Kumpul doi for kase pa Tuhan pe orang-orang
16
1 Kong skarang, kita mo bicara tentang doi yang da kumpul for kase pa Tuhan pe orang-orang yang ada di Yerusalem, supaya ngoni beking yang sama iko apa yang kita so se tunjung pa jemaat-jemaat yang ada di daera Galatia. 2 Di hari pertama di tiap minggu, lebe bae ngoni masing-masing simpang akang sadiki doi yang ada iko tu doi yang ngoni da dapa. Ngoni beking bagitu supaya jang waktu kita datang baru ngoni mo bakumpul tu doi. 3 Serta kita so sampe pa ngoni, kita mo utus bebrapa orang yang ngoni so pili for mo bawa tu doi yang ngoni so kumpul itu ka Yerusalem. Nanti kita beking surat pengantar for dorang mo bawa ka sana. 4 Kong kalu memang bagus for kita mo pigi ka sana, kita lei nanti mo pigi sama-sama deng dorang.Paulus pe rencana for mo pigi ka Korintus
5 Kita mo datang pa ngoni, mar kita lebe dulu mo lewat di daera Makedonia lantaran kita memang musti lewat di sana. 6 Kong di Korintus, kita stou mo tinggal sadiki lama deng ngoni di situ ato tare stou kita mo tinggal slama oras dingin di situ, supaya abis oras dingin ngoni bole mo tolong akang pa kita for mo se trus tu kita pe perjalanan ka mana jo kita mo pigi. 7 Soalnya kita nimau kalu kita mo lia pa ngoni skarang mar cuma nyanda lama, kita harap supaya kita bole mo tinggal sadiki lama deng ngoni, kalu itu memang Tuhan pe mau. 8 Mar kita tetap mo tinggal dulu di Efesus sampe tu hari raya Pentakosta. 9 Soalnya di Efesus ini ada banya kesempatan for kita mo beking tu Tuhan pe karja yang basar deng penting, biar lei di sini ada banya yang malawang pa kita.
10 Kalu Timotius datang, ngoni trima jo pa dia deng bae-bae supaya dia nyanda ada rasa tako waktu ada deng ngoni, lantaran dia lei ja beking Tuhan pe karja sama deng kita. 11 So itu, jang ada dari antara pa ngoni yang pandang enteng pa dia, mar ngoni musti tolong pa dia, supaya dia bole mo kase trus de pe perjalanan deng slamat sampe dia bole datang ulang pa kita. Soalnya kita da tunggu pa dia di sini sama-sama deng tu sudara-sudara yang percaya yang laeng.
12 Kong tentang Apolos tu torang pe sudara yang percaya, kita so ulang-ulang minta deng sangat pa dia, supaya dia bole sama-sama deng sudara-sudara yang percaya yang laeng for pigi pa ngoni. Mar skarang dia sama skali nimau mo pigi, cuma nanti kalu ada kesempatan yang bae baru dia mo pigi pa ngoni.
Hormat jo pa tu orang yang da karja for Tuhan
13 Ngoni musti hati-hati, ngoni musti tetap bapegang kuat pa ngoni pe percaya! Kase kuat tu ngoni pe diri kong brani jo! 14 Samua yang ngoni beking, ngoni musti beking itu deng sayang.
15 Sudara-sudara, ngoni samua so kanal pa Stefanus. Dia deng de pe kluarga itu yang pertama tu da jadi percaya pa Yesus di daera Akhaya, kong dorang so kase dong pe diri for layani tu Tuhan pe orang-orang. 16 Kong kita se nasehat pa ngoni, supaya ngoni dengar-dengaran pa tu orang-orang yang sama deng dorang itu. Ngoni lei dengar-dengaran pa tu orang-orang laeng yang da karja sama-sama deng dorang, tu orang-orang yang so karja kras for layani tu orang percaya.
17 Kita snang skali lantaran tu Stefanus, Fortunatus deng Akhaikus so datang kamari. Deng dorang datang kamari, itu sama jo deng dorang da ganti pa ngoni di sini. 18 Dorang itu beking kuat kita pe hati deng tantu lei ngoni pe hati. Ngoni musti hormat tu orang-orang yang sama deng dorang itu.
Paulus deng orang-orang percaya pe salam for orang Korintus
19 Tu jemaat-jemaat di daera Asia da kirim salam for ngoni. Akwila deng de pe bini Priskila, deng tu jemaat yang da bakumpul pa dorang pe ruma da kirim salam banya-banya for ngoni yang sama-sama percaya pa Tuhan. 20 Kong samua sudara-sudara yang di sini da kirim salam lei for ngoni. Trus kalu ngoni deng ngoni baku dapa, ngoni baku kase salam sayang jo satu deng laeng.
21 Kita da tulis ini deng kita pe tangan sandiri: salam dari kita Paulus.
22 Sapa jo yang nyanda sayang pa Tuhan, dia itu mo dapa kutuk. Maranata! Tuhan datang jo.
23 Kita minta supaya Tuhan Yesus se tunjung trus tu Dia pe bae pa ngoni.
24 Kita sayang trus pa ngoni samua yang so sama-sama percaya pa Kristus Yesus.