Paulus kase tau tu Kabar Bae pa orang-orang di Korintus
18
1 Abis itu, Paulus kase tinggal tu Atena kong pigi ka Korintus. 2 Di Korintus, Paulus baku dapa deng satu orang Yahudi tu dia pe nama Akwila. Akwila ini orang Pontus. Dia deng dia pe bini Priskila baru datang dari Italia. Dorang datang ka Korintus lantaran Klaudius tu raja yang paling tinggi di krajaan Romawi da prenta pa orang-orang Yahudi musti kaluar dari Roma. Kong satu waktu Paulus basingga pa Akwila pe ruma. 3 Paulus deng Akwila pe karja sama-sama tukang babeking tenda, so itu Paulus manumpang pa Akwila pe ruma kong bakarja sama-sama.4 Saban hari Sabat, Paulus babicara pa orang-orang Yahudi deng Yunani di ruma ibada agama Yahudi, kong dia brusaha kase yakin pa dorang supaya jadi percaya pa Yesus. 5 Waktu Silas deng Timotius datang dari Makedonia, Paulus pake samua de pe waktu for se tau tu firman, dia bilang pa orang-orang Yahudi kalu Yesus itu Mesias tu Raja yang se slamat pa manusia dari hukuman dosa. 6 Mar tu orang-orang itu cuma da malawang kong bahina pa Paulus. So itu Paulus kase kabas tu abu dari pa dia pe baju, itu de pe tanda kalu dia so nyanda farduli lei pa dorang. Kong Paulus bilang, “Ngoni sandiri yang mo tanggong tu Tuhan Allah pe hukuman. Itu bukang kita pe sala, kita so se tau tu Kabar Bae mar ngoni nyanda percaya. Mulai skarang, kita mo pigi pa orang-orang yang bukang Yahudi for mo kase tau tu Kabar Bae.”
7 Abis itu, Paulus kaluar dari tu ruma ibada. Dia pigi pa Titius Yustus pe ruma, tu baku sabla deng ruma ibada. Titius itu bukang orang Yahudi mar dia ja baibada pa Tuhan Allah.
8 Ada tu kapala ruma ibada agama Yahudi di Korintus, de pe nama Krispus. Dia deng samua orang yang ada pa de pe ruma jadi percaya pa Tuhan. Kong banya orang Korintus yang da badengar tu Paulus da se ajar jadi percaya kong dorang dapa baptis.
9 Satu malam, Paulus dapa penglihatan. Pa de pe penglihatan, Tuhan da babilang pa dia, “Paulus, ngana jang tako. Ngana se tau trus jo tu Kabar Bae pa orang-orang. 10 Soalnya Kita sama-sama deng ngana. Nyanda ada satu orang tu bole mo pukul deng mo siksa pa ngana, lantaran ada banya Kita pe orang di kota ini.” 11 So itu Paulus tinggal di Korintus slama satu taong anam bulan, dia kase ajar pa dorang tu Tuhan Allah pe firman.
12 Mar waktu Galio so jadi gubernur di daera Akhaya, tu orang-orang Yahudi baku skongkol for tangka pa Paulus. Abis itu dorang bawa pa dia ka pengadilan. 13 Kong dorang bilang pa gubernur Galio, “Ni orang ini ja pengaruhi pa orang banya, supaya baibada pa Tuhan Allah deng cara yang baku laeng deng torang pe atoran-atoran di kitab Taurat.”
14 Mar waktu Paulus baru mo babela diri, tu gubernur Galio iko babilang pa orang-orang Yahudi, “Hei, orang-orang Yahudi! Kalu ngoni tudu ni orang da beking sala ato kejahatan, tantu katu kita musti urus tu masala. 15 Mar ini, ngoni cuma da baku ambe pendapat tentang ngoni pe agama, tu soal kata-kata, nama-nama deng ngoni pe atoran-atoran agama. Jadi ngoni sandiri jo yang se klar tu masala, kita nimau mo jadi hakim pa ngoni pe perkara ini.” 16 Abis itu, Galio user pa dorang dari tu pengadilan.
