Roma
Paulus pe surat for jemaat di Roma
Kata Pengantar
Ni kitab Roma ini Paulus yang da tulis. Ni kitab pe bentuk surat yang da tulis for orang-orang percaya di kota Roma. Tu Roma itu dulu kota yang paling top lantaran itu pusat dari pemerenta Romawi yang da jaja banya daera. Paulus pe tujuan tulis ni surat for se ajar tu orang-orang percaya di Roma tu dasar ajaran for orang-orang yang percaya pa Yesus Kristus. Tu ajaran yang paling utama bagini: samua manusia berdosa, kong cuma lewat percaya pa Yesus Kristus manusia bole jadi butul di muka pa Tuhan Allah. Di surat ini, Paulus bilang kalu torang nimbole mo jadi orang yang butul di muka pa Tuhan deng cara beking tu atoran-atoran di kitab Taurat, lantaran torang nyanda mampu mo beking tu atoran-atoran itu (Rm. 3:27-28, 4:15). Tuhan Allah se ampung torang pe dosa-dosa lewat Yesus pe kematian (Rm. 3:24-25, 5:8). Jadi kalu torang percaya pa Yesus, Tuhan Allah se bebas pa torang dari hukuman dosa deng Dia beking torang jadi butul di muka pa Dia (Rm. 3:22, 26, 4:24-25, 5:1). Paulus lei tulis tu Tuhan Allah pe tujuan pa orang-orang Yahudi yang ja bilang keturunan Israel ato orang Israel (Rm. 9-11). Trus Paulus lei kase tau tu dasar iman for orang percaya pa Yesus deng bagimana orang-orang percaya itu mo hidop di dunia ini (Rm. 12-15). Paulus so ada rencana mo pigi di kota Roma mar dia blum sempat pigi, so itu dia beking surat ini for kase tau tu dasar iman pa orang-orang percaya.