6
1 Torang ini Tuhan pe tamang karja, kong torang se nasehat pa ngoni supaya ngoni jang se sia-sia tu Tuhan Allah pe bae yang ngoni so trima dari pa Dia. 2 Soalnya dulu Tuhan Allah da bilang bagini,“Di waktu yang Kita so pili,
Kita dengar pa ngana,
kong di hari Kita se slamat pa orang-orang,
Kita tolong pa ngana.”
Kong ngoni tarukira jo, skarang ini no tu de pe waktu itu. Skarang ini de pe waktu for Tuhan mo se slamat pa orang-orang dari tu hukuman dosa.
Paulus ja se tau tu Kabar Bae biar dapa siksa
3 Torang hidop deng bae-bae supaya torang nyanda beking orang laeng jadi nyanda iko pa Kristus, itu sama deng torang nyanda jadi batu sandungan for orang laeng. Jadi deng torang hidop bae-bae bagitu, nyanda ada orang yang mo se sala apa-apa deng torang pe playanan. 4 Torang ini orang yang ja beking tu Tuhan Allah da suru, kong waktu torang ja beking tu Dia da suru, torang se tunjung yang bae di samua hal rupa ini: torang tetap batahang biar dapa siksa, biar dapa susa, ato biar dapa masala. 5 Torang lei tetap ja beking tu Tuhan da suru pa torang, biar torang dapa pukul, dapa maso di bui, deng biar lei waktu kerusuhan. Torang lei karja kras for Tuhan, sampe laengkali torang nyanda tidor deng torang nyanda makang apa-apa. 6 Waktu torang ja beking tu Tuhan da suru, torang se tunjung tu tong pe hati yang bersi, torang tau banya hal lantaran Tuhan bantu pa torang, torang sabar, torang ja babae-bae pa orang, torang butul-butul basayang pa orang, deng tu Roh Kudus da kuasai pa torang. 7 Torang ja se tau tu ajaran yang butul deng Tuhan Allah pe kuasa ada sama-sama deng torang. Torang slalu ja beking tu butul, kong tu butul yang torang ja beking itu, itu sama deng torang pe senjata for mo jaga tong pe diri deng lei for mo malawang tu orang-orang yang mo se besae Tuhan pe nama. 8 Waktu torang dapa hormat, torang lei dapa hina, torang dapa fitna, torang lei dapa puji, kong ada yang bilang kalu torang ja se ajar yang sala, padahal torang ini ja se ajar yang butul. 9 Torang ini sebenarnya orang-orang kanal, mar dorang beking rupa jo dorang nyanda kanal pa torang. Torang amper-amper mo mati, mar torang tetap hidop. Torang dapa hukuman siksa, mar torang nyanda mati. 10 Tu susa yang torang da rasa pe banya, mar torang pe hati slalu snang. Torang ini miskin, mar torang bantu orang laeng dapa berkat. Torang ini dapa lia nyanda ada apa-apa, mar sebenarnya samua ada pa torang.
11 Hei ngoni tu orang-orang Korintus, torang da babicara trus trang pa ngoni, deng torang lei sayang skali pa ngoni. 12 Pa torang pe hati, tu torang pe sayang pa ngoni pe basar skali, mar pa ngoni pe hati, ngoni pe sayang pa torang nyanda basar. 13 Kita bicara pa ngoni sama deng ngoni ini tu kita pe anak-anak, kita bilang bagini: sayang jo pa torang sama deng torang lei sayang pa ngoni.
Hati-hati tu pengaru dari tu orang-orang yang nyanda percaya
14 Ngoni yang percaya pa Tuhan, ngoni jang ada hubungan dekat deng tu orang-orang yang nyanda percaya. Co ngoni pikir, tu orang yang ja beking tu butul di muka pa Tuhan deng lei tu orang yang ja beking tu jaha, pa dorang dua itu pasti nyanda ada yang sama. Kong biasanya, tu trang pasti nyanda mungkin to bole mo jadi satu deng glap? 15 Kristus deng tu Belial tu setang pe bos, dari pa dorang dua itu nyanda ada yang sama. Bagitu lei deng tu orang-orang yang percaya pa Tuhan deng tu orang-orang yang nyanda percaya, dari pa dorang itu pasti nyanda ada yang sama.
16 Apa de pe hubungan antara tu Tuhan Allah pe Ruma Ibada Pusat deng tu opo-opo pe kuil? Nyanda ada to? Soalnya torang tu orang-orang percaya, torang ini no tu Tuhan Allah pe Ruma Ibada Pusat, lantaran Tuhan Allah yang hidop itu ada di tenga-tenga pa torang. Ini sama deng tu Tuhan Allah da bilang di Kitab Suci,
“Kita mo tinggal sama-sama deng dorang,
deng hidop di tenga-tenga pa dorang,
kong Kita mo jadi dorang pe Tuhan Allah,
deng dorang mo jadi Kita pe orang-orang.”
17 Kong Tuhan Allah da bilang lei bagini,
“Kaluar jo ngoni dari antara pa dorang
tu orang yang nyanda percaya,
bapisa jo dari pa dorang itu.
Jang ngoni beking dosa yang beking ngoni jadi najis,
trus Kita mo trima pa ngoni.
18 Kong Kita mo jadi ngoni pe Bapa,
trus ngoni lei mo jadi Kita pe anak laki-laki
deng Kita pe anak-anak parampuang.”
Itu no tu Tuhan da bilang di Kitab Suci,
Dia itu yang Mahakuasa.