masala-masala yang da jadi (1Kor. 7:1, 8:1, 12:1, 16:1). Di surat ini, dia da jawab tu orang-orang Korintus pe pertanyaan yang dorang da tulis pa dong pe surat, dia lei kase nasehat deng togor pa dorang dalam banya hal. Dorang so tapica-pica, ada yang suka pa Paulus, ada yang suka pa Apolos ato pa pemimpin-pemimpin laeng (1Kor. 1:10-12, 3:1-6). Dia jawab akang tu dorang pe pertanyaan tentang kaweng (1Kor. 7), deng tentang makanan ja kase for persembahan pa opo-opo (1Kor. 8 deng 1Kor. 10). Dia togor pa dorang lantaran ada yang ja basombong deng tu karunia yang Roh Kudus da kase (1Kor. 12-14), deng masi banya lei tu Paulus da bilang di ni surat. De pe inti Paulus togor pa dorang di banya hal, supaya dorang yang percaya pa Yesus jadi lebe bagus.