Orang yang so percaya pa Yesus mar masi iko dunia pe cara bapikir
3
1 Sudara-sudara, tempo hari waktu kita da sama-sama deng ngoni, kita nimbole babicara pa ngoni sama deng kita da babicara pa orang yang Roh Kudus da kuasai. Kita cuma bole bicara pa ngoni sama deng bicara pa manusia yang cuma tau tu dunia pe cara bapikir. Waktu itu, ngoni baru percaya pa Kristus kong blum kuat tu ngoni pe percaya, ngoni itu bole mo se sama deng bayi. 2 Bayi itu cuma bole mo minum susu, blum bole mo makang tu makanan kras. Bagitu lei ngoni, dulu ngoni blum mampu mo trima tu hal-hal rohani rupa tu orang yang Roh Kudus da kuasai ja trima, kong sampe skarang lei ngoni blum mampu mo trima itu. 3 Soalnya sampe skarang, ngoni masi lei manusia yang cuma ja iko tu dunia pe cara bapikir. Kita bilang bagitu lantaran dari pa ngoni ada yang ja bamangiri deng baku ambe pendapat, itu no de pe tanda kalu ngoni masi ja iko tu dunia pe cara bapikir deng hidop cuma iko manusia pe mau sandiri. 4 So lantaran dari antara pa ngoni ada yang bilang, “Kita ja iko pa Paulus,” deng tu laeng bilang, “Kita ja iko pa Apolos,” itu to so se tunjung kalu ngoni itu masi manusia yang ja iko tu dunia pe cara bapikir.5 Sapa so tu Apolos? Kong kita ini Paulus, sapa so kita? Torang dua ini cuma orang-orang yang ja beking tu Tuhan da suru, kong torang da kase tau tu Kabar Bae pa ngoni sampe ngoni jadi percaya pa Tuhan, itu iko tu karja yang Tuhan da kase pa torang masing-masing. 6 Kita tu pertama yang da se tau tu Kabar Bae tentang Kristus pa ngoni, kong Apolos yang se ajar tu Kabar Bae itu, mar Tuhan Allah yang beking tu Kabar Bae itu jadi kuat pa ngoni pe hati. Itu sama deng kita yang da batanang tu bibit, Apolos yang basirang, mar yang da kase batumbu tu bibit itu Tuhan Allah. 7 So itu, yang penting di sini bukang tu orang yang da batanang ato yang da basirang, mar yang penting itu Tuhan Allah yang da se batumbu. 8 Tu orang yang da batanang deng yang da basirang itu sama dorang pe tujuan, kong dua-dua mo trima tu upah iko tu karja yang masing-masing da beking. 9 Soalnya torang dua ini tamang karja yang bakarja for Tuhan Allah. Ngoni itu sama deng Tuhan Allah pe kobong tu tampa torang da karja akang, deng ngoni itu lei sama deng Tuhan Allah pe bangunan.
Kristus itu dasar dari ajaran
10 Tuhan Allah se tunjung tu Dia pe bae pa kita deng cara beking kita jadi sama deng ahli bangunan yang pande. Kita so kase tau pa ngoni tu hal-hal rohani yang masi de pe dasar, itu sama deng kita da beking satu fondasi yang kuat. Abis itu ada orang yang datang for se trus se ajar pa ngoni tu hal-hal rohani itu, itu sama deng dia beking bangunan di atas tu fondasi itu, mar dia musti tarukira bae-bae bagimana tu bangunan yang dia mo se badiri di atas tu fondasi itu. 11 Soalnya Yesus Kristus itu no tu fondasi, kong nyanda ada satu fondasi laeng yang orang laeng bole beking, kacuali tu fondasi itu.
12 Ada orang yang se badiri bangunan di atas tu fondasi itu pake bahan dari: mas, perak, deng batu permata. Kong ada lei yang da pake bahan dari: kayu, rumpu kring deng jerami. 13 Soalnya nanti di hari waktu Tuhan mo adili samua orang, tu karja dari tiap orang mo dapa lia, apa itu bagus ato nyanda, itu sama deng tu bahan yang da pake for beking tu bangunan da dapa tes deng api, apa tu bahan itu tahang waktu dapa bakar ato nyanda. 14 Kalu tu karja itu bagus waktu dapa priksa, tu karja bagus itu bole mo se sama deng tu bahan bangunan yang tahang waktu da bakar kong tu orang itu mo dapa upah. 15 Mar kalu tu karja nyanda bagus waktu dapa priksa, tu karja itu bole mo se sama deng tu bahan bangunan yang nyanda tahang waktu da bakar, kong tu orang itu mo rugi. Dia memang mo slamat dari tu hukuman dosa, mar dia sama deng orang yang da se slamat dari api yang amper bakar pa dia.
16 Ngoni pasti tau kalu ngoni itu sama deng Tuhan Allah pe Ruma Ibada Pusat, kong Tuhan Allah pe Roh da tinggal pa ngoni. 17 Kalu ada orang yang beking tu hubungan antara ngoni tu orang percaya jadi rusak, itu sama deng dia so beking rusak tu Tuhan Allah pe Ruma Ibada Pusat kong Tuhan Allah mo se binasa pa dia. Soalnya Tuhan Allah pe Ruma Ibada Pusat itu kudus, kong ngoni samua itu no tu Tuhan Allah pe Ruma Ibada Pusat.
Jang basombong anggap diri bijaksana
18 Kalu ngoni anggap tu ngoni pe diri itu bijaksana, itu sama deng ngoni so tipu tu ngoni pe diri sandiri, lantaran apa yang ngoni tau itu cuma iko dunia pe cara bapikir, mar di muka pa Tuhan Allah ngoni itu sebenarnya nintau apa-apa. Kalu ada orang yang anggap dia bijaksana iko dunia pe cara bapikir, lebe bae dia anggap de pe diri itu nintau apa-apa, supaya di muka pa Tuhan Allah dia itu bijaksana. 19 Soalnya kalu ada orang yang bijaksana iko dunia pe cara bapikir, itu nyanda ada de pe guna for Tuhan. Soalnya itu so tatulis di Kitab Suci, “Ada orang yang bijaksana iko dunia pe cara bapikir, mar Tuhan Allah pake apa yang orang itu tau for bale se kala pa dia.”
20 Deng ada lei yang tulis bagini, “Tuhan tau tu pikiran-pikiran dari tu orang-orang yang bijaksana iko tu dunia pe cara bapikir, mar sebenarnya tu dong pe pikiran itu nyanda ada de pe guna.”
21 So lantaran itu, jang ada satu orang dari pa ngoni yang basombong lantaran dia da iko pa orang tertentu, lantaran samua tu Tuhan da kase pa ngoni itu for ngoni pe bae. 22 Jadi kita tu Paulus, Apolos, deng Petrus, torang tiga ini Tuhan se tugas for bantu pa ngoni. Tuhan lei kase pa ngoni ni dunia, Dia lei kase tu ngoni pe hidop deng mati, Dia lei da kase tu ngoni pe waktu skarang deng lei ngoni pe masa depan. Samua itu Tuhan kase jadi ngoni punya. 23 Kong ngoni itu Kristus punya, trus Kristus itu Tuhan Allah punya.