Paulus se inga kalu Yesus mati mar so hidop ulang
15
1 Sudara-sudara, kita skarang mo se inga pa ngoni tu Kabar Bae tentang Yesus yang kita so perna se tau pa ngoni. Tu Kabar Bae itu yang ngoni so trima kong ngoni tetap kuat percaya deng tu Kabar Bae itu. 2 Kalu ngoni tetap kuat percaya deng tu Kabar Bae yang kita so se tau pa ngoni itu, ngoni mo slamat dari tu hukuman dosa. Mar kalu nyanda, tu ngoni pe percaya itu nyanda ada de pe guna.3 Soalnya tu hal yang paling penting tu kita da trima, itu lei yang kita so se tau pa ngoni. Tu hal yang paling penting itu bagini: Kristus tu Raja yang se slamat pa manusia mati for tubus torang pe dosa-dosa, itu iko tu da tulis dulu di Kitab Suci. 4 Kong serta orang se kubur pa Dia, Tuhan Allah se hidop ulang pa Dia di hari yang katiga, itu iko tu da tulis dulu di Kitab Suci 5 Abis itu, Dia pi batunjung tu Dia pe diri pa Petrus, trus Dia lei batunjung pa Dia pe dua blas murit. 6 Trus Dia lei pi batunjung skaligus pa lebe dari lima ratus sudara-sudara yang percaya, ada banya dari pa dorang itu yang masi hidop sampe skarang mar ada lei no yang so mati. 7 Abis itu, Dia pi batunjung pa Yakobus, kong lei pa samua rasul.
8 Kong paling akhir, Dia batunjung lei pa kita. Dari antara tu rasul-rasul, kita ini da jadi rasul di waktu yang nyanda da sangka-sangka, itu sama deng tu bayi yang da lahir blum pa de pe waktu. 9 Sebenarnya kita ini nyanda pantas mo bilang rasul. Soalnya dulu kita ini yang ja siksa tu Tuhan Allah pe jemaat. So itu dari samua rasul, so kita ini no tu rasul yang paling hina. 10 Mar Tuhan Allah se tunjung Dia pe bae pa kita sampe kita bole jadi rasul skarang ini, kong tu Dia pe bae yang Dia da se tunjung pa kita itu nyanda sia-sia. Malatare dari antara rasul-rasul, kita tu rasul yang da bakarja kras lebe dari tu rasul-rasul yang laeng. Mar samua tu karja yang kita da beking, itu samua kita da beking bukang deng kita pe kemampuan sandiri, itu bole jadi lantaran Tuhan Allah pe bae pa kita sampe kita mampu for beking tu kita pe karja itu. 11 Jadi sebenarnya nyanda masala kalu kita ato tu rasul-rasul yang laeng tu da kase tau pa ngoni tentang Yesus, yang penting torang so se tau pa ngoni tentang Yesus, trus ngoni lei so jadi percaya.
Orang percaya yang so mati pasti mo hidop ulang
12 Torang ja se ajar pa orang-orang kalu Kristus da mati kong so hidop ulang. No bagimana mungkin dang ada dari antara pa ngoni yang bilang kalu tu orang yang so mati nyanda mo hidop ulang? 13 Kalu misalnya tu orang mati nyanda mo hidop ulang, bagitu lei dang deng Kristus, pasti lei so nyanda da se hidop ulang. 14 Kong kalu Kristus nyanda da se hidop ulang, itu de pe arti nyanda ada de pe guna tu brita tentang Dia yang torang da se tau, bagitu lei deng tu ngoni pe percaya pa Dia nyanda ada de pe guna. 15 Trus kalu misalnya butul tu orang yang mati nyanda hidop ulang, itu de pe arti torang so basaksi yang nyanda butul tentang Tuhan Allah, lantaran torang ja kase tau pa orang-orang kalu Tuhan Allah da se hidop ulang pa Kristus. Padahal Tuhan Allah nyanda se hidop ulang pa Kristus kalu misalnya butul tu orang mati nyanda se hidop ulang. 16 Soalnya kalu memang butul orang yang mati nyanda mo hidop ulang, tantu lei katu Kristus nyanda da se hidop ulang. 17 Kong kalu memang Kristus nyanda da se hidop ulang, tu ngoni pe percaya pa Kristus itu nyanda ada de pe guna, kong ngoni pe dosa-dosa nyanda dapa ampung. 18 Kong lei kalu memang Kristus nyanda da se hidop ulang, tu orang-orang yang so percaya pa Kristus kong so mati, dorang pe dosa-dosa nyanda dapa ampung kong mo dapa hukuman. 19 So torang ini yang paling dapa sayang dari samua orang kalu misalnya torang baharap pa Kristus cuma for Dia mo tolong slama torang hidop di dunia ini, bukang baharap pa Kristus for torang pe hidop nanti abis mati.
