Hliŋtá dməŋ ta inda mandəfáŋa vaku
15
1 « Ta inda kɗavakta mandəfáŋa vaku, ka hliŋta kuni ta dməŋ. 2 Wya ka kuni dzaʼa magay ŋa hliŋtá dməŋ: Inda mndu nda dməŋa ni da zwaŋama ni ka Israʼila, ka zlanaŋta tsi ma fitika hliŋta. Mbləta a ta tsa la taŋ ya ŋa pla tsa dməŋ ya wu, kabga mnaŋ mna lu ta hliŋtá dməŋ manda ya mnaf Yawe. 3 Laviŋ lava kuni ta mblaftá da mayəm, ama da la ghuni ya, ka zlanaŋta kuni dər má kidaghi tsi.4 Mantsa ya, haɗta a mndu ka pɗu mataba ghuni wu, kabga dzaʼa tfaghunagha tfa Yawe, Lazglafta ghuni ta wi ta tsa haɗik vlaghuna tsi ŋa ŋa ghuni ka skwa za həga ghuni ya. 5 Ba ka sna sna kuni ta lwa Yawe, Lazglafta ghuni nda ma ŋanata, ka maga inda tsa zlahuha mnaghunaf yu gita ya kasiʼi. 6 Yawe, Lazglafta ghuni dzaʼa tfaghunaghata wi manda ya mnaghuna tsi. Dzaʼa ɓlay kuni ta nzawa ŋa ndəghata mndəra mnduha, ama haɗ nzawa dzaʼa kaghuni ɓlakta wa. Dzaʼa nzanagha nza kuni ta ndəghata mndəra mnduha, ama haɗ hahəŋ dzaʼa nzaghunaghata wa.
7 Ka mamu mndu ka pɗu mataba ghuni, sani ma la ghuni ma sana luwaha ghuni ya vlaghuna Yawe, Lazglafta ghuni katsi, yaha kuni da təŋanafta ŋuɗufa ghuni, yaha kuni da bukwaftá dzva ghuni ka sɗanaftá zwaŋama ghuni. 8 Katək ná, guninista ghuni ta dzva ghuni ka ɓlanafta ghuni ta nzawa taɓta skwi ya kumaŋ tsi. 9 Ɗaswa ka kuni, yaha ghwaɗaka ndanu da sliʼafta ma ŋuɗufa ghuni kazlay: “Taghwaŋ a mandəfáŋa vaku ka sagha wu, vakwa hliŋtá dməŋ,” ka kuni, ka mburzuhwa la ghuni ka pɗu, ka kwal vlaŋtá skwi. Dzaʼa wahay ta wahu da Yawe ta ghəŋa kaghuni, ŋa ksafta dmaku ta kaghuni. 10 Vlaŋwa vla nda ŋuɗufa muvla, ma mburzuh kuni. Mantsa ya, dzaʼa tfaghunagha tfa Yawe, Lazglafta ghuni ta wi ma inda slna ghuni, nda skwi ya klaf kuni ŋa magay. 11 Dzaʼa mamu mnduha ka pɗu teʼukla ta haɗika ghuni.* Tsaya ta kəl yu ka mnaghunafta kazlay: “Guniniswa guna ta dzva ghuni ta la ghuni tulek, nda mndu ka pɗu ta haɗika ghuni,” kəʼa ya. »
Zliŋta flaʼu vgha ta mnda la Hebru ka vuʼa
12 « Ka skwaghunap skwa la ghuni Hebru ta ghəŋa ni ka vuʼa, dər zgun tsi, dər marakw a tsi, dzaʼa magaghuna maga ta slna ka vaku mkuʼ. Ta mandəfáŋa vaku ya, zliŋta ghuni flaʼu vgha. 13 Ma tsa zliŋta dzaʼa zliŋta kuni flaʼu vgha ni ya, yaha ka zliŋta nda dzvu bayah. 14 Vlaŋta ghuni ŋəɗək ta mbəhuha mataba rina fisika ghuni, nda nimaya ta wa blikwa ghuni, nda skwi ma tsuʼaŋa ɗitsa yakwa inaba ghuni, taɓta tfatá wi ya tfaghunagha Yawe, Lazglafta ghuni. 15 Havakwa hava ta si nzakwa ghuni ka vuʼa ta haɗika Masar, ka varagaptá Yawe, Lazglafta ghuni ya. Tsaya ta kəl yu ka vlaghunata na gwaɗaha mnaghunaf yu gita na.
16 Kawayaka skwi ka tsa vuʼa ya nda kaghuni mantsa: “Va a yu ta dgata vgha nda kagha wu,” kaʼa, kabga ɗvuta ni ta kagha nda la ga ghuni tani, zɗa nzakwa ni ga ghuni, 17 mantsa ya ná, klafta ghuni ta dzili, ka zlranaptá sləməŋ ta vata paɗəwa tgha həga ga ghuni ŋa nzakwa ni ka vuʼa ghuni ŋa ɗekɗek. Manda tsaya dzaʼa maga kuni guli nda kurɗa ghuni. 18 Yaha kuni da haga madər nda zliŋta ghuni, kabga ma tsa vaku mkuʼ ya ná, malaghu mala slna ni his səla ta slna mndu ta plə lu nda pla. Ka maga maga kuni mantsa ya, dzaʼa tfaghunagha tfa Yawe, Lazglafta ghuni ta wi ma inda slna ghuni ta mag kuni. »
Ŋa Yawe taŋtaŋa yakwa skwi nda səla
19 « Inda taŋtaŋa zwaŋa sla, nda inda zwana rina fisik ka zgun ta yata ga ghuni ná, fanata ghuni ta tsaya ta Yawe, Lazglafta ghuni. Yaha kuni dá maga slna ma vwah nda taŋtaŋa zwaŋa sla ghuni, yaha kuni da gatsa swida taŋtaŋa zwaŋa tuwaka ghuni. 20 Inda vaku, ka zuta kuni ta sluʼa taŋ kagha nda la ga ghuni ta kəma Yawe, Lazglafta ghuni ma vli ya dzaʼa zbapta Yawe. 21 Ka mamu ya nda maslivinza tida, dər ta dzəgiɗi tsi, dər nda ghulpa tsi, dər mndəra wati ma maslivinza a tsi tida, haɗ kuni dzaʼa hna tsaya ŋa Yawe, Lazglafta ghuni wa. 22 Mintgha ga ghuni dzaʼa zuta kuni ta tsaya. Laviŋ lava mndu nda skwa tsaɗa tida nda mndu kul haɗ skwa tsaɗa tida ta zay kawadaga nda kaghuni, nda nza manda sluʼa ghadigir nda madva. 23 Ba us yeya dzaʼa kwal kuni zay, ta haɗik dzaʼa mbəziŋta kuni manda imi. »