17 Mar tu orang-orang Yahudi yang ada di situ tangka satu orang tu dia pe nama Sostenes. Dia itu kapala ruma ibada agama Yahudi. Dorang pukul pa dia di muka pa gubernur mar tu gubernur nyanda farduli akang pa dorang.
Paulus kase tau tu Kabar Bae di mana-mana
18 Paulus masi da tinggal sadiki lama lei di Korintus. Abis itu, dia minta permisi pa sudara-sudara yang percaya di situ, kong dia pigi sama-sama deng Priskila deng Akwila ka Kengkrea for mo blayar ka daera Siria. Di Kengkrea, Paulus cukur de pe rambu. Dia beking bagitu for jadi tanda kalu de pe nasar dulu pa Tuhan Allah, dia so beking. 19 Abis itu, dorang blayar kong sampe di Efesus. Di situ Paulus kase tinggal pa Priskila deng Akwila, kong dia maso ka ruma ibada agama Yahudi trus badiskusi deng orang-orang Yahudi tentang Yesus. 20 Tu orang-orang Yahudi minta pa Paulus supaya tinggal lebe lama deng dorang, mar Paulus nyanda iko akang dong pe mau. 21 Dia minta permisi kong babilang pa dorang, “Kalu Tuhan Allah pe mau kita bale, kita pasti mo bale ulang kamari.” Abis itu, Paulus se tinggal tu Efesus kong dia blayar.
22 Paulus blayar sampe di Kaisarea, di situ dia turung bajalang ka Yerusalem. Di Yerusalem, dia basingga sadiki pa jemaat di sana for kase salam pa dorang, abis itu dia pigi ka Antiokhia di daera Siria. 23 Di situ dia tinggal bebrapa lama, trus dia pigi dari satu tampa ka tampa laeng di daera Galatia deng Frigia. Di tampa-tampa itu, dia se kuat hati tu orang-orang yang ja iko pa Yesus.
Apolos kase tau tu Kabar Bae di Efesus deng di daera Akhaya
24 Ada satu orang Yahudi tu dia pe nama Apolos, kong dia itu pe asal dari Aleksandria. Dia baru sampe di Efesus. Dia jago babicara deng tau skali tu Kitab Suci pe isi. 25 Dia so trima tu ajaran for mo iko pa Tuhan Yesus. Dia smangat skali se cirita tentang Yesus, kong samua tu dia da se cirita nyanda ada yang sala. Mar biar lei bagitu, dia cuma tau tu Yohanes Pembaptis pe baptisan. 26 Apolos deng brani mulai mangajar di ruma ibada agama Yahudi. Satu kali, Priskila deng Akwila da badengar waktu Apolos da mangajar, kong abis itu, dorang undang pa dia pigi pa dorang pe ruma. Di situ dorang se tau lebe jelas pa dia tu cara for iko pa Tuhan Allah.
27 Abis itu, Apolos suka mo pigi ka daera Akhaya. So itu, tu sudara-sudara yang percaya di Efesus bantu pa dia deng cara kirim surat pa orang-orang yang ja iko pa Yesus di Akhaya, supaya dorang bole mo trima deng bae pa Apolos. Kong waktu Apolos sampe di Akhaya, dia banya bantu pa tu orang-orang percaya, dorang itu da jadi percaya lantaran Tuhan se tunjung Dia pe sayang. 28 Soalnya di muka banya orang, Apolos deng brani kase kala tu orang-orang Yahudi waktu dorang da baku ambe pendapat. Dia se tunjung tu bagean-bagean dari Kitab Suci yang se bukti kalu Yesus itu no tu Mesias yang Tuhan Allah da janji dari dulu for se slamat pa manusia.