Torang mo hidop ulang sama deng Kristus so hidop ulang
20 Sebenarnya yang butul bagini: Kristus so se hidop ulang dari antara orang mati. Dia itu no yang pertama tu da hidop ulang kong nanti tu orang percaya yang so mati, dorang lei mo se hidop ulang. 21 Soalnya lantaran satu orang pe dosa, tu Adam, kong samua orang musti mati. Bagitu lei lantaran tu satu Orang da beking, tu Yesus, kong tu orang-orang bole mo hidop ulang. 22 Samua orang musti mati lantaran samua orang ada hubungan deng Adam, mar samua orang yang ada hubungan deng Kristus pasti mo hidop ulang.
23 Samua yang mo hidop ulang ada de pe urutan masing-masing: Kristus itu yang pertama da hidop ulang, trus nanti di waktu Dia so datang ulang ka dunia, itu waktu no tu Dia pe orang-orang mo hidop ulang lei. 24 Waktu itu tu dunia mo kiamat, kong Yesus mo se binasa samua yang pegang prenta, samua yang ada kuasa deng yang punya pengaru di dunia ini. Pe klar itu, Dia srahkan tu Dia pe kuasa sbagai Raja pa Tuhan Allah, tu Dia pe Bapa. 25 Soalnya seblum kiamat, Kristus musti tetap baprenta sbagai Raja sampe Tuhan Allah se kala samua tu Dia pe musu-musu, itu sama deng Tuhan Allah taru samua tu musu itu di bawa pa Kristus pe kaki. 26 Tu Tuhan Allah pe musu yang terakhir yang Dia mo se kala, itu no tu maut yang bole se mati orang. 27 Soalnya di Kitab Suci da tulis bagini, “Tuhan Allah se kala samua supaya samua itu ada di bawa Kristus pe kuasa, itu sama deng Dia taru samua di bawa Kristus pe kaki.” Jadi tu da tulis itu jelas for torang kalu samua yang ada di bawa Kristus pe kuasa, nyanda tamaso deng Tuhan Allah sandiri, yang da beking samua ada di bawa pa Kristus pe kuasa. 28 Kong kalu samua so ada di bawa pa Kristus pe kuasa, Kristus sandiri sbagai Anak Allah mo kase Dia pe diri ada di bawa Tuhan Allah pe kuasa. Tuhan Allah itu no yang so se kala samua yang ada for taru di bawa Kristus pe kuasa, deng bagitu Tuhan Allah lebe basar dari samua yang ada.
29 Kong tentang tu orang yang mati da hidop ulang, kalu misalnya tu orang mati nyanda mo hidop ulang, no bagimana dang deng tu orang-orang yang da dapa baptis for orang-orang yang so mati? Apa dang de pe guna dorang da dapa baptis for tu orang-orang yang so mati? Pasti itu samua nyanda ada de pe guna to? 30 Kalu misalnya tu orang mati nyanda mo hidop ulang, no kiapa dang torang musti ambe risiko slalu ja mangada tu macam-macam bahaya lantaran ja kase tau tu Kabar Bae tentang Yesus? 31 Sudara-sudara, tiap hari kita ini ja mangada tu siksa sampe amper-amper mo mati, itu sama deng tiap hari kita da baku mangada deng maut, kong tu kita da bilang itu butul. Kita tahang ja mangada tu siksa lantaran kita lei bangga pa ngoni yang so jadi percaya pa Kristus Yesus tu torang pe Tuhan. 32 Dulu di sini, di Efesus, kita da mangada tu siksa lantaran tu kita pe musu-musu, itu bole mo se sama deng kita da berjuang malawang tu binatang-binatang buas. Kong kalu misalnya tu orang percaya yang so mati nyanda mo hidop ulang, nyanda ada de pe guna dang tu kita pe karja ini, deng lei lebe bae mari jo dang torang beking sama deng tu orang da bilang ini, “Mari jo skarang torang bapesta makang deng minum, lantaran eso torang so mo mati.”
33 Jang ngoni tapengaru for iko tu pikiran yang sala. Soalnya ada tu kata-kata bagini, “Kalu bergaul dekat deng orang yang ja beking tu nyanda bagus, itu bole mo pengaruhi tu orang yang ja beking tu bagus jadi beking yang nyanda bagus.”
34 Jadi skarang ngoni musti butul-butul sadar, ngoni jang beking lei dosa. Soalnya ada dari pa ngoni yang masi blum kanal pa Tuhan Allah. Kita bilang ini supaya ngoni jadi malo.
Orang percaya mo hidop ulang kong dapa badan baru
35 Ada orang yang mungkin mo batanya bagini, “Bagimana lei kong orang mati mo hidop ulang? Dorang dang mo hidop ulang deng badan yang bagimana?”
36 Pe biongo skali tu orang yang da batanya rupa itu. Kalu torang mo batanang bibit, tu bibit itu nyanda mo batumbu kalu dia nyanda mo tambung lebe dulu di tana, itu sama deng tu bibit da se mati lebe dulu baru dia hidop ulang. 37 Kong tu bibit yang torang da tanang itu, itu bukang tanaman yang memang so jadi, mar cuma de pe bibit rupa tu bibit gandum ato bibit-bibit laeng. 38 Tu bibit-bibit itu masing-masing nanti mo batumbu deng de pe model sandiri, kong yang da kase tu model itu Tuhan Allah sandiri, iko Dia pe mau.
39 Bagitu lei deng samua yang hidop ada de pe model masing-masing. Tu manusia pe model baku beda dari tu binatang, kong baku beda dari tu burung deng lei baku beda dari tu ikang. 40 Bagitu lei, tu benda-benda yang di langit itu luar biasa, deng tu benda-benda yang ada di bumi lei luar biasa. Dua-dua benda ini luar biasa, mar dua-dua itu pe model baku beda. 41 Tu benda-benda di langit, tu matahari, bulan deng bintang-bintang, masing-masing pe luar biasa baku-baku beda. Kong tu bintang-bintang lei baku-baku beda tu dong pe luar biasa, tu bintang yang satu pe luar biasa baku beda deng tu bintang yang laeng pe luar biasa.
42 Bagitu lei no tu mo jadi deng tu orang yang so mati kong hidop ulang. Tu orang itu pe badan waktu dia masi ada di dunia ini nyanda mo batahang lama, itu bole mo se sama deng tu bibit yang orang da tambung di tana tu nyanda mo batahang for slama-lamanya. Mar tu badan yang Tuhan mo kase nanti waktu torang hidop ulang, tu badan itu mo batahang for slama-lamanya. 43 Waktu orang mati kong mo kubur, tu badan itu nyanda batahang kong mo jadi busu. Mar nanti waktu Tuhan se hidop ulang pa orang itu, tu badan itu so jadi badan yang kuat deng luar biasa. 44 Tu badan yang da se kubur, itu badan yang torang pake di dunia ini. Mar tu badan yang nanti Tuhan kase waktu orang hidop ulang, itu badan yang dari Roh Kudus yang for torang di sorga. Kalu ada badan yang dari dunia ini, tantu katu ada lei badan yang dari Roh Kudus. 45 Itu sama deng tu da tulis di Kitab Suci, “Adam itu manusia pertama yang Tuhan da beking, Tuhan beking Adam itu jadi hidop.” Kong Kristus bole mo bilang tu Adam yang terakhir, trus Dia tu bole se hidop kekal pa manusia. 46 Tu torang pe badan yang ada skarang ini, itu badan yang torang pake di dunia ini. Nanti kalu Tuhan so se hidop ulang pa torang, baru torang dapa tu badan yang dari Roh Kudus. 47 Tu manusia yang pertama Tuhan da beking dari abu, de pe asal dari dunia ini. Mar Kristus tu manusia yang kadua, Dia pe asal dari sorga. 48 Samua manusia yang de pe asal dari dunia ini, de pe badan sama deng tu manusia pertama yang Tuhan da beking. Mar tu manusia yang nanti mo hidop di sorga, dorang pe badan mo sama deng Dia yang dari sorga. 49 Skarang torang pe badan sama deng tu manusia pertama tu da beking dari abu, mar nanti torang pe badan mo sama deng Dia yang dari sorga.
50 Sudara-sudara, ini tu kita mo bilang pa ngoni: torang pe badan skarang ini yang dari dara deng daging nimbole mo maso di tampa tu Tuhan Allah Berkuasa sbagai Raja, lantaran tu badan yang mo ancor ini nimbole mo ada di tampa yang kekal.
51 Ngoni tarukira jo bae-bae, kita mo se tau pa ngoni satu rahasia: nyanda samua dari torang tu mo mati, mar samua torang pasti mo bruba, bae itu yang so mati ato tu blum mati. 52 Soalnya waktu tu trompet yang terakhir babunyi, tu orang-orang mati mo hidop ulang, trus dorang so nyanda mo mati lei deng tu orang-orang yang masi hidop, dorang pe badan mo bruba trus nyanda mo mati lei. Ini samua mo jadi dalam waktu yang capat skali, waktu tu trompet babunyi. 53 Soalnya torang pe badan yang bole mo mati deng mo ancor ini, nanti musti bruba jadi so nyanda lei mo mati deng nyanda mo ancor. 54 Kong serta tu torang pe badan ini bruba jadi badan yang nyanda mo mati deng yang nyanda mo ancor, apa yang da tulis di Kitab Suci so jadi. Bagini tu da tulis,
“Tuhan so se kala tu maut pe kuasa,
so nyanda ada lei yang mo mati.
55 Hei maut, ngana kasiang so kala!
Hei maut, ngana kasiang so nyanda ada lei kuasa,
ngana pe bisa so nyanda ada lei.”
56 Tu maut pe bisa itu dosa yang bole beking orang mati. Kong tu orang yang beking dosa musti dapa hukuman lantaran so langgar tu atoran-atoran di Kitab Taurat. 57 Mar torang bilang makase pa Tuhan Allah, Dia yang da se bebas pa torang dari hukuman dosa, itu sama deng Dia so se menang pa torang. Dia se menang pa torang lewat apa yang Yesus Kristus tu torang pe Tuhan da beking di kayu salib.
58 So itu kita pe sudara-sudara yang kita sayang, ngoni pe percaya musti tetap kuat, jang se biar ada yang beking ngoni jadi ragu deng tu ngoni pe percaya itu. Ngoni slalu beking jo deng sunggu-sunggu tu karja yang Tuhan so kase pa ngoni lantaran ngoni tau kalu tu ngoni pe karja itu nyanda mo sia-sia.